400 போர் விமானங்கள் வாங்க கடற்படை திட்டம்

by **சிவா** Sun Jun 14, 2009 7:05 am

அரக்கோணம்: "நாட்டின் பாதுகாப்பு கருதி 400 போர் விமானங்கள் வாங்கப்படும்' என கடற்படை தளபதி சுதிர்பிள்ளை தெரிவித்தார். அரக்கோணம் கடற்படை விமான தளத்தில் ஹெலிகாப்டர் விமானிகளின் பயிற்சி நிறைவு விழா நடந்தது. இதில், கடற்படை தளபதி சுதிர் பிள்ளை கலந்துகொண்டு, பயிற்சி வீரர்களின் அணிவகுப்பு மரியாதையை ஏற்றுக் கொண்டார். பயிற்சி நிறைவு நாளில், சிறப்பாக செயல்புரிந்த ஏழு பேருக்கு பதக்கம் மற்றும் சான்றிதழ்கள் வழங்கப்பட்டன. பதக்கம் மற்றும் சான்றிதழ்கள் வழங்கிய பிறகு சுதிர் பிள்ளை நிருபர்களுக்கு பேட்டி அளித்தார். நாட்டின் பாதுகாப்பை கருதி 400 போர் விமானங்கள் பத்து ஆண்டுகளுக்குள் வாங்கப்படும். அமெரிக்கா மற்றும் வெளிநாடுகளிலிருந்து விமானங்கள் வாங்க முடிவு செய்துள்ளோம். இவ்வகை விமானங்கள் கடலில் உள்ள எதிரி நாட்டின் நீர்மூழ்கிக் கப்பலை துல்லியமாக கண்டறிந்து தாக்கும் வல்லமை படைத்தவை. ஒவ்வொரு போர்கப்பலுக்கும் அதிநவீன ஹெலிகாப்டர் வழங்கப்படும். புதியதாக வாங்கப்பட உள்ள போர் விமானம் அரக்கோணம் ஐ.என்.எஸ்.ராஜாளிக்கு கொண்டு வந்து பார்வைக்கு வைக்கப்படும். இவ்வாறு சுதிர் பிள்ளை தெரிவித்தார்.