மன்னிக்கும் மனப்பான்மையை வளர்த்துக் கொள்ளுங்கள்

எஸ்.அஸ்லி · எஸ்.அஸ்லி Sun 4 Apr 2010 - 16:16

இன்னும் நீங்கள் உங்கள் இறைவனின் மன்னிப்பைப் பெறுவதற்கும், சுவனபதியின் பக்கமும் விரைந்து செல்லுங்கள்;. அதன் (சுவனபதியின்) அகலம் வானங்கள், பூமியைப் போலுள்ளது. அது பயபக்தியுடையோருக்காகவே தயார் செய்து வைக்கப்பட்டுள்ளது. (பயபக்தியுடையோர் எத்தகையோர் என்றால்,) அவர்கள் இன்பமான (செல்வ) நிலையிலும், துன்பமான (ஏழ்மை) நிலையிலும் (இறைவனின் பாதையில்) செலவிடுவார்கள்; மனிதர்(கள் செய்யும் பிழை)களை மன்னிப்போராய் இருப்பார்கள்;. (இவ்வாறு அழகாக) நன்மை செய்வோரையே அல்லாஹ் நேசிக்கின்றான். (3:133-134)

எஸ்.அஸ்லி · எஸ்.அஸ்லி Sun 4 Apr 2010 - 16:17

சற்று நினைத்துப் பாருங்கள்! யாருடைய மனதையும் புண்படுத்தி விட முடியாத, மக்கள் அவரவர் எல்லைகளில் வாழக் கூடிய, எந்தவித இடையூறுகளுமற்றதொரு வாழ்க்கையை எண்ணிப் பாருங்கள்! அப்படிப்பட்டதொரு வாழ்க்கை இங்கே இருக்கின்றதா என்பதைப் பற்றியும் சற்று எண்ணிப்பாருங்கள்! இல்லை! அப்படிப்பட்டதொரு வாழ்க்கை இந்த உலகில் இல்லை! இந்த உலக வாழ்க்கையில் ஒரு முக்கிய அம்சமாக இருப்பது என்னவென்றால், பிறருடைய குறைகளையே தோண்டித் துருவி ஆராய்ந்து கொண்டிருப்பது, எந்தளவு நாம் பிறருடைய குறைகளைத் தோண்டித் துருவி ஆராய்ந்து கொண்டிருக்கின்றோமோ அந்தளவு பிறர் நம்முடைய குறைகளை ஆராய்ந்து கொண்டிருப்பார்கள் என்பதைப் பற்றி நாம் எண்ண மறந்து விடுகின்றோம். தான் சரியாக நடந்திருக்கின்ற பொழுது, தன்னை வலிந்து வந்து துன்புறுத்தியவர்களை மனிதர்கள் என்று மறக்காமல் நினைவிலேயே வைத்திருப்பார்கள். நாம் ஒவ்வொருவரும் பிறரது தவறுகளை வலிந்து சென்று, தாங்களாகவே முன்வந்து பிறரது தவறுகளை மன்னிக்கக் கூடியவர்களாகவும், நமக்கிடையே ஏற்படும் கருத்து வேறுபாடுகளின் பொழுது விட்டுக் கொடுத்து வாழவும் பழகிக் கொள்ள வேண்டும். மேலும் நம் அனைவரிடமும் ஆற்றல் இருக்கின்றது, அதைப் போலவே பலவீனங்களும் இருக்கின்றன மற்றும் அதன் காரணமாக நம் அனைவரிடமும் தவறுகளும் ஏற்படுகின்றன. எனவே நாம் ஒவ்வொருவரும் ஏதோ ஒரு வகையில் தவறு செய்யக் கூடியவர்களாகத் தான் இருக்கின்றோம். எனவே, நாம் அனைவரும் பிறரை மன்னித்து வாழக் கூடிய வாழ்க்கையைக் கைக்கொள்வதன் மூலம், சமுதாய ஒற்றுமையைக் காண முடியும். குறிப்பாக குடும்பத்தில் இதைக் கடைபிடிப்பதன் மூலம் அமைதியான குடும்ப வாழ்வைக் காண முடியும்.