சீனாவில் இடம்பெற்ற ஆர்ப்பாட்டமொன்றில் 140 பேர் பரிதாபமாக பலி :

சீனாவின் மேற்கு பிரதேசமான ஸின்ஜியாங்கில் இடம்பெற்ற ஆர்ப்பாட்டமொன்று வன்முறையாக வெடித்ததில் சுமார் 140க்கும் மேற்பட்டவர்கள் கொல்லப்பட்டும், 800க்கும் மேற்பட்டவர்கள் காயமடைந்தும் உள்ளதாகத் தெரிவிக்கப்படுகிறது.

இந்த வன்முறைகளுடன் தொடர்புடைய நபர்களை உரும்க்யூ நகர காவல்துறையினர் கைது செய்துள்ளதாகத் தெரிவிக்கப்படுகிறது.

யூகுராஸ் இனத்தவர்கள் காட்டு மிராண்டித் தனமாக நடந்து கொண்டதாக சீன அரசாங்கம் அறிவித்துள்ள அதேவேளை, யூகுராஸ் மக்கள் மீது காவல்துறையினர் கண்மூடித்தனமான தாக்குதல்களை நடத்தியதாக மக்கள் கூட்டத்தின் தலைவர் ஒருவர் தெரிவித்துள்ளார்.

கடந்த மாதம் முதுல் இரு இன சமூகங்களுக்கு இடையில் கருத்து முரண்பாடு நிலவி வந்ததாகத் தெரிவிக்கப்படுகிறது.

1989ம் ஆண்டு தியனமென் சதுக்க போராட்டத்தின் பின்னர் இடம்பெற்ற மிக மோசமான ஆர்ப்பாட்ட வன்முறை இதுவென சம்பவத்தை நேரில் ஊடகவியலாளர்கள் குறிப்பிட்டுள்ளனர்.

ஆர்ப்பாட்டத்தில் ஈடுபட்டவர்கள் ஆயுதங்களை கொண்டு வாகனங்கள் உள்ளிட்ட சொத்துக்களுக்கு சேதம் விளைவித்ததாக சீன காவல்துறையினர் குற்றம் சுமத்துகின்றனர்.

260க்கும் மேற்பட்ட வாகனங்கள் தாக்கி அழிக்கப்பட்டுள்ளதுடன், 200க்கும் மேற்பட்ட கடைகள் காரியாலங்கள் சேதப்படுத்தப்பட்டுள்ளதாகத் தெரிவிக்கப்படுகிறது.

ஆர்ப்பாட்டப் பேரணி மிகவும் அமைதியான முறையிலேயே ஆரம்பிக்கப்பட்டதாகவும் வன்முறைகளில் மக்கள் உயிரிழந்துள்ளமை அதிர்ச்சியளிப்பதாகவும் சம்பவத்தை முதலில் நேரில் பார்த்தவர் ஒருவர் தகவல் வெளியிட்டுள்ளார்.

அரச பயங்கரவாதத்தின் காரணமாக இந்த அமைதியான போராட்டம் ஆயுத வன்முறையாக வெடித்ததாக யூகுராஸ் இனத்தவர்கள் தெரிவித்துள்ளனர்.

உயிரிழந்தவர்களின் எண்ணிக்கை 600 ஆக உயர்வடைந்துள்ளதாகவும், அரசாங்க தகவல்கள் குறைந்தளவு உயிரிழப்பு விபரங்களையே ஊடகங்களுக்கு வெளியிட்டு வருவதாகவும் யூகுராஸ் இனத் தலைவர் ஒருவர் குறிப்பிட்டுள்ளார்.

உலக யூகுராஸ் காங்கிரஸின் தலைவர் ரபியா கதீரே இந்த வன்முறைகளுக்கு காரணம் என சீன அரசாங்கம் குற்றம் சுமத்தியுள்ளது.

யூகுராஸ் இனத்தவர்கள் மீது நடத்தப்பட்ட இந்த மிலேச்சத்தனமான தாக்குதல்களை உலக சமூகம் வன்மையாகக் கண்டிக்க வேண்டுமென அந்த அமைப்பு கோரிக்கை விடுத்துள்ளது.