பயங்கரவாதி கசாப்பை ஒப்படைக்கவேண்டும்: பாகிஸ்தான் கேட்கிறது

பயங்கரவாதி கசாப்பை ஒப்படைக்கவேண்டும்: பாகிஸ்தான் கேட்கிறது

IST







இஸ்லாமாபாத்:மும்பைத் தாக்குதலில் ஈடுபட்ட பயங்கரவாதி அஜ்மல் அமீர் கசாப்பை ஒப்படைக்கும்படி பாகிஸ்தான், இந்தியாவிடம் கோரியுள்ளது.மும்பையில் கடந்த 2008ம் ஆண்டு தாஜ் ஓட்டல் உள்ளிட்ட இடங்களில் பாகிஸ்தானிய பயங்கரவாதிகள் தாக்குதல் நடத்தினர். இந்த தாக்குதலில் 165 பேர் கொல்லப்பட்டனர். தாக்குதல் நடத்திய பயங்கரவாதிகளில் கசாப்பை தவிர மற்றவர்கள் சுட்டுக் கொல்லப்பட்டனர். இந்த வழக்கை விசாரித்து வரும் மும்பை சிறப்பு கோர்ட், வரும் 3ம் தேதி இந்த வழக்கில் தீர்ப்பு கூற உள்ளது.

மும்பைத் தாக்குதலில் சம்பந்தப்பட்டதாக பாகிஸ்தான் பயங்கரவாதிகள் மீது கூறப்படும் புகாருக்கு உரிய ஆதாரங்கள் இல்லை என, பாகிஸ்தான் மறுத்து வந்தது. எனினும் பாகிஸ்தான் கேட்ட ஆதாரங்கள் மூன்று முறை இந்தியா சார்பில் கொடுக்கப்பட்டுள்ளது.இதற்கிடையே, நாளை மறுதினம் மற்றும் 29ம் தேதிகளில் பூடானில் சார்க் மாநாடு நடைபெற உள்ளது. இந்த மாநாட்டில் பிரதமர் மன்மோகன் சிங்கும், பாகிஸ்தான் பிரதமர் கிலானியும் பங்கேற்க உள்ளனர்.

இந்த மாநாட்டில் இருநாட்டு பிரதமர்களும் சந்தித்துப் பேச வாய்ப்பு உள்ளது. எனவே, இருநாட்டுக்கு இடையேயான அமைதி பேச்சுவார்த்தையை துவக்குவதற்கு கசாப் விவகாரம் தடையாக உள்ளதால், மும்பை தாக்குதலில் சம்பந்தப்பட்டவர்கள் மீது நடவடிக்கை எடுக்க பாகிஸ்தான் முன்வந்துள்ளது.மும்பைத் தாக்குதல் சம்பவம் தொடர்பாக பாகிஸ்தானின் ராவல்பிண்டியில் உள்ள பயங்கரவாத தடுப்பு கோர்ட்டில் வழக்கு உள்ளது. லஷ்கர் -இ- தொய்பா பயங்கரவாத அமைப்பின் தளபதி ஜக்யூர் ரெஹ்மான் லக்வி உள்ளிட்ட ஏழு பேர் மீது இந்த கோர்ட்டில் வழக்கு நடக்கிறது.

கசாப்பை பாகிஸ்தானிடம் ஒப்படைத்தால் இந்த கோர்ட்டில் விசாரணை நடத்த உதவியாக இருக்கும் என பாகிஸ்தான், தனது வெளியுறவு துறை அதிகாரிகள் மூலம் இந்திய தூதர் ராகுல் குல்ஷ்ரெஸ்திடம் தகவல் தெரிவித்துள்ளது. கடந்த பிப்ரவரி மாதம் வரை இந்தியா அளித்துள்ள மூன்று ஆவணங்களின் அடிப்படையில் கசாப்பிடம் விசாரணை நடத்த தயாராக இருப்பதாகவும், கசாப் ஏற்கனவே, லாகூர் கோர்ட்டால் தேடப்பட்டு வரும் குற்றவாளியாக அறிவிக்கப்படடுள்ளதாகவும், பாகிஸ்தான் உள்துறை அமைச்சர் ரெஹ்மான் மாலிக் தெரிவித்துள்ளார்.

கசாப்பையும், மும்பைத் தாக்குதலுக்கு உடந்தையாக இருந்த பாகிம் அன்சாரியையும் கைது செய்ய ராவல்பிண்டி கோர்ட் பிறப்பித்த கைது உத்தரவை, இந்திய தூதரிடம், வெளியுறவுத்துறை அதிகாரிகள் ஒப்படைத்துள்ளதாகவும் கூறப்படுகிறது. கசாப்பை பாகிஸ்தான் கோர்ட்டில் ஒப்படைத்தால், கசாப்பின் வாக்குமூலத்தை பதிவு செய்ய இந்திய தரப்பில் இரண்டு மாஜிஸ்திரேட்களையும், ஒரு ஆய்வாளரையும் அனுமதிக்க அந்நாட்டு அரசு முடிவு செய்துள்ளது.