ஒரு மரம் வெட்டினால் 10 மரக் கன்றுகள் நடவேண்டும்

thiru99 · thiru99 Fri Apr 30, 2010 12:17 pm

ஒரு மரம் வெட்டினால் 10 மரக்கன்றுகளை நடுவது தொடர்பாக அனைத்து துறைகளும் பலனடையும் விதத்தில், தகுந்த சுற்றறிக்கையை பொதுத்துறை பிறப்பிக்க வேண்டும் என, சென்னை உயர் நீதிமன்றம் கருத்து தெரிவித்துள்ளது.

சென்னை உயர்நீதி மன்ற வழக்கறிஞர் ஞானேஸ்வரன் தாக்கல் செய்த மனுவில், புதிய கட்டடங்கள் கட்டும் போதும், சாலைகளை அகலப்படுத் தும் போதும், மரங்களை வெட்டுகின்றனர். மரங்கள் வெட்டுவதை தடுப்பதற்கு தகுந்த சட்டம் இல்லை. நகர்ப்புறங்களில் மக்கள் தொகை அதிகரிக்கும் நிலையில், அங்குள்ள இடங்களின் தேவையும் அதிகரிக்கிறது. இதனால், குறைவான பகுதிகளிலேயே மரங்கள் வளர்க்கப்படுகின்றன. தேவையில்லாமல் மரங்களை வெட்டுவதை தடுப்பதற்கு புதிய சட்டத்தை வகுக்க வேண்டும். சுற்றுச் சூழல் பாதிப்பை கருத்தில் கொள்ளாமல், உள்ளாட்சி அமைப்புகளில் ஏராளமான மரங்கள் வெட்டப்படுகின்றன. மாநில நெடுஞ்சாலைத்துறை சார்பில் கையாளப்படும் 30 திட்டங்களுக்கு, மரங்கள் வெட்டப்படுகின்றன.

ஒரு மரத்தை வெட்டினால், 10 மரக்கன்றுகளை நட்டு மற்றவர்களுக்கு முன்னுதாரணமாக அரசு திகழ வேண்டும். புதிய தலைமைச் செயலகம் கட்டுவதற்காக 100க்கும் மேற்பட்ட மரங்கள் வெட்டப்பட்டன. கட்டுமானம் முடிந்த பின், உடனடியாக மரக்கன்றுகளை நட வேண்டும். காடுகளில் ஏராளமான மரங்கள் வெட்டப்படுகின்றன. இவ்வாறு மரங்களை வெட்டுவதற்கு, குறைவான தொகையே அபராதமாக வசூலிக்கப்படுகிறது. இதனால், சமூக விரோதிகள், தங்கள் தனிப்பட்ட நலனுக்காக மரங்களை வெட்டுகின்றனர். அபராதத் தொகையை 25 ஆயிரம் ரூபாயாக உயர்த்த வேண்டும். மற்ற மாநிலங்களில் உள்ளது போல் மரங்கள் பாதுகாப்பு சட்டத்தை தமிழக அரசு கொண்டுவர வேண்டும். ஒரு மரம் வெட்டினால் 10 மரக் கன்றுகள் நடவேண்டும். அரசு துறைகள் அனைத்துக்கும் தகுந்த உத்தரவு பிறப்பிக்க தமிழக அரசுக்கு உத்தரவிட வேண்டும் என்று மனுவில் கூறப்பட்டு உள்ளது.

மனுவை தலைமை நீதிபதி கோகலே, நீதிபதி தனபாலன் அடங்கிய, முதல் பெஞ்ச் விசாரித்தது. மனுதாரரான வழக்கறிஞர் ஞானேஸ்வரன், அரசு சார்பில் அரசு பிளீடர் ராஜா கலி புல்லா ஆஜராகினர். முதல் பெஞ்ச் பிறப்பித்த இடைக் கால உத்தரவு:

மரங்களை வெட்டுவதும், அதற்கு மாற்றாக மரக் கன்றுகளை நடாமல் இருப்பதும் குறித்து மனுவில் சுட்டிக்காட்டப்பட்டது. ஒரு மரம் வெட்டினால், 10 மரக் கன்றுகளை நட வேண்டும் என, ஏற்கெனவே இதே உயர்நீதிமன்றம் உத்தரவிட்டிருப்பதும் சுட்டிக்காட்டப் பட்டது. அனைத்துத் துறைகளுக்கும் பலன் கிடைக்கும் விதத்தில், தகுந்த சுற்றறிக்கையை பொதுத் துறை அல்லது சம்பந்தப்பட்ட அதிகாரி பிறப்பிக்க வேண்டும் என நாங்கள் கருதுகிறோம். அரசிடம் இருந்து தகவல் பெறவும், முடிந்தால் சுற்றறிக்கையை பிறப்பிக்கவும் அரசு பிளீடர் அவகாசம் கோரியுள்ளார். எனவே, விசாரணை ஜூன் 17ஆம் தேதிக்கு தள்ளிவைக்கப்படுகிறது என்று முதல் பெஞ்ச் இடைக்கால உத்தரவிட்டுள்ளது.

ஒரு மரம் வெட்டினால் 10 மரக் கன்றுகள் நடவேண்டும்

ஒரு மரம் வெட்டினால் 10 மரக் கன்றுகள் நடவேண்டும்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக