துபாய் விமானம் வான்வெளியில் தடுமாற்றம் ; 361 பயணிகள் உயிர் பிழைத்தனர்; 12 பேர் காயம்

by sathyan Sun Apr 25, 2010 4:25 pm

துபாய் விமானம் வான்வெளியில் தடுமாற்றம் ; 361 பயணிகள் உயிர் பிழைத்தனர்; 12 பேர் காயம்
ஏப்ரல் 25,2010,13:05 IST

துபாய் விமானம் வான்வெளியில் தடுமாற்றம் ; 361 பயணிகள் உயிர் பிழைத்தனர்; 12 பேர் காயம் Tbltopnews1_62309992314

கொச்சி: ஐக்கிய அரபு எமிரேட்டை சேர்ந்த விமானம் ஒன்று பெரும் விபத்தில் இருந்து தப்பியது. விமான ஓட்டிகள் சாதுர்யமாக இயக்கி தரை இறக்கியதால் பெரும் அசம்பாவிதம் தவிர்க்கப்பட்டது. சமீபத்தில் போலந்து நாட்டை சேர்ந்த அதிபர் விபத்தில் சிக்கி இறந்த சம்பவம் நடந்து முடிந்து சில நாட்களுக்குள் மீண்டும் ஒரு கோரச்சம்பவத்தில் இருந்து இந்த விமானம் தப்பியிருக்கிருக்கிறது என்பது நிம்மதி.

காற்று வெற்றிடத்தில் சிக்கியது : துபாயில் இருந்து இன்று காலை கொச்சி நோக்கி புறப்பட்ட விமானம் கோவா வான்வெளியில் சென்று கொண்டிருந்த போது அங்கு காற்று வெற்றிடம் ஏற்பட்டது. அழுத்தம் மற்றும் அடர்த்தியில் மாற்றம் ஏற்பட்டு அந்த வட்டத்திற்குள் சிக்கிய விமானம் தடுமாறியது. பயணிகள் பதறினர்.

சுமார் 20 ஆயிரம் அடி உயரத்தில் பறந்து கொண்டிருந்த விமானம் கீழ் நோக்கி தள்ளப்பட்டது. 2 ஆயிரம் அடி உயரம் வருவதற்குள் விமான ஓட்டிகள் சாதுர்யமாக விமானத்தை நிலைப்படுத்தி சாதாரண நிலைக்கு கொண்டு வந்தனர். பின்னர் அவசர , அவசரமாக கொச்சி நோக்கி சென்று தரையிறக்கினர். இருப்பினும் , இதில் பயணித்த 12 பேருக்கு காயம் ஏற்பட்டது. விமானத்தில் மொத்தம் 361 பயணிகள் இருந்துள்ளனர்.

விமானிகள் சுதாரித்திருக்காவிட்டால் விமானம் நடுவானிலேயே வெடித்து சிதறி இருக்கும். பெரும் உயிர்ச்சேதமும் ஏற்பட்டிருக்கும். அதிர்ஷ்டவசமாக உயிர்பிழைத்தனர். இதனால் கொச்சி விமான நிலையத்தில் பெரும் பதட்டம் ஏற்பட்டது. இந்த சம்பவத்தையடுத்து துபாயில் இருந்து பயணிகள் நிலை குறித்து உறவினர்கள் போன் மூலம் விசாரித்து வருகின்றனர்.

மறு பிறவி எடுத்துள்ளோம் : இந்த விமானத்தில் விமானம் தடுமாறும்போது பயணிகள் அவரவர் இருக்கையில் படுத்துக்கொண்டு அலறியுள்ளனர். பலருக்கு தோள்பட்டை, கழுத்து பகுதியில் அடிப்பட்டுள்ளது. என்னவாகுமோ என்று பதறிப்போய் இருந்தோம் என விமானத்தில் பயணித்த ஒருவர் கூறினார். மேலும் அவர் கூறுகையில் ; நாங்கள் மறு பிறவி எடுத்துள்ளோம் என்றார். சிலருக்கு எக்ஸ்ரே எடுக்க அறிவுறுத்தப்பட்டுள்ளது. உயிர் பிழைத்தவர்கள் பெரும் பதட்டத்துடனும், சோகத்துடனும் இருந்தனர். பயணிகள் அனைவருக்கும் தேவையான மருத்துவ உதவி செய்யப்பட்டது.