மன்மோகன்சிங் கட்டளையை ஏற்று சசிதரூர் மந்திரி பதவி ராஜினாமா

ஐ.பி.எல். கிரிக்கெட் விவகாரத்தில் காதலிக்கு உதவியதாக புகார் மன்மோகன்சிங் கட்டளையை ஏற்று சசிதரூர் மந்திரி பதவி ராஜினாமா


ஐ.பி.எல். கிரிக்கெட் தொடர்பாக புகார் கூறப்பட்டதையொட்டி, மத்திய மந்திரி பதவியில் இருந்து சசிதரூர் விலக வேண்டும் என்று பிரதமர் மன்மோகன்சிங் கட்டளையிட்டார். இதை ஏற்று சசிதரூர் தனது மந்திரி பதவியை ராஜினாமா செய்தார்.


ஐ.பி.எல். கொச்சி அணியில் தன்னுடைய காதலிக்கு ரூ.70 கோடி மதிப்புள்ள பங்குகளை பெற்றுத்தர தனது பதவியை தவறாக பயன்படுத்தியதாக மத்திய வெளியுறவுத்துறை ராஜாங்க மந்திரி சசிதரூர் மீது குற்றச்சாட்டு எழுந்துள்ளது.

சசிதரூர் விளக்கம்

எனவே, சசிதரூரை பதவி நீக்கம் செய்யக்கோரி, பாராளுமன்றத்தில் எதிர்க்கட்சிகள் அமளியில் ஈடுபட்டன. ஆனால் இந்தக் குற்றச்சாட்டு அடிப்படை ஆதாரமற்றது என்று பாராளுமன்றத்தில் சசிதரூர் அறிக்கை தாக்கல் செய்தார்.

காங்கிரஸ் தலைவர் சோனியா காந்தி, மத்திய நிதி மந்திரி பிரணாப் முகர்ஜி ஆகியோரை அவர் தனித்தனியாக சந்தித்து விளக்கம் அளித்தார். அவரது பிரச்சினையில் இறுதி முடிவு எடுக்கும் பொறுப்பை பிரதமர் மன்மோகன்சிங்கிடம் ஒப்படைக்க காங்கிரஸ் முடிவு செய்தது. பாராளுமன்றம் இன்று கூடும் நிலையில், அதற்கு முன்பாக, சசிதரூர் விவகாரத்தில் இறுதி முடிவு எடுக்க திட்டமிடப்பட்டது.

வெளிநாட்டு சுற்றுப்பயணத்தை முடித்துக் கொண்டு, நேற்றுமுன்தினம் பிரதமர் டெல்லி திரும்பினார்.

பிரதமருடன் சந்திப்பு

இந்நிலையில், நேற்று காலை, பிரதமர் மன்மோகன்சிங்கை அவரது இல்லத்தில் சசிதரூர் சந்தித்தார். அப்போது, தன்தரப்பு நியாயத்தை அவர் எடுத்துக் கூறியதாக தெரிகிறது. இச்சந்திப்பு 45 நிமிட நேரம் நீடித்தது.

சந்திப்பை முடித்துக் கொண்டு வெளியே வந்த சசிதரூர், காத்திருந்த நிருபர்களின் கேள்விகளுக்கு பதில் அளிக்காமல் சென்று விட்டார். அவரது இல்லத்தில் காத்திருந்த நிருபர்களிடமும் அவர் எதுவும் பேசவில்லை.

ராஜினாமா விருப்பம்

பிரதமருடனான சந்திப்பின்போது, தான் எந்த தவறும் செய்யவில்லை, பண ஆதாயம் பெறவில்லை என்று சசிதரூர் கூறியதாக, டெல்லி வட்டாரங்கள் தெரிவித்தன. தான் மத்திய அரசுக்கு தர்மசங்கடம் ஏற்படுத்தி இருந்தால், பதவி விலகத் தயாராக இருப்பதாகவும் அவர் கூறியதாக அந்த வட்டாரங்கள் தெரிவித்தன.

மேலிடக்குழு ஆலோசனை

இதையடுத்து, நேற்று மாலையில், காங்கிரஸ் தலைவர் சோனியா காந்தி, பிரதமர் இல்லத்துக்குச் சென்றார். சசிதரூர் விவகாரம் குறித்து பிரதமருடன் தனியாக ஆலோசனை நடத்தினார். பிறகு, இப்பிரச்சினையில் இறுதி முடிவு எடுப்பதற்காக, சோனியா தலைமையில் காங்கிரஸ் கட்சியின் மேலிடக்குழு கூட்டம் நடைபெற்றது.

இதில், பிரதமர் மன்மோகன்சிங், மத்திய நிதி மந்திரி பிரணாப் முகர்ஜி, ராணுவ மந்திரி ஏ.கே.அந்தோணி, மத்திய உள்துறை மந்திரி ப.சிதம்பரம், சோனியாவின் அரசியல் செயலாளர் அகமது படேல் ஆகியோர் கலந்து கொண்டனர். இக்கூட்டம், 2 மணி நேரம் நடைபெற்றது.

இந்தக் கூட்டத்தில், சசிதரூர் தவறு செய்திருப்பதாகவும், அவர் பதவி விலக வேண்டும் என்றும் பெரும்பாலான உறுப்பினர்கள் கருத்து தெரிவித்தனர். பெரும்பான்மையினரின் கருத்து என்பதால், அதை சோனியாவும் ஏற்றுக் கொண்டார். எனவே, சசிதரூர் பதவி விலக வேண்டும் என்று இக்கூட்டத்தில் முடிவு எடுக்கப்பட்டது.

பதவி விலகல்

கூட்டம் முடிவடைந்த நிலையில், தன்னைச் சந்திக்க வருமாறு சசிதரூருக்கு பிரதமர் மன்மோகன்சிங் அழைப்பு விடுத்தார். அதன்படி, நேற்று இரவு பிரதமரை சசிதரூர் சந்தித்தார். அப்போது, காங்கிரஸ் மேலிடக்குழு கூட்டத்தில் எடுக்கப்பட்ட முடிவை பிரதமர் எடுத்துக் கூறினார்.

மேலிடக்குழு முடிவுப்படி, மத்திய மந்திரி பதவியை ராஜினாமா செய்யுமாறு அவர் கேட்டுக்கொண்டார். பிரதமரின் கட்டளையை ஏற்று, சசிதரூர் தனது ராஜினாமா கடிதத்தை அவரிடம் சமர்ப்பித்தார்.

ஜனாதிபதிக்கு...

சசிதரூரின் ராஜினாமா கடிதத்தை பிரதமர் மன்மோகன்சிங் ஏற்றுக் கொண்டு அதை நேற்று இரவு ஜனாதிபதி மாளிகைக்கு அனுப்பி வைத்தார்.

சசிதரூரின் ராஜினாமா பற்றி இன்று (திங்கட்கிழமை) அதிகாரப்பூர்வமாக அறிவிக்கப்படும்.