மூன்று பண்புகள் !!

குர்ஆனில் குறிப்பிடப்பட்டுள்ள மூன்று சிறந்த பண்புகளை கேளுங்கள். அவை உங்களிடம் இருக்கிறதா என சோதித்துக் கொள்ளுங்கள்.

* உறவை முறிப்பவர்களுடனும் உறவைத் தொடர்தல்

* ஏமாற்றுபவர்களுக்கும் உதவுதல்

* அநீதி இழைப்பவர்களை மன்னித்தல்.

இதில் மூன்றாவதான "மன்னித்தல்' மிக மிக சிறந்த பண்பு.

""நீங்கள் அவர்களுடைய செயல்களை சகித்து புறக்கணித்து விடுவீர்களானால்- மேலும் அவர்களை மன்னிப்பீர்களானால், திண்ணமாக இறைவன் பெரும் மன்னிப்பாளனாகவும், கருணைமிக்கவனாகவும் இருக்கின்றான்,'' என்கிறது குர்ஆன். இவ்வசனத்திலுள்ள "அவர்களுடைய' என்ற வார்த்தை எதிரிகளை மட்டும் குறிப்பிடவில்லை. மனைவி, மக்களையும் குறிக்கிறது. ஒரு மனிதனை அவனது மனைவி எதிர்க்கலாம். குழந்தைகள் புறக்கணிக்கலாம். அவர்களுடைய அச்செயலை பெரிதுபடுத்தாமல், யாரொருவன் மன்னிக்கிறானோ, அவன் செய்த தவறுகள் இறைவனின் சன்னிதானத்தில் மன்னிக்கப்படும். அவன் மீது இறைவனின் கருணைப் பார்வை விழும். மனைவியோ, குழந்தைகளோ, எதிரிகளோ நமக்கு எதிராக நடந்தால் அவர்களை தண்டிக்கும் சக்தி நமக்கு இருக்கலாம். ஆனால், ""(தண்டிக்கும்)சக்தி பெற்ற நிலையிலும் மன்னிப்பவரே இறைவனிடத்தில் கண்ணியத்திற்குரியவர்'' என்கிறது குர்ஆன். யாராயிருந்தாலும், அவர்கள் உங்களுக்கு எதிராகச் செய்த செயல்களை மன்னித்து மறந்து விடுங்கள்.

ஆறு கடமைகள்

""ஒரு முஸ்லிமுக்கு இன்னொரு முஸ்லிம் மீது ஆறு உரிமைகள் உள்ளன. அதாவது, ஒரு முஸ்லிமுக்கு மற்றொரு முஸ்லிம் ஆற்ற வேண்டிய கடமைகள் ஆறு உள்ளன,'' என்கிறார்கள் நபிகள் நாயகம் (ஸல்) அவர்கள்.

""அல்லாஹ்வின் தூதரே! அவையாவை?'' என கேட்கப்பட்டது. அதற்கு அண்ணலார் அவர்கள் பதிலளிக்கும் போது, ""நீர் உம் முஸ்லிம் சகோதரரை சந்திக்கும் போது, அவருக்கு ஸலாம் உரைப்பதும், அவர் உம்மை விருந்துக்கு அழைக்கும்போது அவ்வழைப்பை ஏற்றுக் கொள்வதும், அவருக்கு நீர் நலம் நாடிட (அறிவுரை கூறுதல்) வேண்டுமென்று அவர் விரும்பும்போது அவருக்கு நீர் நலம் நாடுவதும், அவருக்கு தும்மல் வந்து "அல்ஹம்துலில்லாஹ்' (எல்லாப்புகழும் அல்லாஹ்விற்கே உரியன) என்று அவர் கூறினால், அதற்கு நீர் பதில் கூறுவதும், அவர் நோயுற்று விட்டால் அவரை நலம் விசாரிப்பதும், அவர் இறந்து விட்டால் அவருடைய ஜனாஸாவுடன் செல்வதும் தான் அவருக்கு உம் மீதுள்ள உரிமைகளாகும். அதாவது, அவருக்கு நீர் ஆற்ற வேண்டிய கடமைகளாகும்,'' என்றார்கள். ஸலாம் உரைப்பது என்பது வெறுமனே "அஸ்ஸலாமு அலைக்கும்' என்னும் சொற்களை மட்டும் சொல்வதல்ல. "என் தரப்பிலிருந்து உம் உயிர், உடமை, மானம் ஆகிய அனைத்தும் பாதுகாப்பாக இருக்கின்றன. நான் எந்த வழியிலும் உமக்கு எந்த துன்பமும் இழைக்க மாட்டேன். உம் மீது அல்லாஹ் தனது கருணையைப் பொழிந்திட நான் பிரார்த்தனையும் செய்கின்றேன்' என்று வாக்குமூலம் அளிப்பது போலாகும். ஒருவர் தும்மலிடும்போது, அதைக் கேட்கும் ஒருவர் பதிலுக்கு "யர்ஹமுகல்லாஹ்' என்று கூற வேண்டும். இதற்கு, ""அல்லாஹ் உம் மீது கருணை பொழியட்டும்; மேலும், தனக்கு அடிபணியும் பாதையில் உம் பாதங்களை அல்லாஹ் உறுதியாக நிலைபெறச் செய்வானாக. மற்றவர் எள்ளி நகையாடிட வாய்ப்பளிக்கும் எந்த தவறும் உம்மிடம் நிகழாதிருக்குமாக!'' என்று அர்த்தமாகும். ஆக, அவரது நலத்தின் மீது அக்கறை கொள்ளும் வகையிலும், இந்த வார்த்தை சொல்லப்படுகிறது.

அருமையான் விளக்கம் இது .பண்புகளை சொல்லி எந்த நிலை நீ
கேட்டு தனி நிலை அறிய சொல்லும் நபி வழிமுறையை
அழகாய் இக் கட்டுரை மூலம் அறிய தந்தமைக்கு நன்றி தோழரே.

kalaimoon70 wrote:அருமையான் விளக்கம் இது .பண்புகளை சொல்லி எந்த நிலை நீ
கேட்டு தனி நிலை அறிய சொல்லும் நபி வழிமுறையை
அழகாய் இக் கட்டுரை மூலம் அறிய தந்தமைக்கு நன்றி தோழரே.