சென்னைக்கும் மதுரைக்கும் 61 முறை பறந்துள்ளார் அழகிரி

by sathyan Mon Apr 26, 2010 6:11 pm

சென்னைக்கும் மதுரைக்கும் 61 முறை பறந்துள்ளார் அழகிரி

தகவல் அறியும் உரிமை மனுவுக்கு அளித்த பதிலில் ரசாயனத் துறை அமைச்சகம் இந்த தகவலைத் தெரிவித்துள்ளது.

அவர் பதவியேற்ற முதல் 6 மாதத்தில் சென்னைக்கும் மதுரைக்கும் இடையே 61 முறை விமானத்தில் பறந்துள்ளார். 2009 ஆண்டு மே 29 முதல் டிசம்பர் 1-ம் தேதி வரை உள்ளூர் விமானங்களில் 61 முறையில் சர்வதேச விமானங்களில் 6 முறையும் அவர் பயணம் செய்துள்ளார். இந்த பயணங்களுக்கான மொத்த கட்டண தொகை ரூ. 14.5 லட்சம் ஆகும்.

அமைச்சர் அழகிரி தில்லியில் உள்ள தனது அமைச்சரக அலுவலகத்துக்கு எத்தனை நாள் வருகை தந்துள்ளார். அவர் கலந்து கொண்ட மத்திய அமைச்சரவைக் கூட்டங்கள் எத்தனை என்ற கேள்விகளுக்கு பதில் அளிக்கப்படவில்லை.

அமைச்சருடன் எத்தனை பேர் சென்றுள்ளனர். அவர் தனது பயணங்களின் போது தங்குவதற்கான செலவுகள் எவ்வளவு என்ற கேள்விக்கும் பதிலளிக்கப்படவில்லை.

அவர் அமைச்சரான பிறகு துறை ரீதியாக நடைபெறும் கூட்டங்களில் எத்தனை கூட்டங்களுக்கு அவர் தலைமை ஏற்று நடத்தி உள்ளார் என்ற கேள்விக்கும் ,மௌனமே பதிலாக உள்ளது

இது குறித்து அமைச்சரின் கருத்தை அறிந்து கொள்ள பிடிஐ நிறுவன செய்தியாளர் அவரை தொடர்பு கொள்ள முயன்றும் பயனில்லை. தில்லியில் உள்ள அழகிரி வீட்டை தொலைபேசியில் தொடர்பு கொண்டபோது, பதிலளிக்க யாரும் இல்லை. செல்போனிலும் அவரைத் தொடர்பு கொள்ள முடியவில்லை. அவர் தற்போது மாலத் தீவுக்கு சென்றுள்ளதாக செய்திகள் வெளியாகி உள்ளன.

அமைச்சர் அழகிரி, நாடாளுமன்றத்தின் இரு அவைகளிலும் கலந்து கொண்டு உறுப்பினர்களின் கேள்விகளுக்குப் பதிலளிப்பது இல்லை என்று எதிர்க்கட்சிகள் ஏற்கெனவே குற்றம்சாட்டி வருகின்றன.
இந்தப் பிரச்னை கடந்த வாரத்தில் நாடாளுமன்றத்தின் இரு அவைகளிலும் பெரும் சர்ச்சையை ஏற்படுத்தியது.