செயற்கைகோளுடன் ராக்கெட் இன்று பறக்கிறது: 19 ஆண்டு உழைப்பு சாதனையாகிறது

இந்திய விண்வெளி ஆராய்ச்சி நிறுவனமான இஸ்ரோ தனது 40 ஆண்டு கால விண்வெளி ஆய்வுப் பணியில் இன்னொரு மைல்கல்லை இன்று (வியாழன்) எட்டுகிறது.

முற்றிலும் இந்தியாவிலேயே வடிவமைத்து உருவாக்கப்பட்ட கிரியோஜினிக் என்ஜின் பொருத்தப்பட்ட ஜி.எஸ்.எல்.வி-டி3 ராக்கெட்டில் ஜிசாட்-4 என்ற செயற்கைகோள் விண்ணில் செலுத்தப்படவுள்ளதுதான் இந்திய விண்வெளி ஆராய்ச்சி நிறுவனம் எட்டவுள்ள புதிய மைல்கல்லாகும்.

170 அடி நீளமும், 2220 கிலோ எடையும் கொண்ட இந்த ஜிசாட் செயற்கை கோள் இன்று பிற்பகலில் சென்னையை அடுத்துள்ள ஸ்ரீஹரிகோட்டாவில் அமைந்துள்ள சதீஷ்தவான் விண்வெளி மையத்தில் இருந்து விண்ணில் சீறிப்பாய உள்ளது.

இந்த செயற்கைகோளை சுமந்து செல்லும் ஜி.எஸ்.எல்.வி.-டி3 ராக்கெட் முற்றிலும் இந்தியாவிலேயே வடிவமைக்கப்பட்டு உருவாக்கப்பட்ட சி.யு.எஸ். எனப்படும் கிரியோஜினிக் அப்பர் ஸ்டேஜ் என்ற என்ஜின் பொருத்தப்பட்டு செலுத்தப்படவிருப்பது வரலாற்று சிறப்புமிக்கதாகக் கருதப்படுகிறது.

இதுநாள் வரையில் ராக்கெட்டுகளுக்கான கிரியோஜினிக் என்ஜின்கள் ரஷியாவில் இருந்து பெறப்பட்டு செயற்கைகோள்கள் அனுப்பப்பட்டு வந்தன. கடைசியாக இந்தியா விண்ணில் செலுத்திய இரண்டு ஜி.எஸ்.எல்.வி. ராக்கெட்டுகள் உட்பட 5 செயற்கை கோள்களும் ரஷிய கிரியோஜினிக் என் ஜின் பொருத்தப்பட்டே செலுத்தப்பட்டன.

ஜி.எஸ்.எல்.வி.-டி3 ராக்கெட் இஸ்ரோ அனுப்பும் 6-வது ஜி.எஸ்.எல்.வி. ராக்கெட்டாகும். இந்தியாவில் உருவாக்கப்பட்ட 3-வது ராக்கெட்டாகும். இதற்கு முன் அனுப்பப்பட்ட ஜி.எஸ்.எல்.வி.-டி3 ராக்கெட்களுக்கும் தற்போது உருவாக்கப்பட்டுள்ள ஜி. எஸ்.எல்.வி.-டி3 ராக் கெட்டிற்கும் பெரும் முன்னேற்றங்கள் இருப்பதாக இஸ்ரோ வட்டாரங்கள் தெரிவிக்கின்றன. இந்தியா விலேயே உருவாக்கப்பட்ட கிரியோஜினிக் அப்பர் ஸ்டேஜ் என்ஜினில் மேம்படுத்தப்பட்ட தொலைத் தொடர்பு மற்றும் கணினிகள் போன்றவை உள்ளன.

50 மீட்டர் உயரம் கொண்ட ஜி.எஸ்.எல்.வி. ராக்கெட் 416 டன் எடையை சுமந்து செல்லும் திறன் கொண்டதாகும். ரூ. 420 கோடி செலவில் உருவாக்கப்பட்டுள்ள இந்த ராக்கெட்டில் திடம், திரவம் மற்றும் கிரியோஜினிக் எனப்படும் மூன்று நிலைகள் உள்ளன. இதில் முதல் கட்டத்தில் உள்ள திட எந்திரம் உலகில் உள்ள பெரிய அளவிலான ராக்கெட் மோட்டார்களில் ஒன்றாகும். இது 138 டன் ஹைட்ராக்சில் டெர் மினேடட் பாலி- புடாடைன் என்னும் எரிபொருளைப் பயன்படுத்துகிறது. 2-வது கட்டத்தில் விகாஸ் எனப் படும் என்ஜின் பயன் படுத்தப்படுகிறது. இதற்கு யு.எச். 25 மற்றும் நைட்ர ஜன் டெட்ராக்சைட் என்னும் எரிபொருள் பயன்படுத்தப்படுகிறது.

