ஔவையார் பக்கம் - ஒளவையார் பற்றிய செவி வழி செய்திகளும் சுவாரஸ்ய தகவல்களும்

கலைவேந்தன் · கலைவேந்தன் Sun Apr 11, 2010 10:05 pm

First topic message reminder :

ஒரு சமயம், அரசனொருவன் புலவர்களை அழைத்து, நாளை அரசவையில் நாலுகோடிப் பாடல் சொல்ல வேண்டுமென பணித்தான். இந்தக் கட்டளை கேட்டு திக்கு முக்காடிப் போன புலவர்களில் ஒருவரை ஒளவையார் சந்திக்கிறார்.

கவலையை மறந்து விடுங்கள், நான் உங்களுக்கு நான்கு கோடிப் பாடல்களை ஒரு நொடியில் சொல்கிறேன் என பாடல்வரிகளை ஒளவையார் சொல்லி முடிக்கிறார்.

1.
மதியாதார் முற்றம் மதித்தொரு கால்சென்று
மிதியாமை கோடி பெறும்.

மதியாதவர் வாசலை மதித்து சென்று மிதிக்காமல் இருப்பது கோடிப் பொருளைத் தருவதாகும்.

2.
உண்ணீர் உண்ணீரென்று ஊட்டாதார் தம்மனையில்
உண்ணாமை கோடி பெறும்.

நம்மை அன்புடன் உபசரித்து உண்ணுங்கள் உண்ணுங்கள் என்று உணவிடாதோர் வீட்டில் சென்று உண்ணாமை கோடிப்பொருளைத் தரும்.

3.
கோடி கொடுப்பினும் குடிப்பிறந்தார் தம்முடனே
கூடுதலே கோடி பெறும்.

எத்தனை கோடிப்பணம் கொட்டிக்கொடுத்தாலும் தமக்குத்தகுதியற்றோருடன் கூடி வாழுதல் இல்லாமல் ஒத்த இயல்புடையோருடன் கூடிவாழுதல் கோடிப் பொருளைத் தரும்.

4.
கோடானு கோடி கொடுப்பினுந் தன்னுடைநாக்
கோடாமை கோடி பெறும்.

எத்தனை கோடிகள் கொட்டிக்கிடைத்தாலும் தம் நாவினை அடக்கி வாழுதுல கோடிப்பொருளைத்தரும்.

ஔவையாரைப்பற்றிய அறிந்த தகவல்களைப்பகிரும் இந்த திரியில் ஔவையாரின் பாடல்கள் சம்பவஙகளை பகிர்ந்துகொள்வோம் நண்பர்களே,,, [You must be registered and logged in to see this image.]

**M.Jagadeesan** · **M.Jagadeesan** Fri Nov 23, 2018 12:13 pm

ஒளவை உண்ட விருந்து :
=========================
பொதுவாகத் திருமண விருந்துகளில் , சோறுண்பது கடினமான செயலாகும் . ஒரே சமயத்தில் பலரும் முண்டியடித்து , பந்தியில் இடம் பிடிக்க ஓடுவர் . எல்லோரும் சாப்பிட்ட பிறகு , நாம் கடைசி பந்தியில் சாப்பிடலாம் என்று எண்ணினால் , கடைசி பந்தியில் சிலருக்கு பாயசம் கிடைக்காது ; சிலருக்கு அப்பளம் கிடைக்காது ; குழம்பு பற்றாக்குறை இருந்தால் , வெந்நீர் விட்டு விளாவி விடுவார்கள் . எனவேதான்

" பந்திக்கு முந்து ; படைக்கு பிந்து " என்ற பழமொழியும் ஏற்பட்டது .

