கோபுர சின்னத்தை மாற்றும் பேச்சு: மக்களின் சினத்தை தூண்டும் செயல்

சரவணன் · சரவணன் Thu 22 Apr 2010 - 2:43

ஸ்ரீவில்லிபுத்தூர் : சட்டசபையில் சில நாட்களுக்கு முன் பேசிய விடுதலை சிறுத்தைகள் கட்சி எம்.எல்.ஏ., ரவிக்குமார், ''தமிழக அரசின் சின்னமான ஸ்ரீவி., ஆண்டாள் கோயில் கோபுரத்தை மாற்றி, திருவள்ளுவர் படத்தை சின்னமாக அறிவிக்க வேண்டும்,'' என்றார்.

காலாவதி, போலி மருந்து விற்பனை; மின் தட்டுப்பாட்டால் தொழில், விவசாயம் பாதிப்பு; குடிநீர், சாலை, பஸ்,
பள்ளிகளுக்கு கட்டடம் முதலிய வசதிகள் இன்மை என பலவகையிலும் பரிதவிக்கிறது தமிழகம். மக்கள் அடிப்படை தேவைகளை பேசி தீர்வு காண்பார் என்ற எதிர்பார்ப்பில் தேர்ந்தெடுத்து சட்டசபைக்கு அனுப்பப்படும் எம்.எல்.ஏ., இப்படி, 'கிடப்பது கிடக்கட்டும் கிழவியை தூக்கி மனையில் அமரவை' என்ற கதையாக, தேவையற்ற பிரச்னைகளை பேசி அவையின் நேரத்தையும், மக்களின் எதிர்பார்ப்பையும் வீணடிக்கும் பணியில் சிரத்தையாய் ஈடுபடுவதால், தமிழகம் வளர்ச்சி பெற்று தலை நிமிர்வது கனவாகவே இருக்கும். சின்னம் மாற்ற வேண்டும்
என்ற ரவிக்குமார் எம்.எல்.ஏ.,வின் பேச்சுக்கு ஸ்ரீவி., மக்களிடையே கடும் எதிர்ப்பு கிளம்பியுள்ளது.

ஸ்ரீவி., எம்.எல்.ஏ., ராமசாமி (இந்திய கம்யூ.,): ரவிக்குமார் பேசியது கண்டிக்கத் தக்கது. இதை அரசின்
கருத்தல்ல. கோபுர சின்னத்தை மாற்ற முயற்சி செய்தால் கடுமையாக எதிர்ப்பேன்.

காங்., மாவட்ட செயலாளர் வன்னியராஜ்:'கோபுர தரிசனம் கோடி புண்ணியம்' என்பதற்கேற்ப தமிழகம் தற்போது நல்ல நிலையில் உள்ளதற்கு காரணம் ஸ்ரீவி., ஆண்டாள் கோயில் கோபுரம் சின்னமே. இதை மத சின்னமாக பார்க்காமல் புராதன சின்னமாக பார்க்க வேண்டும். இதை மாற்ற முயற்சிப்பது சரியல்ல.

திலகராஜன் (அ.தி.மு.க., வக்கீல் பிரிவு மாவட்ட துணை செயலாளர்): திராவிட பாரம்பரிய கட்டடக்கலைக்கு
எடுத்துக் காட்டாக விளங்குகிறது. ரவிக்குமாரின் பேச்சின் பின்னணியில் தி.மு.க, அரசின் செயல்பாடுகள் இருக்குமோ என்ற சந்தேகம் எழுந்துள்ளது.தமிழகத்தின் மதிப்பை அதிகரிக்க செய்யும் கோபுரம் சின்னத்தை மாற்றும் எண்ணத்தை கைவிட வேண்டும்.

முத்துச்சாமி ( திருநாவுக்கரசர் நற்பணி மன்ற தலைவர்) : கோபுரத்திற்கென்று தனி மரியாதை உள்ளது. இதன்
மூலம் தமிழகத்திற்கு தனி மரியாதை கிடைக்கிறது. கோபுரத்தை பார்க்கும் போது மனிதனின் எண்ணங்கள் உயரும். அதே போல் தமிழக அரசின் கோபுர சின்னத்தை பார்க்கும் போது தமிழகத்தை பற்றிய எண்ணமும் உயரும். இவ்வளவு சிறப்பு வாய்ந்த கோபுரம் சின்னத்தை மாற்றும் எண்ணமே வரக்கூடாது.

தங்கராஜ்( ஆர்.எஸ்.எஸ்., சேவை பிரிவு மாவட்ட செயலாளர்): கேரளாவில் யானைகள் அதிகம் இருப்பதால், அங்கு யானை மாநில சின்னமாக அறிவிக்கப் பட்டுள்ளது. தமிழகத்தில் கோயில்கள் அதிகம் உள்ளதால் கோபுரத்தை தமிழக அரசு சின்னமாக வைத்துள்ளது. நமது முன்னோர்கள் பல முறை ஆலோசனை செய்து வைத்த கோபுரம் சின்னத்தை மாற்றுவது சரியல்ல. அதை மாற்றுவதால் தமிழக அரசு தன் தனித் தன்மையை இழந்து விடும்.

ராமசாமி ( நகர பா.ஜ., துணை தலைவர் ): ஆண்டாள் பாசுரம் பாடிய பெருமை படைத்த ஸ்ரீவி.,கோயிலில் கோபுர சின்னத்தை தமிழக அரசு மாற்ற முயற்சி செய்ய கூடாது. விடுதலை சிறுத்தைகள் கட்சி எம்.எல்.ஏ., யின்
பேச்சு வன்மையாக கண்டிக்கதக்கது. இது விருதுநகர் மாவட்ட மக்களின் மனதைபுண்படுத்தியுள்ளது.

துரை பாண்டியன்( பசுமை பாரத அமைப்பாளர்): வரலாற்று சிறப்பு படைத்த ஆண்டாள் கோயில் ராஜ
கோபுரத்தை, தமிழக அரசு சின்னத்திலிருந்து மாற்ற க்கூடாது.இவ்வாறு தெரிவித்தனர்.

ஸ்ரீவி., ஆண்டாள் கோயில் புகழ்பெற்ற வைணவ ஸ்தலங்களில் ஒன்று. இக்கோயிலின் ராஜ கோபுரம் தமிழக அரசின் சின்னமாக இருப்பதை மக்கள் பெருமையாக கருதுகின்றனர். ரவிக்குமார் எம்.எல்.ஏ.,வின்
பேச்சால் ஸ்ரீவி., மக்கள் கடும் அதிருப்தி அடைந்துள்ளனர். இந்நிலையில் சின்னம் குறித்து அரசின் நிலையை முதல்வர் கருணாநிதி தெளிவாக விளக்க வேண்டுமென மக்கள் எதிர்பார்க்கின்றனர்.

நன்றி தினமலர்