3-வது கட்டம் மிகவும் முக்கியமான கட்டமாகும். இங்குதான் முற்றிலுமே இந் தியாவிலேயே வடிவமைக்கப்பட்டு உருவாக்கப்பட்ட கிரியோஜினிக் என்ஜின் பயன்படுத்தப்படுகிறது. இந்த என்ஜின் இயக்கத்திற்கு 125 டன் எரிபொருளை சுமந்து செல்லும். இதனை இயக்குவதற்கு திரவ ஹைட்ரஜன் எரிபொருளாகப் பயன்படுத்தப்படுகிறது.

இன்று விண்ணில் சீறிப்பாயவுள்ள ஜிசாட் 4 செயற்கைகோள் இஸ்ரோ உருவாக்கியுள்ள 19-வது மற்றும் ஜிசாட் வகையில் 4-வது செயற்கைகோளாகும் இதற்கு முன் 2001, 2003 மற்றும் 2004-ம் ஆண்டுகளில் ஜி.எஸ்.எல்.வி. ராக்கெட் மூலம் 3 ஜிசாட் செயற்கைகோள்கள் விண்ணில் செலுத்தப்பட்டுள்ளன.

இந்திய கிரியோஜினிக் என்ஜினுடன் ஜி.எஸ்.எல். வி.-டி3 ராக்கெட் ஜிசாட் 4 செயற்கைகோளை விண்வெளி வட்டப்பாதையில் நிலை நிறுத்தும் போது இந்திய விண்வெளி ஆய்வு திட்டத்தின் வரலாற்றில் ஒரு புதிய விடியல் ஏற்படும். கடந்த 25 ஆண்டுகளுக்கும் மேலாக இந்திய செயற்கை கோள்கள் நாட்டின் தொலைத்தொடர்பு, தொலைக்காட்சி ஒளிபரப்பு மற்றும் வானிலை ஆய்வு போன்றவற்றில் பெரும் புரட்சியை ஏற்படுத்தியுள்ளன.

சமீபத்தில் இஸ்ரோ செலுத்திய இன்சாட் மற்றும் ஜிசாட் செயற்கைகோள்கள் பூமியிலிருந்து 36 ஆயிரம் கிலோ மீட்டர் உயரத்தில் சுற்றி வந்து நாட்டின் சுகாதாரம் மற்றும் கல்வித்துறையில் பெரும் புரட்சியை ஏற்படுத்தியுள்ளன. இவை தவிர கிராமப்புற ஆதார மையங்கள் மூலமாக கிராமப்புற இந்தியாவின் ஒவ்வொரு வீட்டிற்கும் விண்வெளி தொழில் நுட்பத்தின் பயன்கள் சென்றடைந்துள்ளன. இந்த செயற்கை கோள்கள் நமது நாட்டின் தேசிய உள் கட்டமைப்புகளில் ஒருங்கிணைந்து காணப்படுகின்றன.

ஜி.எஸ்.எல்.வி.-டி3 ராக் கெட்டின் திட்ட இயக்குனர் ஜி. ரவிந்திரநாத் கடந்த வாரம் ஸ்ரீஹரிகோட்டா சதீஷ் தவான் விண்வெளி ஆய்வு மையத்தைப் பார்வையிட்ட பத்திரிகையாளர்களிடம் பேசுகையில் கிரியோஜினிக் என்ஜின் 19 ஆண்டுகள் கடும் போராட்டங்களை சந்தித்து உருவாக்கப்பட்டிருப்பதாக தெரிவித்தார்.

கிரியோ ஜினிக் என்ஜின் பொருத்தப்பட்ட ராக்கெட் விண்ணில் சீறிப்பாய்ந்து இந்த தொழில் நுட்பத்தைப் பயன்படுத்தும் நாடுகளின் பட்டியலில் இந்தியா இடம் பெறும்போது கடந்த 19 ஆண்டுகளாக விஞ்ஞானிகள் சந்தித்த போராட்டத்திற்கான சாதனை பயன் கிடைக்கும் என்பது உறுதி.

சுமார் 1022 வினாடிகளில் 36 ஆயிரம் கிலோ மீட்டர் உயரத்தில் பூமி வட்ட மாற்றுப் பாதையில் ஜிசாட் செயற்கை கோளை இந்த ராக்கெட் நிலை நிறுத்தும்.

ஜிசாட் செயற்கைக் கோளில் நவீன பேண்ட் டிரான்ஸ்பாண்டர்கள் வைக்கப்பட்டுள்ளன. இதன் மூலம் ஒட்டு மொத்த இந் தியாவையும் ஒரே நேரத்தில் படம் பிடிக்க முடியும்.

மேலும் துல்லியமான டி.டி.எச். சேவை, மேம்படுத்தப்பட்ட செல்போன், ஆன்- லைன் வர்த்தகம், அதி வேக இண்டர்நெட் சேவை கிடைக்கும். விமானங்கள் துல்லியமாக தரை இறங்கவும் ஜி-சாட் செயற்கைகோள் டிரான்ஸ்பாண்டர்கள் உதவும். 7 ஆண்டுகளுக்கு இந்த சேவையை நாம் பெற முடியும்.