மழலையாக மாறவேண்டும்

by பாரதிப்பிரியன் Tue Apr 20, 2010 7:56 pm

மழலை பேசும் குழந்தையாக மாறவேண்டும்
நிலவைக் காட்டும் தாய் மடியிற் றவழவேண்டும்
அழகு அன்னை அமுதமுண்டு மகிழவேண்டும்
பல கதைகள் காதின் பாயத் தூங்கவேண்டும்

தந்தை தோளில் தெருவலமாய்ப் போகவேண்டும்
விந்தை பல களித்து ஓடிச் சிரிக்கவேண்டும்
சந்தைப் பொம்மை அடம்பிடித்து வாங்க வேண்டும்
சிந்தை எங்கும் நன் நினைவே தோன்றவேண்டும்

இறைவன் இல்லக் களங்கமில்லாத் தொழுகை வேண்டும்
நிறைய நிறையக் கடவுள் மொழியில் பேசவேண்டும்
சிறைப்படாத சிறந்த உள்ளம் பெறுதல் வேண்டும்
குறைகளில்லாக் குழந்தை வாழ்வே எனக்குவேண்டும்.

துள்ளித்துள்ளி நடை பயின்று கல்வி கற்கச் செல்லவேண்டும்
வெள்ளையுள்ளத்து நல்ல நண்பர் எந்தனுக்குப் பெருகவேண்டும்
பிள்ளை நல்ல பிள்ளை என ஊர் முழுதும் அணைக்கவேண்டும்
கள்ளமில்லாக் குழந்தை உணர்வில் மீண்டும் நான் திளைக்கவேண்டும்

by ஹாசிம் Tue Apr 20, 2010 8:06 pm

தாங்களுக்கு அனைத்தும் கிடைக்க வாழ்த்துக்கள்
வரிகள் அருமை நன்றி மழலையாக மாறவேண்டும் 677196

by சரண்யா Tue Apr 20, 2010 8:11 pm

ஒ...மழலையாய் மாறிட மழலையோடு இருந்தால் இப்பவு முடியும்..
நன்றி..வரிகளில் எண்ணம் வழியே மழலை நினைவுகள் வந்து சென்றன...
வாழ்த்துகள்..

by அன்பு தளபதி Tue Apr 20, 2010 8:32 pm

மீண்டும் பின்னோக்கி செல்ல வாய்த்த உங்கள் கவிதை வாழ்க

by **சிவா** Tue Apr 20, 2010 8:35 pm

இவ்வளவு "வேண்டும்" கள் உங்கள் மனதில் அடைபட்டுக் கிடக்கிறது! மனிதன் நினைப்பதெல்லாம் நடந்து விடுவதில்லை. நாம் எப்படியெல்லாம் வாழ நினைத்தோமோ அப்படி நம் குழந்தைகளை வாழ வைக்கவேண்டும். அதில் இந்த ஆசைகள் பூர்த்தியாகின்றன.