உள்நாட்டில் தயாரான கிரையோஜெனிக் என்ஜினுடன் விண்ணில் பாய்ந்த ஜிஎஸ்எல்வி பாதை மாறியது!

பெங்களூர்: இந்தியாவிலேயே தயாரிக்கப்பட்ட க்ரையோஜெனிக் என்ஜின் பொருத்தப்பட்ட ஜிஎஸ்எல்வி- டி3 ராக்கெட் இன்று மாலை விண்ணில் ஏவப்பட்டது. ஆனால், ஏவப்பட்ட 500 வினாடிகளுக்குப் பின் அதனுடனான தொடர்பு துண்டிக்கப்பட்டுவிட்டது. இதனால் அது பாதை மாறிச் சென்றுவிட்டதாகத் தெரிகிறது.

ஸ்ரீஹரிகோட்டா விண்வெளித் தளத்திலிருந்து ஜிசாட்-4 செயற்கைக்கோளுடன் இந்த ராக்கெட் மாலை 4.27 மணிக்கு, திட்டமிட்டபடி விண்ணில் ஏவப்பட்டது.

ராக்கெட்டின் பாதையை இஸ்ரோ விஞ்ஞானிகள் கண்காணி்த்துக் கொண்டுள்ளனர். அது சுமந்து சென்றுள்ள ஜி சாட்-4 செயற்கைக் கோளை உரிய வட்டப் பாதையில் செலுத்தும் வரை ராக்கெட்டின் வெற்றி-தோல்வி குறித்து முடிவு சொல்ல முடியாது.

ஏவப்பட்ட 1,022 விநாடிகளில் 36,000 கிலோ மீட்டர் உயரத்தில், புவி வட்டப் பாதையில் ஜிசாட்-4 செயற்கைக்கோளை இந்த ராக்கெட் செலுத்த வேண்டும்.

இந்தியாவிலேயே தயாரிக்கப்பட்ட க்ரையோஜெனிக் என்ஜின் மூலம் இயங்கும் ஜி.எஸ்.எல்.வி. ராக்கெட் விண்ணில் செலுத்தப்பட்டது இதுவே முதல் முறையாகும்.

50 மீட்டர் உயரம், 416 டன் எடை கொண்ட இந்த ராக்கெட் மற்றும் செயற்கைக்கோள் ரூ. 420 கோடி செலவில் தயாரிக்கப்பட்டன.

ஜி.எஸ்.எல்.வி.-டி3 ராக்கெட் வெற்றிகரமாக ஏவப்பட்டால் மூலம் அமெரிக்கா, ரஷ்யா உள்ளிட்ட நாடுகளோடு க்ரையோஜெனிக் தொழில்நுட்பம் கொண்டுள்ள 6வது உலக நாடு என்ற பெருமையை இந்தியா பெறும்.

தகவல் தொடர்பு செயற்கைக்கோள்களை புவிசுற்று வட்டப்பாதையில் செலுத்துவதில் க்ரையோஜெனிக் என்ஜின் முக்கியப் பங்கை வகிக்கிறது என்பதால், இந்திய விண்வெளி ஆராய்ச்சி வரலாற்றில் இது ஒரு முக்கிய மைல் கல் ஆகும்.

இந்த ராக்கெட் ஏவப்படுவதற்கான 29 மணி நேர கவுண்ட்-டவுன் நேற்று காலை 11.27 மணிக்குத் தொடங்கியது.

ராக்கெட்டின் மொத்த பயண நேரமான 1022 விநாடிகளில், 720 விநாடிகள் க்ரையோஜெனிக் என்ஜின் மூலமே ராக்கெட் இயங்கும்.

இந்த ராக்கெட் ஏவும் 2,220 கிலோ எடை கொண்ட ஜிசாட்-4 செயற்கைக்கோளில், கே பேண்ட் டிரான்ஸ்பாண்டர், ஜி.பி.எஸ். தொழில்நுட்பத்துடன் கூடிய ககன் பேண்ட்கள் ஆகியவை இடம்பெற்றுள்ளன.

