திண்டிவனம் அருகே விபத்து: டிரைவர் உள்பட 5 பேர்

திண்டிவனம் அருகே விபத்து: டிரைவர் உள்பட 5 பேர் சாவு நின்று கொண்டிருந்த பஸ் மீது லாரி மோதியது




சென்னையிலிருந்து திருச்சிக்கு ஆம்மினி பஸ் சென்று கொண்டிருந்தது. பஸ்சை திருச்சி அருகே உள்ள துறையூரை சேர்ந்த டிரைவர் பாலு (வயது 40) ஓட்டி வந்தார். இன்று அதிகாலை 1-30 மணி அளவில் பஸ் திண்டிவனம் அருகே மேல்பேட்டை என்ற இடத்தில் வந்தபோது டயர் பஞ்சர் ஆனது. ரோட்டின் ஓரத்தில் பஸ்சை நிறுத்தி விட்டு சரிசெய் வதற்காக டிரைவர் பாலு இறங்கி பின் பகுதிக்கு சென்றார்.

பஸ்சிலிருந்த சில பயணிகளும் இறங்கி பஸ்சின் முன்பக்கம் சென்றார்கள். 10 பேர் ரோட்டின் ஓரத்தில் உள்ள தடுப்பு சுவர் மீது ஏறி அமர்ந்திருந்தனர்.

இந்த நேரத்தில் சென்னையிலிருந்து திருவனந்தபுரத்திற்கு இரும்பு குழாய் ஏற்றிக்கொண்டு வேகமாக வந்த ஒரு லாரி திடீரென்று பஸ்சின் பின்பக்கத்தில் பயங்கரமாக மோதியது. இதில் பஸ்சின் பின் பக்கத்தில் நின்ற டிரைவர் பாலு நசுங்கி பலியானார்.

மேலும் லாரி மோதியதில் வேகமாக முன்னோக்கி சென்ற பஸ் அங்கே தடுப்பு சுவர் மீது இருந்தவர்கள் மீதும் மோதியது. இதில் 3 பேர் அதே இடத்தில் உடல் நசுங்கி இறந்தனர். அவர்கள் பெயர் விவரம் வருமாறு:-

1.முருகன் (35), காளியாங் கோவில், சிவகங்கை மாவட்டம்.

2.சுப்பிரமணி (26), தவரைக்கோட்டை காரைக்குடி

3.சங்கிலிராஜன் (32), தாம்பரம், சென்னை.

மேலும் ரமேஷ், தங்கதுரை, லாரி டிரைவர் செல்வக்குமார், சங்கர், சுரேஷ்குமார், பழனிச்சாமி, சிவபுத்திரன் ஆகிய 7 பேர் படுகாயம் அடைந்தனர்.

தகவல் அறிந்ததும் துணை போலீஸ் சூப்பிரண்டு செல்வராஜ், போலீஸ் இன்ஸ்பெக்டர் ராஜீ, சப்-இன்ஸ்பெக்டர்கள் ராமராஜ், நாகரத்தினம், குணசேகரன் மற்றும் போக்குவரத்து போலீசார் அங்கு விரைந்து சென்றனர். காயம் அடைந்தவர்களை மீட்டு 108 ஆம்புலன்ஸ் மூலம் திண்டிவனம் அரசு ஆஸ்பத்திரிக்கு அனுப்பி வைக்கப்பட்டனர்.

பின்னர் அவர்கள் மேல் சிகிச்சைக்காக புதுவை ஜிப்மர் ஆஸ்பத்திரிக்கு அனுப்பி வைக்கப்பட்டார்கள். வழியிலேயே தங்கத்துரை (22) பரிதாபமாக இறந்தார். அவர் உளுந்தூர்பேட்டை அருகே உள்ள குளத்தூரை சேர்ந்தவர் ஆவார். மற்றவர்களுக்கு ஜிப்மர் ஆஸ்பத்திரியில் சிகிச்சை அளிக்கப்படுகிறது.