பங்கு விலைகள் வீழ்ச்சி: பொருளாதாரம் வலுவாக இருக்கிறது - நஜிப்

அமெரிக்க வட்டார நிதிச் சந்தைகளில் காணப்பட்ட தடுமாற்றம் உள்நாட்டுப் பங்குச் சந்தையில் இன்று பிரதிபலித்தது. பங்கு விலைகள் 2.5 விழுக்காடு சரிந்தன. அதைத் தொடர்ந்து பொருளாதாரம் வலுவாக இருப்பதாக அரசாங்கம் உடனடியாக முதலீட்டாளர்களுக்கு வாக்குறுதி அளித்தது.



மலேசியாவின் பொருளாதார அடிப்படை வலுவாக உள்ளது. அமெரிக்கப் பொருளாதாரத்திலும் அனைத்துலக நிதிச் சந்தைகளிலும் ஏற்பட்டுள்ள நிலைத்தன்மை சீர்குலைவுத் தாக்கங்களை அது சமாளிக்க முடியும் என்று நிதி அமைச்சர் நஜிப் அப்துல் ரசாக் கூறினார்.

கோலாலம்பூர் பங்குச் சந்தை இவ்வாண்டு மட்டும் 29 விழுக்காடு சரிந்துள்ளது.

எனினும் காலையில் வீழ்ச்சி கண்ட அது இன்றைய பரிவர்த்தனை இறுதியில் 1,018.68 ஆக மாற்றமின்றி முடிந்தது.

மலேசிய பொருளகத்துறை உறுதியாகவும் வலுவாகவும் திகழ்வதாக நஜிப் தெரிவித்தார். “நிதித் துறையில் போதுமான பணப் புழக்கமும் உள்ளது.”

“தனியார் துறைக்கு நிதி அளிக்கும் நடவடிக்கை ஆகஸ்ட் மாதம் 13 விழுக்காடு விரிவடைந்தது.”

“வராத கடன்களின் அளவு இப்போது 2.5 விழுக்காடாக இருந்து வருகிறது. 2003 ம் ஆண்டு தொடக்கம் அந்த அலவு படிப்படியாக குறைந்து வருகிறது.”

அமெரிக்க நிதித்துறையைக் காப்பாற்றுவதற்கு தயாரிக்கப்பட்ட 700 பில்லியன் டாலர் மீட்புத் திட்டத்தை அமெரிக்க மக்களவை நிராகரித்ததும் நியூயார்க் பங்குச் சந்தை 777.68 அல்லது 6.98 விழுக்காடு சரிந்தது. அதனால் முக்கிய ஆசிய பங்குச் சந்தைகள் வீழ்ச்சியை எதிர்நோக்கின.

மலேசியா பல்வகைப்படுத்தப்பட்ட பொருளாதாரமாகும் என்று குறிப்பிட்ட நஜிப் அது ஆசியாவுடன் வலுவான பிணைப்புக்களைக் கொண்டுள்ளது என்றார்.

“அதனால் நாடு சவால் மிக்க நடப்பு சூழ்நிலையை எதிர்கொண்டு சமாளிக்கும் ஆற்றலைப் பெற்றுள்ளது”, என்று அவர் மேலும் கூறினார்.

ஆனால், அமெரிக்கா மலேசியாவின் ஏற்றுமதி இலக்குகளில் ஒன்றாகும். அமெரிக்கப் பொருளாதார நலிவு உள்நாட்டு மின்சார மின்னியல் பொருட்களுக்கான தேவையை குறைத்து விடும்.

பொருளாதாரத்தை சீர்குலைக்க வேண்டாம் : நஜிப் அன்வாருக்கு எச்சரிக்கை

நாட்டின் உறுதியற்ற அரசியல் சூழ்நிலை முதலீட்டாளர்களை ஓரம் கட்டி விடும் என்று ஆய்வாளர்கள் கவலைப்படுவதை நஜிப் நிராகரித்தார்.

“நமது அரசியல் நிலைமையில் என்ன உறுதியற்றதாக உள்ளது? (ஆளும்)பாரிசான் நேசனல் தொடர்ந்து ஆட்சி புரிந்து வருகிறது”, என்றார் அவர்.

கடந்த மார்ச் தேர்தலில் எதிர்க்கட்சிகள் நாடாளுமன்றத்தில் மூன்றில் ஒரு பங்கு இடங்களைக் கைப்பற்றின. அடுத்த சில வாரங்களுக்குள் அரசாங்கத்தை வீழ்த்தப் போவதாக மாற்றசுக் கட்சித் தலைவர் அன்வார் இப்ராஹிம் வாக்குறுதி அளித்துள்ளார். இதனால் மலேசியப் பங்குச் சந்தையில் முதலீட்டாளர்கள் நிலைதடுமாறியுள்ளனர்.

ஆனால் நாட்டின் பொருளாதார நிலைத்தன்மையை சீர்குலைக்க வேண்டாம் என்று நஜிப் எதிர்த்தரப்புக்கு மறைமுகமாக எச்சரிக்கை விடுத்துள்ளார்.

“அரசியல் நாடகங்களுக்கும் விளையாட்டுக்களுக்கும் ஊகங்களுக்கும் இது நேரமல்ல. நாட்டு நலனையும் மக்கள் நலனையும் பாதுகாப்பதற்கு எந்த ஒரு நிலைமையையும் சமாளிப்பதற்கு அரசாங்கம் விரைவாகவும் பொறுப்புடனும் நடவடிக்கை எடுக்கும்”, என்று அவர் சொன்னார்