பேசக்கூடாத வார்த்தைகளை உபயோகிக்கிறார் : முதன்மை கல்வி அலுவலர் மீது பெண் ஆசிரியர் புகார்

ராமநாதபுரம் : '' பேசக்கூடாத தகாத வார்த்தைகளை கூறி, தன்னை இழிவுபடுத்துவதாக,'' ராமநாதபுரம் முதன்மை கல்வி அலுவலர் பாலசுப்பிரமணியன் மீது பெண் ஆசிரியர் சாந்தி கலெக்டரிடம் புகார் செய்தார்.

ராமநாதபுரம் மாவட்டம் உச்சிப்புளி அரசு மேல்நிலைப்பள்ளியில் இடைநிலை ஆசிரியராக பணிபுரிபவர் சாந்தி. சமச்சீர் கல்வி புத்தகம் பணிக்காக தேர்வெழுதிய 1000 ஆசிரியர்களில் , இவர் மட்டுமே மாவட்டத்திலிருந்து தேர்வு செய்யப்பட்டார். இப்பணிக்காக 2009 நவ., 10ல் சென்னை சென்று, அங்குள்ள ஆசிரியர்கள் இல்லத்தில் தங்கி பணியாற்றி வந்தார். ஏழுமாத கர்ப்பினியாக இருந்த நிலையில், திடீர் உடல்நலக்கோளாறு ஏற்பட்டது. அதே மாதம் 20ல் அங்குள்ள தனியார் மருத்துவமனையில் அனுமதிக்கப்பட்டு, பணியிலிருந்து விடுவிக்கப்பட்டார். இதற்கிடையில் 2009 டிச., 24ல் குழந்தை பிறந்ததால், நேரில் வரமுடியாத நிலையில் போனில் தகவல் தெரிவித்து, மகப்பேறு விடுமுறை கேட்டுள்ளார். பின்னர் பள்ளியில் சேர வந்த போது, ''முதன்மை கல்வி அலுவலரும், அவரது உதவியாளரும், தான் சென்னை சென்றதை கொச்சைப்படுத்தி பேசி வருவதாக,'' கலெக்டரிடம் ஆசிரியர் சாந்தி நேற்று புகார் செய்தார்.

ஆசிரியர் சாந்தி கூறியதாவது: மாவட்டத்தில் நான் மட்டும் தேர்வாகி, அன்றைய முதன்மை கல்வி அலுவலர் ராஜேந்திரன் உத்தரவின்படி தான் சென்னை சென்றேன். அதற்கிடையில் புதிதாக பொறுப்பேற்ற முதன்மை கல்வி அலுவலர் பாலசுப்பிரமணியன், எனது வருகை பதிவேட்டில் 'ஆசிரியர் எங்கு சென்றுள்ளார்,' என , எழுதி வைத்துள்ளார். இது குறித்து கேட்க சென்ற போது, 'லாட்ஜில் தங்கி நீ ஊர் சுற்றியதற்கு , எங்களுக்கு 2000 ஆயிரம் ரூபாய்'பில்' வந்துள்ளது,' என, முதன்மை கல்வி அலுவலரும், அவரது உதவியாளரும் தகாத வார்த்தைகளில் பேசினர். பெண்ணிடம் பேசக்கூடாத வார்த்தையை அவர்கள் உபயோகித்து வருகின்றனர். இது தொடர்பாக கலெக்டரிமும், போலீசாரிடமும் புகார் செய்துள்ளேன், என்றார்.

முதன்மை கல்வி அலுவலர் பாலசுப்பிரமணியன் கூறியதாவது: இதற்கு முன்பு இதே ஆசிரியர் விழுப்புரம் பகுதியில் பல சர்ச்சைகளில் சிக்கி இங்கு வந்தவர். அவர் மீது நிறைய குறைகள் உள்ளன. அவரை மன்னித்து பணியில் சேர்த்தேன். வீணாக பொய்யான குற்றசாட்டுகளை பரப்பி வருகிறார். அவரது செயல் குறித்து கலெக்டரிடமும் விளக்கியுள்ளேன், என்றார்.

ம்ம்ம் ... சரி...