பிரிட்டன் பொதுத் தேர்தல் : ஆசியாவைச் சேர்ந்தவர்கள்

பிரிட்டனில் அடுத்த மாதம் நடைபெற உள்ள பொதுத் தேர்தலில் ஆசிய பிராந்தியத்தைச் சேர்ந்த பலர் அதிக எண்ணிக்கையில் போட்டியிடுகின்றனர். மொத்தம் 89 வேட்பாளர்கள் போட்டியிடுவதாகத் தகவல் வெளியாகியுள்ளது.
இதில் இந்திய வம்சாவளியைச் சேர்ந்தவர்கள் அதிகம் இடம் பெற்றுள்ளனர்.
கோவா மாநிலத்தைச் சேர்ந்த தொழிலாளர் கட்சி எம்.பி.யான கெய்த் வாஸின் சகோதரி வலேரி வாஸýம் இந்த தேர்தலில் போட்டியிடுகிறார்.
தேர்தல் மே 6-ம் தேதி நடைபெற உள்ளது. ஆசிய பிராந்தியத்தைச் சேர்ந்த 89 பேரில் 30 பேர் கன்ஸர்வேடிவ் கட்சியைச் சேர்ந்தவர்களாவர். இந்தக் கட்சி தேர்தலில் வெற்றி பெறும் என பரவலாக எதிர்பார்க்கப்படுகிறது. ஒருவேளை தொங்கு நாடாளுமன்றம் அமைந்தால் அதிக எண்ணிக்கையிலான இடங்களில் வெற்றி பெற்றுள்ள கட்சியாக இது கருதப்படும். 2005-ம் ஆண்டு நடைபெற்ற தேர்தலில் ஆசிய பிராந்தியத்தைச் சேர்ந்த 68 பேர் போட்டியிட்டனர். இதில் சிறுபான்மை சமுதாயத்தைச் சேர்ந்த எம்.பி.க்கள் 15 பேர் வெற்றி பெற்றதாக அறிவிக்கப்பட்டனர்.மே 6-ம் தேதி நடைபெற உள்ள பொதுத் தேர்தலில் பல புதிய சாதனைகள் நிகழக் கூடும். குறிப்பாக கருப்பர் இனத்தைச் சேர்ந்தவர்கள் இந்தத் தேர்தலில் தீவிரமாக பங்கேற்கின்றனர்.
இந்தத் தேர்தலில் கட்சியின் வெற்றி தோல்வியை நிர்ணயிக்கும் சக்திகளாக ஆசிய மற்றும் ஆப்பிரிக்க-கரிபிய சமுதாயத்தைச் சேர்ந்தவர்கள் இருப்பர் என கணிக்கப்பட்டுள்ளது. மொத்தம் 100 தொகுதிகளில் தேர்தல் நடைபெற உள்ளது.
முன்னெப்போதும் இல்லாத வகையில் முதல் முறையாக பிரிட்டன் தேர்தலில் கருப்பர் இனத்தவரை முன்னிறுத்தி பிரசாரங்கள் செய்யப்படுகின்றன. இனவெறி மறைந்து நீதி கிடைக்க வேண்டும் என்பதற்காக இச்சமூகத்தைச் சேர்ந்த பலரும் போட்டியிடுவதோடு, வாக்களிப்பதிலும் தீவிரமாக உள்ளனர், என்று இச்சமுதாயத்தைச் சேர்ந்த இயக்குநர் சிமோன் வூலி தெரிவித்தார். இருப்பினும் இந்திய வம்சாவளியினரைத் தவிர, மற்ற ஆசிய பிரிவினரிடையே குறிப்பாக பாகிஸ்தான், வங்கதேசத்தைச் சேர்ந்தவர்களிடையே தேர்தல் குறித்த உற்சாகம் காணப்படவில்லை. இதை பிபிசி நடத்திய ஆய்வும் உறுதி செய்துள்ளது. இந்த பொதுத்தேர்தலில் 55 சதவீதம் பேர் வாக்களிப்பார்கள் என எதிர்பார்க்கப்படுகிறது.
2005 பொதுத் தேர்தலில் மொத்த மக்கள் தொகையில் ஆசியர்கள் அதிக அளவில் வாக்களித்தது குறிப்பிடத்தக்கது.