சென்னை அணிக்கு மூன்றாவது வெற்றி !

சென்னை அணிக்கு 'ஹாட்ரிக்' வெற்றி : வீழ்ந்தது மும்பை அணி

சென்னை: ஐ.பி.எல்., தொடரில் தோனி தலைமையிலான சென்னை சூப்பர் கிங்ஸ் அணியின்

வெற்றிநடை தொடருகிறது. நேற்று இரவு நடந்த பரபரப்பான லீக் போட்டியில்
மும்பை இந்தியன்ஸ் அணியை 24 ரன்கள் வித்தியாசத்தில் வீழ்த்தியது.
உள்ளூரில் ஏற்கனவே பெங்களூரு, ராஜஸ்தான் அணிகளை வென்ற சென்னை அணி மீண்டும்
அசத்தி, 'ஹாட்ரிக்' வெற்றியை பதிவு செய்தது.

மூன்றாவது ஐ.பி.எல்., 'டுவென்டி-20' தொடர் இந்தியாவில் நடக்கிறது. நேற்று சென்னையில் நடந்த 37வது லீக் போட்டியில் சென்னை சூப்பர் கிங்ஸ், மும்பை இந்தியன்ஸ் அணிகள்
மோதின. 7 வெற்றிகளை பெற்ற மும்பை அணி அரையிறுதி வாய்ப்பை அனேகமாக உறுதி
செய்திருந்தது. சென்னை அணி கட்டாய வெற்றியை எதிர்நோக்கி களமிறங்கியது.

முரளிதரன் நீக்கம்: சென்னை அணியில் அனுபவ முரளிதரன், ஆல்பி மார்கல்,
அனிருதா ஸ்ரீகாந்த் நீக்கப்பட்டு, ரவிச்சந்திரன் அஷ்வின், துஷாரா, மைக்கேல் ஹசி இடம்
பெற்றனர். மும்பை அணியில் ஜாகிர் கானுக்கு பதிலாக அகமது வாய்ப்பு
பெற்றார். டாஸ் வென்ற கேப்டன் தோனி, பேட்டிங் தேர்வு செய்தார்.

துவக்கம் ஏமாற்றம்: சென்னை அணிக்கு துவக்கத்திலேயே அதிர்ச்சி காத்திருந்தது. கடந்த போட்டியில் அதிரடி சதம் கடந்த தமிழக வீரர் முரளி விஜய், இம்முறை ஹர்பஜன் சுழலில் 14
ரன்களுக்கு போல்டானார். பின் பிராவோ பந்தில் ஒரு இமாலய சிக்சர் அடித்த
ரெய்னா(23), அதற்கு அடுத்த பந்தில் அவுட்டானார். இதற்கு பின் தோனி
அதிரடியாக ஆடினார். மறுபக்கம் ஹைடன் அடக்கி வாசிக்க, ஸ்கோர் மெதுவாக
நகர்ந்தது.

போலார்டு மிரட்டல்: இந்த நேரத்தில் 14வது ஓவரை வீசிய போலார்டு இரட்டை
'அடி' கொடுத் தார். மும்பை அணிக்காக 'கோடிகள்' கொடுத்து வாங்கப்பட்ட இவர், தனது பணியை கச்சிதமாக செய்தார். 5வது பந்தை இவர் 'பவுன்சராக' வீச... அவசரப்பட்ட தோனி தூக்கி
அடிக்க, அதை போலார்டே 'லபக்' செய்ய, 31 ரன்களுக்கு வெளியேறினார். 6வது
பந்தில் ஹைடனும்(35) நடையை கட்ட, சிக்கல் ஏற்பட்டது.

