கம்ப்யூட்டர் வசதியுடன் இயங்கும் நவீன தீயணைப்பு வாகனம்

அவனியாபுரம்: மதுரை விமான
நிலையத்திற்கு 3.8 கோடி ரூபாய் செலவில், கம்ப்யூட்டர் மயமான தீயணைப்பு
வண்டிகள் வாங்கப்பட்டுள்ளன. விமான நிலைய தீயணைப்பு நிலையம், 2006ல்
நவீனப்படுத்தப்பட்டது. பின், பல கோடி ரூபாயில் இருளில் ஒளிரும் விளக்குகள்,
இரும்புகளை அறுக்கும் நவீன கருவிகள் வந்தன. தற்போது தலா 3.8 கோடி ரூபாயில்
ஆஸ்திரியா நாட்டின் 'ரோஷன் பெர்'' கம்பெனியின் மூன்று தீயணைப்பு வாகனங்கள்
வாங்கப்பட்டுள்ளன. தீயணைப்பு வீரர்கள் மற்றும் விமானநிலைய மெக்கானிக்
பிரிவு ஊழியர்களுக்கு 'ரோஷன் பெர்' கம்பெனி மேலாளர் ரூடால்ப் மார்க், 10
நாட்கள் பயிற்சி அளித்தார்.
இந்த வாகனத்தில் 10 ஆயிரம் லிட்டர் தண்ணீர்
கொள்ளளவு உள்ளது. எண்ணெயால் ஏற்படும் விபத்துகளை கட்டுப்படுத்த உதவும்
நுரை, ரசாயனப் பொருட்களால் விபத்து ஏற்படும்போது, தேவைப்படும் 'டிரை
பவுடர்' வசதியும் இதில் உள்ளது. விமான விபத்து ஏற்பட்டால், இரும்புகளை
வெட்டி பயணிகளை மீட்க உதவும் அதிநவீன கருவிகள் உள்ளன. விமானம்
செல்லும்போது, அதிவேகமாக பின்தொடர்ந்து சென்று தண்ணீரை பீய்ச்சும் வசதி
உள்ளது. குளிரூட்டப்பட்ட இந்த வண்டியில் ஜி.பி.எஸ்., வசதியும் உள்ளது.
விமான
நிலைய இயக்குனர் சுதாகர், வாகனங்களை கொடியசைத்து துவக்கினார். நவீன
கருவிகள் பிரிவு உதவிபொதுமேலாளர் சுரேஷ்குமார், தமிழக அரசு தீயணைப்பு உதவி
இயக்குனர் சாகுல் ஹமீது, விமானநிலைய தீயணைப்பு முதுநிலை மேலாளர் ரத்தினம்,
அதிகாரிகள் பிரபாகரன், இளம்பருதி, தீயணைப்பு துறை மேலாளர் சின்னதம்பி
மற்றும் பலர் கலந்துகொண்டனர்.



நன்றி தினமலர்

தீயணைப்பு வாகனத்தில் அனைத்து வசதிகளும் உள்ளது ஆனால் அது வேகமாகச் சென்று தீயை அணைக்கத்தான் சாலை வசதிகள் இல்லை!