தூக்கத்தில் நடத்தல்

by **சிவா** Sat 8 May 2010 - 23:02

அப்பொழுது நள்ளிரவு நேரம். ஊர்க்காவலர் தெருத் தெருவாக வலம் வந்து கொண்டிருந்தார்.

முல்லாவின் வீட்டருகே வந்தபோது, யாரோ ஓர் ஆள் தெருவில் நின்றவாறு முல்லாவின் வீட்டுச் சன்னல் வழியாக உள்ளே பார்ப்பதை ஊர்க்காவலர் கவனித்து விட்டார்.

ஓடிச் சென்று அந்த மனிதனைப் பிடித்துப் பார்த்த ஊர்க்காவலர் திடுக்கிட்டு விட்டார்.

அந்த ஆள் வேறு யாருமில்லை, முல்லாவேதான்! ஊர்க்காவலர் முல்லாவை நோக்கி, "முல்லா அவர்களே! உங்கள் வீட்டுக்குள் நீங்களே ஏன் எட்டிப் பார்த்துக் கொண்டிருக்கிறீர்கள்! உம்முடைய மனைவி உம்மை வெளியே அடித்துத் துரத்தி விட்டாரா?" என்று கேட்டார்.

முல்லா அவரைப் பேச விடவில்லை. "ஒரு முக்கியமான ஆராய்ச்சியில் நான் இருக்கிறேன். நான் இரவில் தூக்கத்தில் நடப்பதாக என் மனைவியும், அக்கம்பக்கத்தில் வசிப்பவர்களும் கூறுகிறார்கள். நான் உண்மையிலேயே தூக்கத்தில் நடக்கிறேனா? இல்லையா? என்று தெரிந்து கொள்வதற்காகத்தான் நான் என் வீட்டுச் சன்னல் வழியாக உள்ளே எட்டிப் பார்த்துக் கொண்டிருந்தேன்" என்று முல்லா கூறினார்.

அவருடைய நகைச்சுவையான பேச்சைக் கேட்டு ரசித்த ஊர்க்காவலர் சிரித்துக் கொண்டே போய் விட்டார்.