நிதான ஆட்டம்: மைக்கேல் ஹசி, பத்ரிநாத் சேர்ந்து நிதானமாக ஆடினர். இவர்களால், கடைசி 5 ஓவரில் 41 ரன்கள் மட்டுமே எடுக்க முடிந்தது. மெக்லாரன் வீசிய கடைசி ஓவரில் பத்ரிநாத் 2
பவுண்டரி அடிக்க, சென்னை அணி 20 ஓவரில் 4 விக்கெட்டுக்கு 165 ரன்கள்
எடுத்தது. மைக்கேல் ஹசி(14), பத்ரிநாத்(30) அவுட் டாகாமல் இருந்தனர்.

விக்கெட் மடமட: எட்டக் கூடிய இலக்கை விரட்டிய மும்பை அணிக்கு சச்சின்,
சிகர் தவான் இணைந்து அசத்தல் துவக்கம் கொடுத் தனர். போலிஞ்சர் ஓவரில் 2
பவுண்டரி விளாசிய தவான்(16) அதிக நேரம் நீடிக்கவில்லை. 38 ரன்கள் எடுத்திருந்த நிலையில் சச்சின் 'ரிட்டையர்ட் ஹர்ட்' முறையில் வெளியேற, போட்டியில் திருப்புமுனை ஏற்பட்டது. இதற்கு பின் விக்கெட்டுகள் வரிசையாக சரிந்தன. ரெய்னா பந்தில் ராயுடு(3) வீழ்ந்தார். ஜகாதி சுழலில் சவுரப் திவாரி(14) சிக்கினார். முரளி விஜய்யின் சூப்பர் கேட்சில் போலார்டு(5)
வெளியேறி னார். சதிஷ்(4) ஏமாற்றி னார். மீண்டும் களமிறங்கிய சச்சின்(45) சாதிக்க முடியவில்லை. பின் ஹர்பஜன் அதிரடி காட்டிய போதும், அது வெற்றிக்கு உதவவில்லை. மும்பை இந்தியன்ஸ் அணி 20 ஓவரில் 9 விக்கெட்டுக்கு 141 ரன்கள் மட்டும் எடுத்து தோல்வி அடைந்தது.
அசத்தல் வெற்றி பெற்ற சென்னை அணி முதல் லீக் போட்டியில் மும்பை யிடம் சந்தித்த
தோல்விக்கு பழி தீர்த்தது. தவிர, அரை இறுதி வாய்ப்பையும் தக்கவைத்துக்
கொண்டது.

ரொம்ப 'ஹாட்': நேற்று இரவிலும் சென்னை கொதித்தது. வெப்பம் அதிகமாக இருந்ததால் மும்பை கேப்டன் சச்சின் பெரிதும் பாதிக்கப்பட்டார். உடலில் நீரின் அளவு குறைந்ததால்
சோர்ந்து போன இவர் 9வது ஓவர் முடிவில், 38 ரன்கள் எடுத்திருந்த போது
'ரிட்டையர்ட் ஹர்ட்' முறையில் பெவிலியன் திரும்பினார். இது சென்னை அணிக்கு
சாதகமாக அமைந்தது. பின் ஓய்வு எடுத்துக் கொண்ட இவர் மீண்டும்
களமிறங்கினார். அதற்குள் மும்பை விக்கெட்டுகள் சரிய, 'ரன் ரேட்' எகிறியது.
இறுதியில் 45 ரன்களுக்கு சச்சின் அவுட்டாக, சென்னை அணி 'சூடான' வெற்றி
பெற்றது.

சபாஷ் முரளி விஜய்: நேற்று சென்னை அணியின் 'பீல்டிங்' சூப்பராக இருந்தது. உதாரணமாக போட்டியின் 13வது ஓவரில் அஷ்வின் வீசிய பந்தை தூக்கி அடித்தார் மும்பை அணியின் போலார்டு. இதனை பிடிக்க தமிழக வீரர் முரளி விஜய், துஷாரா ஓடி வந்தனர். பந்து, துஷாரா
தலைக்கு மேலே சென்றது. அதனை சாமர்த்தியமாக 'கேட்ச்' பிடித்த முரளி விஜய்,
உள்ளூர் ரசிகர்களின் பாராட்டை பெற்றார்.