பெண்ணை கடத்தி விற்ற ஆறு பேர் கைது

by arularjuna Wed May 05, 2010 9:48 am

ஹர்டா : ஓர் இளம் பெண்ணைக் கடத்தி, 50 ஆயிரம் ரூபாய்க்கு மற்றொருவரிடம் விற்ற ஆறு பேர் போலீசால் கைது செய்யப்பட்டுள்ளனர். மூன்று பெண்கள் உள்ளிட்ட இன்னும் ஆறு பேரை போலீசார் தேடி வருகின்றனர்.

மகாராஷ்டிர மாநிலம், அமராவதி மாவட்டத்தைச் சேர்ந்தவர் ஜெயா(23). இவர், நாக்பூரிலிருந்து ஜான்சியிலுள்ள தனது சகோதரி வீட்டுக்கு ரயிலில் சென்ற போது, இவர் அருகில் இருந்த பயணிகள், இனிப்புகளை வழங்கியுள்ளனர். அதைச் சாப்பிட்ட ஜெயா மயக்கமடைந்தார். அவருக்கு நினைவு திரும்பிய போது, மத்தியபிரதேச மாநிலம், ஹர்டா மாவட்டத்தில் தாஜ்புரா கிராமத்தில் உள்ள ராம்தீன் என்பவரின் வீட்டில் இருப்பதை உணர்ந்தார். அவரைக் கடத்தியவர்கள், சஞ்சய் மற்றும் ஹரி ஓம் பிரஜாபதி ஆகிய இருவரிடம் 50 ஆயிரம் ரூபாய்க்கு விற்றுவிட்டனர். சஞ்சயை மணந்துகொள்ளுமாறு அங்கிருந்தவர்கள் ஜெயாவைக் கட்டாயப்படுத்தியுள்ளனர். இதற்கிடையில், நடந்த சம்பவத்தை, ஜெயா தன் சகோதரர் சுமித்துக்குத் தெரியப்படுத்தினார். அவர் போலீசில் தெரிவித்தார். இச்சம்பவத்தில் ஆறு பேர் கைது செய்யப் பட்டுள்ளனர். மூன்று பெண்கள் உள்ளிட்ட இன்னும் ஆறு பேரைத் தேடி போலீசார், நாக்பூர் விரைந்துள்ளனர்.