கே பேண்ட் டிரான்ஸ்பாண்டரில் உள்ள 8 பீம்களின் மூலம் ஒட்டுமொத்த இந்தியாவையும் ஒரே நேரத்தில் படம் பிடிக்கலாம். மேலும் இதன் மூலம் மேம்பட்ட டிஜிட்டல் சிக்னல்களை வழங்க முடியும்.

துல்லியமான டி.டி.எச். சேவை, செல்போன் சேவை, ஆன்லைன் வர்த்தகம், அதிவேக இன்டர்நெட், கூடுதல் ஏ.டி.எம். மையங்களை நிறுவுதல் போன்றவற்றுக்கு இந்த கே பேண்ட் டிரான்ஸ்பான்டர் உதவும்.

ஜி.பி.எஸ். தொழில்நுட்பத்துடன் உருவாக்கப்பட்டுள்ள ககன் பேண்ட்கள், விமானப் போக்குவரத்து சேவையை மேம்படுத்த உதவும். குறிப்பாக, விமானங்கள் துல்லியமாக தரையிறங்க இவை பயன்படும்.

இந்த ஜிசாட்-4 செயற்கைக்கோளின் ஆயுள்காலம் 7 ஆண்டுகள் ஆகும்.

அது என்ன க்ரையொஜெனிக் என்ஜின்?:

திட அல்லது திரவ எரிபொருள்களால் ஆன ராக்கெட்டுகளைத் தான் இதுவரை இந்தியா ஏவி வந்துள்ளது. இந்த ராக்கெட்டுகளால் செயற்கைக் கோள்களை சில நூறு கி.மீ. உயரம் வரை தான் ஏவ முடியும்.

இந்த செயற்கைக் கோள்களை ஆய்வுப் பணிக்குத் தான் பயன்படுத்த முடியுமே தவிர தகவல் தொடர்புக்கு பயன்படுத்த முடியாது.

பூமியில் இருந்து சுமார் 35,000 கி.மீ. உயரத்தில் செயற்கைக் கோளை ஏவினால் தான் அது தகவல் தொடர்புக்கு பயனுள்ளதாக இருக்கும்.

இவ்வளவு உயரத்தில் செயற்கைக் கோளை விண்ணில் ஏவ அதிக சக்தி வாய்ந்த ராக்கெட் தேவை. அதற்கு ராக்கெட்டில் பொறுத்த மிக சக்தி வாய்ந்த என்ஜின் தேவை.

இது தான் க்ரையோஜெனிக் என்ஜின். இது திரவ நிலையில் இருக்கும் ஹைட்ரஜன், ஆக்ஸிஜனை எரிபொருளாகக் கொணடு இயங்கும் என்ஜினாகும்.

இந்த என்ஜினை பல ஆண்டுகளுக்கு முன்பே ரஷ்யா நமக்கு வழங்க இருந்தது. ஆனால், இந்தியா அணு குண்டு சோதனை நடத்தியதால் அமெரிக்காவின் முயற்சியால் விதிக்கப்பட்ட தொழில்நுட்பத் தடைகள் இந்தியாவுக்கு இந்த தொழில்நுட்பம் கிடைப்பதை தடுத்துவிட்டது.

இதையடுத்து இதை இந்தியாவே உருவாக்கும் முயற்சிகளில் ஈடுபட்டு இதை உருவாக்கியது.

இந்த என்ஜினில் பயன்படுத்தப்படும் ஆக்ஸிஜன் -183 டிகிரி செல்சியசுக்கு குளிரூட்டப்பட்டு திரவ நிலையில் இருக்கும். அதே போல ஹைட்ரஜன் -253 டிகிரி குளிரூட்டப்பட வேண்டும் என்பது குறிப்பிடத்தக்கது.

வெப்பமடைவதைத் தவிர்க்க இந்த ஆக்ஸிஜன்-ஹைட்ரஜன் திரட எரிபொருள கலவையை ராக்கெட் ஏவப்படும் சில மணி நேரங்களுக்கு முன் தான் நிரப்ப வேண்டும். ராக்கெட் கிளம்புவதற்கு 30 நொடிகள் இருக்கும் வரை எரிபொருள் நிரப்பப்பட்டுக் கொண்டிருந்தது குறிப்பிடத்தக்கது.