சாஃப்ட்வேர் இஞ்சினியர்களால் மோசமான தெப்பக்குளம்

ஸ்ரீ கிருஷ்ணன் · 13/11/2009

சாஃப்ட்வேர் இஞ்சினியர்களால் சமூகம் பல்வேறு அவலங்களை சந்தித்துள்ளது. லஞ்சம் வாங்கும் அரசியல்வாதிகள் ஆப்பீசர்கள், ஆயுதம் தாங்கிய கைக்கூலிகள், மக்களை ஏமாற்றும் மதபோதகர்கள், சாமியார்களுக்கு அடுத்தபடியாக சமூகத்தை சீரழிப்பது சாஃப்ட்வேர் எஞ்சினியர்கள்தான் என அண்மையில் அடிதடிக்குப்பின் மூடப்பட்ட சில கருத்துக் கணிப்புக்கள் சொல்லியிருக்கின்றன. இதைத் தொடர்ந்து சாஃப்ட்வேர் இஞ்சினியர்களால் தொடர்ந்து பாதிப்பில் உள்ளாகிவரும் சிலர் பதிவுலகிலும் பல உபயோகமான விவாதங்களில் ஈடுபட்டுள்ளனர். இனி வரப்போகும் நாட்களில் எத்தகைய பதிவுகளை எதிர்பார்க்கலாம் என யோசித்ததில்..

சாஃப்ட்வேர் எஞ்சினியர்களால்…

…எங்க ஊர் தெப்பக்குளம் மோசமாகிவிட்டது
எங்க ஊரில் அழகிய தெப்பக்குளம் ஒன்று இருந்துவந்தது. அதில் வழக்கம்போல அவ்வப்போது குளித்து வந்தோம் (நாங்கள் அவ்வப்போதுதான் குளிப்போம் – நகைச்சுவையில் தெரியும் மேட்டிமைத்தனம் இது – இதுவும் நகைச்சுவயாத்தான் சொல்றேன்-விளக்கம் போதுமடா தொடர்ந்து எழுது). எங்கள் ஊரில் படித்தவர்களெல்லாம் சாஃட்வேர் இஞ்சினியர்களாகிவிட்டதால் குளிப்பதற்கு யாருமில்லை. ஊருக்கு திரும்பி வரும் சா.இக்கள் வாட் நான்சென்ஸ் இதுலே குளிக்கிறதா? வெயர் ஈஸ் த ஸ்விம்மிங் பூல் எனச் சொல்லிவிடுவதால் தெப்பக்குளத்தில் யாரும் இப்போது குளிப்பதில்லை. எனவே அது மோசமாகிவிட்டது.

…கிளி ஜோசியம் வியாபாரம் சரிவு
மதுரையிலிருந்து சென்னை செல்லும் பாதையிலுள்ள லாட்ஜ் ஒன்றில் மூன்றாம் நம்பர் அறையில் பிரதி வியாழன் காலை 6மணி முதல் மாலை பார் மூடும் வரையில் ஜோஸ்யம் பார்க்கும் பெயர் வெளியிட விரும்பாத ஜோசியர் (கணிக்காமல்) சொன்னது,”முன்னாலெல்லாம் பசங்க படிச்சு முடிச்சதும் எங்ககிட்ட வந்து மலேரியா இன்ஸ்பெக்டர் ஆகலாமா, அல்லது சினிமா நடிக்கப் போலாமா, அல்லது போஸ்ட் மேன் ஆகலாமாண்ணு ஜோஸ்யம் பாப்பாங்க. இப்ப அதெல்லாம் இல்ல. இப்ப எல்லாவனும் இண்டர்நெட்லேயே ஜோஸ்யம் பாத்துக்கிறான்.”

…சைட் அடிப்பது குறைந்தது:பெண்கள் வருத்தம்
பல பெண்களின் தற்போதைய கவலை இதுவாகத்தான் இருக்கிறது. முன்பெல்லாம் இளைஞர்கள் ‘டே மச்சான் சைட் பாத்தியா?’ என எங்களை முன்வைத்து பேசிக்கொண்டிருந்தார்கள். இப்போதெல்லாம் ப்ளாக், மற்றும் இண்டர்நெட் சைட்களைப் பற்றி மட்டுமே பேசிக் கொண்டிருக்கிறார்கள். சைட் அடிப்பது சங்ககால வழக்கம். ஆனால் வெப்சைட் படிப்பது சங்கர் கால பழக்கம்தான் என கடிந்து கொண்டார்கள்.

…கழுதைகளுக்கு முதுகு வலி அதிகரிப்பு
சாஃப்ட்வேர் இஞ்சினியர்கள் பேச்சிலர்களாகத் தங்குவதால் அவர்களின் துணிகளை அடிக்கடி வெளுக்கப் போட்டு காசை விரையம் செய்கிறார்கள். இதனால் க்ழுதைகளின் பொதி அதிகமாகிவிட்டதாக சில கழுதைகள் சோகமாகச் சொல்லியுள்ளன. இது குறித்து சா.இ ஒருவரைக் கேட்டதற்கு ‘எந்தக் கழுத அப்படி சொன்னது?’. என்றார்.

…சாஃப்ட்வேர் துறை சீரழிகிறது.
சாஃப்ட்வேர் இஞ்ஜினியர்களால் அந்தத் துறையே சீரழியும் நிலையில் உள்ளது. இது குறித்த பெரும் கவலை இதுவரை சாஃப்ட்வேர் இஞ்சினியர்களை நம்பி காலம் தள்ளியவர்களுக்கு வந்துள்ளது. இது குறித்து Systems Hardwares Informatics Technology Solutions கம்பெனி மேனேஜர் ஒருவரைக் கேட்டபோது சாஃப்ட்வேர் துறையை சாஃப்ட்வேர் இஞ்சினியர் அல்லாது வேறு யாராலும் சீரழிக்க முடியாதே என வழக்கமான சா.இக்கே உரிய கேணத்தனமான பதிலைத் தந்தார்.