அப்துல்கலாம் பிறந்தநாளை மாணவர் தினமாக அறிவிக்க வேண்டும்: நடிகர் விவேக்

அப்துல்கலாம் பிறந்தநாளான அக்டோபர் 15-ந் தேதியை மாணவர் தினமாக அறிவிக்க வேண்டும் என்று நடிகர் விவேக் பேட்டியளித்துள்ளார்.
நகைச்சுவை நடிகர் விவேக் சென்னையில் நேற்று மாலை நிருபர்களுக்கு பேட்டி அளித்தார். அவர் கூறியதாவது:-

"நான் 1987-ம் ஆண்டு `மனதில் உறுதிவேண்டும்' படத்தில் அறிமுகமாகி இன்றோடு 23 வருடங்கள் ஆகின்றன. எனக்கு கலைக்குடும்ப பின்னணியோ, ஏற்றிவிடுவதற்கு யாருமோ அல்லது தூக்கி விடுவதற்கு எந்த `காட்பாதர்'களோ இல்லை.

ஆனால், இந்த 23 வருடங்களாக பத்திரிகைகளும், பிற ஊடகங்களும் என்னை கைப்பிடித்து அழைத்து வந்திருக்கின்றன என்பது மறுக்க முடியாத உண்மை. என் நிறை குறைகளையும், விருப்பு வெறுப்பின்றி சுட்டிக்காட்டியிருக்கிறீர்கள்.

இது இவ்வாறு இருக்க, 6 மாதங்களுக்கு முன்னால் ஏற்பட்ட ஒரு பிரச்சினையில், நான் குறிப்பிட்ட ஒரு செய்தி குறித்தான கண்டனத்தை தெரிவித்தபோது, அது சிதறி எல்லோர் மீதும் தெளித்துவிட்டதை சற்று தாமதமாகவே உணர்ந்தேன். என் நலம் விரும்பிகள் பலர் என்னிடம் இதை தெரிவித்தபோது மிகுந்த வருத்தமடைந்தேன். அதன்பின்னரே என் தன்னிலை விளக்கத்தையும், வருத்தத்தையும், மன்னிப்பு கோரலையும் தெரிவித்தேன்.

சமீபத்தில் ஒரு டெலிவிஷன் நிகழ்ச்சியில் கூட நான் பேட்டி அளித்தபோது, நான் நன்றி சொல்ல விரும்புவதும், வருத்தத்தை தெரிவிக்க விரும்புவதும் பத்திரிகையாளர்களுக்குத்தான் என்று கூறினேன். இனி எக்காரணம் கொண்டும் யார் மனதும் புண்படும்படி பேசவோ, எழுதவோ, கருத்து தெரிவிக்கவோ கூடாது என்று முடிவு எடுத்திருக்கிறேன்.

அடுத்து நான் டி.பி.கஜேந்திரன் டைரக்ஷனில் நடித்த `மகனே என் மருமகனே' படம் விரைவில் திரைக்கு வர இருக்கிறது. அதையடுத்து `வாடா' என்ற படத்தில் மறைந்த நகைச்சுவை நடிகர் சுருளிராஜனை போல் நடித்துள்ளேன். `மாப்பிள்ளை' படத்தில் `சைல்டு சின்னா'வாகவும், `கந்தா' படத்தில் ரியல் எஸ்டேட் தங்கராசுவாகவும், `உத்தமபுத்திரன்' படத்தில் எமோசன் ஏகாம்பரமாகவும், `சிங்கம்' படத்தில் ஏட்டு எரிமலையாகவும், `பலே பாண்டியா'வில் பிரிட்டிஷ் வாலிபனாகவும், `பவானி' படத்தில் கிரிவலம் என்ற நேர்மையான போலீஸ் அதிகாரியாகவும் நடித்திருக்கிறேன்.

அடுத்து வரும் படங்களில் உலகத்தையே பயமுறுத்தி வரும் `வெப்ப மயமாதல்', `மழை இழப்பு', `வரம் இழப்பு', `நிலத்தடி நீர் பற்றாக்குறை', `அழிந்துவரும் விவசாயம்', `உழவர்களின் நிலை பற்றி' என் நகைச்சுவையில் கூற விரும்புகிறேன். அதற்கு ஆரம்பமாக திண்டுக்கல் காந்தி கிராமிய வேளாண் பல்கலைக்கழகத்தினர் ஏற்பாடு செய்திருந்த உழவர் மாநாட்டில் இயற்கை விஞ்ஞானம் பற்றி பேசிவிட்டு வந்திருக்கிறேன்.

தமிழர்களின் பெருமையாகவும், இந்தியாவின் நம்பிக்கை நட்சத்திரமாகவும், இளைஞர்களின் வழிகாட்டியாகவும், மாணவர்களுக்கு திசைகாட்டியாகவும் விளங்கும் முன்னாள் ஜனாதிபதி அப்துல்கலாம் பிறந்த தினமான அக்டோபர் 15-ந் தேதியை `மாணவர் தினமாக' அறிவிக்க வேண்டும்.
இவ்வாறு நடிகர் விவேக் கூறினார்.

நல்ல சிந்தனை உடைய நகைச்சுவை நாயகன்