மேகங்கள்

**சிவா** · **சிவா** Wed Apr 21, 2010 1:29 pm

மேகங்கள் எப்படி உற்பத்தியாகின்றன?

நீர் நிலைகள், கடல்கள் இவற்றிலிருந்து கிளம்பும் நீராவி காற்றுடன் கலந்து ஆகாயத்தின் மேல் ஏறுகிறது.

உயரே போய்ப் பரவும்போது குளிர்ச்சி அடைகிறது. இந்தக் குளிர்ச்சி, நீராவியைச் சிறுசிறு நீர் துகள்களாக மாற்றுகிறது.

இந்தத் துகள்களின் கூட்டம்தான் மேகம்.

மேகங்களில் எத்தனை வடிவங்கள் உண்டு?

எண்ணற்ற வடிவங்கள். ஆனால் சர்வதேச விஞ்ஞானிகள் அவற்றைப் பத்து முக்கிய வடிவங்களாகப் பிரித்திருக்கிறார்கள். உயரத்திற்குத் தகுந்தாற்போல இந்தப் பிரிவுகள்.

பிரிவுகளுக்கு ஏதாவது பெயர் உண்டா?

உண்டு, 20000 அடியிலிருந்து 40000 அடிவரை வியாபித்திருக்கும் மேகங்கள் ஸிர்ரஸ், ஸிர்ரேஸ்ட்ராடஸ், ஸிர்ரோ குமுலஸ் என்ற மூன்று பெயர்களை உடையவை.

எட்டாயிரத்திலிருந்து இருபதாயிரம் வரை அல்டோஸ்ட்ராடஸ், அல்டோகுமுலஸ் என்று இரண்டு வகைகள்.

எட்டாயிரம் அடிக்குள் ஸ்ட்ராடோ குமுலஸ், நிம்போ ஸ்ட்ராடஸ், ஸ்ட்ராடஸ் என்று மூன்று வகைகள்.

பிறகு ஒன்பதாவது குமுலஸ் மேகம் செங்குத்தாக உயரே கிளம்பக் கூடிய வகை.

குமுலோநிம்பஸ் மூவாயிரம் அடிக்கு உட்பட்டே ஆரம்பித்து இருபதாயிரம் அடி வரை போகக் கூடியது.

சரி! மேகத்திற்கு அதிக பட்ச நீள அகலம் யாராவது கணக்கிட்டிருக்கிறார்களா?

ஒ! செய்திருக்கிறார்கள். அகலம் சுமார் 100 மைல் இருக்கும். நீளம் சுமார் ஆயிரம் மைல்கூட இருக்கும்.

தலை பம்பாயில் இருந்தால், வால் சென்னையில் இருக்கலாம்.

உயரம் ஆறாயிரம் அடியிலிருந்து 2000 அடி இருக்கலாம்.

மழைத்துளி எப்படி உற்பத்தியாகிறது?

பல கருத்துக்கள் உண்டு. குளிர்ச்சியில் நீராவி சுருங்கி துளிகளாக ஜனிக்கிறது.

ஒரு துளியின் நீள அகலம் தெரியுமா?

துளி என்பது உருண்டைதான். அதன் குறுக்களவு 40 மைக்ரான் (1 மைக்ரான் என்பது 001 மிமீ.)

இவ்வளவு மேகத்திற்கு இவ்வளவு மழை விழும் என்று ஏதாவது கணக்கு உண்டா?

உண்டு, 30 கன மேகம் மழையாக மாறினால் லட்சத்து ஐம்பதினாயிரம் டன்மழை பொழியும்.

துளிகள் எவ்வளவு தெரியுமா? ஐம்பது லட்சம் கோடித்துளிகள்.

செயற்கை மழை எப்படி உண்டு பண்ணுகிறார்கள்?

ஆகாயத்தில் சமயங்களில் அதிக குளிர்ச்சியான மேகங்கள் உருண்டு திரண்டு மழைக்கு உரிய ஆயத்தத்தோடு இருக்கும்.

ஆனால் மழை பெய்யாது. இதற்குப் பல காரணங்கள் கூறுகிறார்கள் விஞ்ஞானிகள். சூல் கொண்ட இந்த மேகத்தை எப்படிப் பொழிய வைப்பது? இரண்டு வகைகளில் செய்கிறார்கள்.

என்ன வகைகள்?

முதல் வகை விமானத்தில் இந்த மேகத்திற்கு மேலே பறந்து உலர்ந்த பனிக்கட்டித் துகள்களைத் தூவுகிறார்கள்.

இவை மேகத்தின் நீராவித் துகள்களில் உறைந்து மழை பொழியும் நிலைமையைத் தோற்றுவிக்கிறது.

இரண்டாவது வகை?

ஸில்வர் அயோடைட் துளி நிறைந்த புகையை இந்த மேகங்களில் ஏவி விடுகிறார்கள்.

இவை முன்னதைப் போலவே மழை பொழியும் சாத்தியக் கூற்றை ஏற்படுத்துகிறது.

இவை உண்மையாகப் பலன் தருகின்றனவா?

இன்னும் அறிஞர்கள் இதில் விவாதம் செய்து கொண்டிருக்கிறார்கள். காக்காய் உட்காரப் பனம் பழம் விழுந்த கதை என்று பலர் சொல்ல, பலர், நல்ல மழை பெய்த சான்றுகளை விஞ்ஞானபூர்வமாக எடுத்துக் காட்டுகிறார்கள்.

'மேகத்தில் விதை விதைக்கும்' இந்த முறைகள் மூலம் புயல், மழையைக் கூடத் தவிர்க்கலாம் என்று கூறுகிறார்கள்.

ஸ்ரீ வேணுகோபாலன்