திருவலஞ்சுழி - விநாயகர் கோயில்

இது சுவாமி மலைக்கு அருகே இருக்கின்ற மிகப்பெரிய கோயில். மிகப்பழமையான கோயில். கும்பகோணத்திலிருந்து தஞ்சாவூர் செல்லும் பாதையில் சாலையோரத்தில் இந்தக் கோயில் அமைந்திருக்கிறது. காவிரி இங்கு பலமாகச் சுழித்துக் கொண்டு போவதால் இந்த ஊருக்கு திருவலஞ்சுழி என்று பெயர் வந்தது.

இது சிவன்கோயிலாக இருப்பினும் விநாயகருக்கு உரிய தலம். கோயிலுக்குள் நுழைந்தவுடனேயே ஒரு அடி உயரத்தில் விநாயகருக்கென்று ஒரு தனி சந்நிதி இருக்கும். அந்த விநாயகர் சந்நிதியைச் சுற்றி மிக அழகான கல் வேலைப்பாடுகள் செய்யப்பட்ட ஜன்னல்களும், அந்த ஜன்னல்களுக்கு அருகே அழகிய பெண் சிலைகளும் இருக்கும். இந்த வெள்ளை விநாயகர் மிக வரப்பிரசாதி. எந்த வேண்டுதலுமின்றி வெறுமே பார்த்து வழிபட்டால் போதும். உங்களுடைய ஆசைகள் பூர்த்தியாகும் என்று சொல்லப்படுகிறது.

மிகப் பழமையான இந்தக் கோவிலில் உள்ள சிவனுக்குப் பெயர் செஞ்சடைநாதர். தாயார் பெயர் பெரியநாயகி. அப்பரும், திருஞானசம்பந்தரும் இந்தத்தலம் பற்றி மிக அழகான பாடல்கள் இயற்றியுள்ளார்கள்.

இது சோழர்காலத்தில் மிகவும் கொண்டாடப்பட்ட கோவில். மாமன்னன் இராஜராஜனுக்கு இராஜேந்திர சோழன் என்கிற மகன் இருந்தான். குந்தவை என்கிற மகள் இருந்தாள். தன் தமக்கையின் பெயரையே தன் மகளுக்கும் இராஜராஜன் வைத்திருந்தான். குந்தவை என்கிற மகளைத் தவிர மாதேவடிகள் என்று இன்னொரு மகளும் இராஜராஜனுக்கு இருந்தாள் என்று இந்த ஊர் கல்வெட்டின் மூலம் தெரிய வருகிறது.

இந்த கோவிலுக்குள் இருக்கின்ற அஷ்டபுஜக்காளி மிகவும் சிறப்புவாய்ந்த ஒரு மூர்த்தி. மாங்கல்யம் நிலைக்க வேண்டும். குடும்பம் சிறப்புற செழிக்க வேண்டுமென்றும், எவராலும் தன் குடும்பத்திற்கு துன்பம் வரக்கூடாது என்றும் பெண்கள் இந்தக் காளியின் சந்நிதியில் நின்று அமைதியாக வேண்டிக் கொள்கிறார்கள். வெள்ளிக் கிழமைகளிலும், ஞாயிற்றுக் கிழமைகளிலும் மிகப் பெரிய கூட்டம் ஒன்று இந்தக் கோவிலின் காளியை தரிசிப்பதற்கென்று வரும்.

இந்தக் கோவிலில் உள்ள காலபைரவமூர்த்தி மிக உக்கிரமாக இருந்ததால் அந்த உக்கிரத்தை குறைக்க சிறிது பின்னப்படுத்தப்பட்டார் என்றும் சொல்லப்படுவதுண்டு.

நம்ம ஒரு பக்கம் உள்ள கோவில் நன்றி