ஆம்பூர் அருகே பஸ் விபத்து: காங்.முன்னாள் எம்.பி. ஜெயமோகன் மரணம்

**சிவா** · **சிவா** Sun Apr 25, 2010 4:23 pm

ஆம்பூர் அருகே பஸ் விபத்து: காங்.முன்னாள் எம்.பி. ஜெயமோகன் மரணம் டிரைவர் பலி;7 பேர் படுகாயம்

ஆம்பூர் அருகே பஸ் விபத்து: காங்.முன்னாள் எம்.பி. ஜெயமோகன் மரணம் 87177893-fc10-4bb8-8486-6117dbc74262_S_secvpf

திருப்பத்தூர் தொகுதி முன்னாள் காங்கிரஸ் எம்.பி. ஜெயமோகன் (வயது 58). வாணியம்பாடி போஸ்ட் ஆபீஸ் தெருவில் குடும்பத்துடன் வசித்து வந்தார். ஜெயமோகனுக்கு சென்னை பெசன்ட் நகரிலும் சொந்தமாக வீடு உள்ளது. இன்று வாணியம்பாடியில் நடைபெறும் திருமண நிகழ்ச்சியில் கலந்து கொள்வதற்காக ஜெயமோகன் சென்னையில் இருந்து நேற்று இரவு புறப்பட்டார்.

பெங்களூர் செல்லும் தனியார் ஆம்னி பஸ்சில் பயணம் செய்தார். அவர் டிரைவருக்கு பின் இருக்கையில் ஜன்னல் ஓரமாக அமர்ந்து இருந்தார். இன்று அதிகாலை 2.30 மணியளவில் ஆம்னி பஸ் ஆம்பூர் அருகே குளித்திகையில் சென்று கொண்டிருந்தது.

அப்போது பஸ்சின் முன்பு வேலூரில் இருந்து கிரானைட் கல் ஏற்றிய ஒரு லாரி சென்று கொண்டிருந்தது. திடீரென்று லாரி பிரேக் போட்டதால் பின்னால் சென்று கொண்டிருந்த ஆம்னி பஸ் கண்ணிமைக்கும் நேரத்தில் லாரி மீது மோதியது.

இதனால் பஸ்சின் முன் பகுதி நொறுங்கி சிதைந்தது. முன் சீட்டில் இருந்த ஜெயமோகனும், டிரைவரும் அதே இடத்தில் உடல் நசுங்கி பலியானார்கள்.

பஸ்சில் இருந்த 7 பேர் படுகாயம் அடைந்தனர். விபத்து பற்றி தகவல் அறிந்ததும் டி.எஸ்.பி. பன்னீர் செல்வம் சம்பவ இடத்துக்கு விரைந்து சென்று மீட்பு பணியில் ஈடுபட்டார்.

காயம் அடைந்தவர்களை மீட்டு ஆம்பூர் அரசு ஆஸ்பத்திரிக்கு அனுப்பி வைத்தனர். காயம் அடைந்தவர்கள் விபரம் வருமாறு:-

ஷாலினி (46), இவரது மகள் பிரியங்கா (16), மூர்த்தி (18), சொக்கல் (60), சத்யா மற்றவர்கள் பெயர் விபரம் உடனடியாக தெரிய வில்லை.

மரணம் அடைந்த முன்னாள் எம்.பி. ஜெய மோகனின் சொந்த ஊர் வாணியம்பாடி. இவரது மனைவி மல்லிகேசுவரி (52), மகன் விஜய இளஞ்செழியன், மகள் டாக்டர் அனிதா இளவரசி.

பி.ஏ.பி.எல். பட்டம் பெற்ற ஜெயமோகன் வக்கீலாகவும் பணிபுரிந்தார். காங்கிரசில் தீவிர ஈடுபாடு கொண்டவர்.

1985 முதல் 89 வரை தமிழக இளைஞர் காங்கிரஸ் தலைவராக பதவி வகித்தார்.

1984, 1989, 1990 ஆகிய 3 பாராளுமன்ற தேர்தல்களில் காங்கிரஸ் சார்பில் திருப்பத் தூர் தொகுதியில் போட்டியிட்டு வெற்றி பெற்றார்.

சமூக சேவையில் மிகுந்த ஈடுபாடு உடையவர். வாணியம்பாடி பகுதியில் பிரியதர்சினி என்ஜினீயரிங் கல்லூரி, பாலிடெக்னிக் கல்லூரி உள்பட பல கல்வி நிறுவனங்களை நடத்தி வந்தார்.

ஜெயமோகனின் மகன் விஜய இளஞ்செழியன் சமீபத்தில் நடைபெற்ற இளைஞர் காங்கிரஸ் தேர்தலில் போட்டியிட்டு பொதுச்செயலாளர் ஆனார்.

ஜெயமோகன் மரணம் பற்றி அறிந்ததும் ஏராளமான காங்கிரசார் ஆம்பூர் அரசு ஆஸ்பத்திரியில் குவிந்தனர்.

பிரேத பரிசோதனை முடிந்ததும் அவரது உடல் வாணியம்பாடி வீட்டில் பொதுமக்கள் அஞ்சலி செலுத்துவதற்காக வைக்கப்பட்டது.