ஒரு சமயம் ஒளவையாருக்குக் கடும்பசி ஏற்பட்டது . அப்போது பாண்டிய மன்னன் ஒருவனுடைய திருமணம் நடந்தது . நமக்கு இன்றைக்கு நல்ல சாப்பாடு கிடைக்கும் என்றெண்ணி ஒளவையார் அந்தத் திருமணத்திற்குச் சென்றார் . ஆனால் அங்கு நடந்ததோ வேறு . ஒரே கூட்டம் . பந்திக்கு உள்ளே செல்ல முடியவில்லை . ஒளவையைப் பிடித்து சிலர் நெருக்கினார்கள் ; சிலரோ , பிடித்துத் தள்ளினார்கள் ; இன்னும் சிலர் நெருக்கிய நெருக்கில் , ஒளவையின் உடல் , சுருங்கிவிட்டது . கடைசி வரையில் அவரால் சாப்பிடவே முடியவில்லை .

இந்த அனுபவத்தை ஒரு பாடலாகப் பாடினார் ஒளவையார் .

வண்டமிழைத் தேர்ந்த வழுதி கலியாணத்து
உண்ட பெருக்கம் உரைக்கக்கேள் - அண்டி
நெருக்குண்டேன் ; தள்ளுண்டேன் ; நீள்பசி யினாலே
சுருக்குண்டேன் சோறுண்டி லேன் .

என்று பாடுகிறார் .

" உண்டு " என்னும் துணைவினை , ஒளவைக்கு நகைச் சுவையாகப் பாட உதவி செய்திருக்கிறது . நெருக்குண்டும் , தள்ளுண்டும் , சுருக்குண்டும் துன்பப்பட்ட ஒளவைக்கு சோறுண்டு பசியாறக் கொடுத்து வைக்கவில்லை .

**T.N.Balasubramanian** · **T.N.Balasubramanian** Fri Nov 23, 2018 4:13 pm

அவருக்குண்டான அனுபவத்தை கூறிய ஒளவை, பாவம்.
உணவில்லாமை நமக்கொரு நகைச்சுவை பாடலை கொடுத்தது.
ரசித்தேன்.

ரமணியன்

**M.Jagadeesan** · **M.Jagadeesan** Sat Nov 24, 2018 6:36 am

குலோத்துங்க சோழன் முடிசூட்டு விழாவில் , எல்லா புலவர்களும் வரிசையாக நின்று அவனை வாழ்த்தினார்களாம் . ஒளவையாரின் முறை வந்தபோது

" வரப்புயர " என்று மட்டும் வாழ்த்திவிட்டு அமர்ந்துவிட்டாராம் . புலவர்களுக்கும் , அவையிலுள்ள மற்றவர்களுக்கும் ஒன்றும் விளங்கவில்லை .

உடனே ஒளவையார் எழுந்து ,

" வரப்புயர நீருயரும்
நீருயர நெல்லுயரும்
நெல்லுயர குடியுயரும்
குடியுயர கோலுயரும்
கோலுயர கோனுயரும் ! "

என்று பாடி முடித்தாராம் .

உழவுத் தொழிலின் இன்றியமையாமையை , அரசனுக்கு எவ்வளவு நுட்பமாக ஒளவையார் உணர்த்துகிறார் !

வேறு எந்தத் தொழிலையும் , பாடாத திருவள்ளுவர் , உழவுத் தொழிலை மட்டும் சிறப்பித்துப் பாடியது ஈண்டு நோக்கத்தக்கது .

Sponsored content · Sponsored content

ஔவையார் பக்கம் - ஒளவையார் பற்றிய செவி வழி செய்திகளும் சுவாரஸ்ய தகவல்களும்

ஔவையார் பக்கம் - ஒளவையார் பற்றிய செவி வழி செய்திகளும் சுவாரஸ்ய தகவல்களும்

Re: ஔவையார் பக்கம் - ஒளவையார் பற்றிய செவி வழி செய்திகளும் சுவாரஸ்ய தகவல்களும்

Re: ஔவையார் பக்கம் - ஒளவையார் பற்றிய செவி வழி செய்திகளும் சுவாரஸ்ய தகவல்களும்

Re: ஔவையார் பக்கம் - ஒளவையார் பற்றிய செவி வழி செய்திகளும் சுவாரஸ்ய தகவல்களும்

Re: ஔவையார் பக்கம் - ஒளவையார் பற்றிய செவி வழி செய்திகளும் சுவாரஸ்ய தகவல்களும்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக