ஓடி விளையாடு பாட்டி

**சிவா** · **சிவா** Sun Apr 04, 2010 4:17 pm

ஓடி விளையாடு பாட்டி-- நீ
ஓய்ந்திருக்க லாகாது பாட்டி!

பேரனையும் பேத்தியையும் பாத்துக்கணும்
பேணிப்பேணி முறையாக வளர்க்கவேணும்
தலைசீவி பவுடர்பூசி பொட்டுவச்சி
சளைக்காம சீருடைய போட்டுவிட்டு

சிற்றுண்டி தருவதற்கு பாட்டிவருவா
சின்னப்பயல் ஓடிஓடி லூட்டிதருவான்!
செல்லமான கோபத்தோடு அதட்டினாலும்
செல்லக்குட்டி குழந்தைக்கு ஊட்டிவிடுவா!

மாலையிலே பள்ளிவிட்டு வந்தவுடனே
மனங்குளிர முத்தமிட பாட்டிவருவா!
பள்ளிப் பாடம் அத்தனையும் சொல்லித்தருவா
பாடங்களை அத்துப்படி ஆக்கிவிடுவா!

நிலாவைத்தான் காட்டிகாட்டி சோறுதருவா
நேர்த்தியான பொறுமையுடன் பாட்டியிருப்பா
நித்திரைக்குத் தாலாட்டுப் பாட்டுப்படிப்பா !
நித்தமுந்தான் இதைச்செய்தே வாழ்ந்துவருவா!

பாட்டிஎன்றால் குழந்தைகள் லூட்டியடிக்கும் !
பேரனுக்கும் பேத்திக்கும் பாட்டிபிடிக்கும்!

-- மதுரை பாபாராஜ்