சமய ஒற்றுமைக்கு திருப்பரங்குன்றம்

**சிவா** · **சிவா** Mon 12 Apr 2010 - 4:16

தமிழ்நாட்டுக் கடவுள்களில் மூத்த கடவுள் முருகன். அழகு தமிழ்ப் பெயரில் குறிஞ்சி நிலக்கடவுளாக சங்க காலம் தொட்டு வணங்கப்பட்டு வருபவர்.

முருகன் வழிபாடு தொன்மையான நமது வாழ்க்கையோடு மிகவும் தொடர்புடையது. குன்றிருக்கும் இடமெல்லாம் குமரனிருக்கும் இடமாகப் போற்றப்படுகிறார். முருகனின் ஆறுபடை வீடுகளில் ஐந்து தளங்கள் மலைகளிலேயே அமைந்துள்ளன. இவற்றில் திருப்பரங்குன்றத்தில் வீற்றிருக்கும் குமரக்கடவுள் சிறப்புப் பெற்ற தெய்வமாக வணங்கப்படுகிறார்.

அழகு என்பதைக் குறிக்கும் முருகு என்ற தமிழ்ச் சொல்லிலிருந்து உருவானது தான் முருகன் என்ற பெயர். மணம், இளமை போன்ற வேறு அர்த்தங்களும் இப் பெயருக்கு உண்டு. மேலும், முருகன் சிவப்பு நிறம் கொண்டவர் என்பதால் சேயோன் என்றும் செவ்வேள் என்றும் அழைக்கப்படுகிறார். கந்தன் என்பதும் முருகன் தான். 'கந்த' என்பது 'ஆறு' என்பதைக் குறிக்கும். ஆறு உடல்களைக் கொண்டவர் என்பதால் இவ்வாறு கந்தன் என அழைக்கப்பட்டிருக்கலாம்.

தனது ஆயுதமாக 'வேல்' ஏந்தியுள்ளதால் வேலன், வேலவன் என்றும் அழைக்கப்படுகிறார். தமிழ் முறைப்படி வள்ளியை மணந்ததால் வள்ளிமணவாளன், சேவலைக் கொடியில் ஏந்தியுள்ளதால் சேவற் கொடியோன் மற்றும் கடம்பன் என்றும் விளங்கப்படுகிறார்.

வள்ளி தமிழ்க் குலப் பெண். குறவர் குலமகள். இவளது திருமணம் திருப்பரங்குன்றத்தில் நிகழ்ந்ததாக சங்க இலக்கியம் கூறுகிறது. மேலும் முருகன் - தெய்வயானை திருமணமும் இதே தலத்தில் நடந்ததாகப் புராணங்கள் கூறுகின்றன.

திருப்பரங்குன்றம் உயரமான ஒற்றை மலையைக் கொண்ட தலம். மதுரைக்குத் தெற்கே மூன்று மைல் தொலைவில் உள்ளது. தரை மட்டத்திலிருந்து சுமார் 1,600 அடி உயரத்தில் இந்த மலை அமைந்துள்ளது. இத் திருத்தலப் பெயர் பரிபாடலில் கூறப்படுகிறது.

இக் குன்றின் வடபகுதியில் குடவரைக் கோயிலாக அமைந்துள்ளது. சங்கப் புலவர் நக்கீரன் திரு முருகாற்றுப்படையில் குன்றக் கடவுள் பற்றி பாடியுள்ளார். கோயிலின் முன்புறம் பிரம்மாண்டமான முன் மண்டபம் அமைந்துள்ளது. சிற்பக்கலை மிளிரும் இம் மண்டபம் 48 தூண்களால் ஆனது. நாயக்கர் கால கலைப்படைப்பு இது எனலாம். ஆனால் குன்றைக் குடைந்து கொலுவீற்றிருக்கும் முருகன் கோயில் மிகவும் பழமையானது. நீண்ட உயரமான கோபுரம் நான்கு திசையிலும் ஓங்கி நின்று தரிசனம் தருகிறது.

இக்குன்றின் உச்சியில் முகமதியர் வழிபடும் பள்ளிவாசல் ஒன்றும் நீண்ட காலமாக உள்ளது. இதனால் சமய சகிப்புத்தன்மையின் இலக்காகவும் இத் தலம் விளங்குகிறது.