பேரா கமுந்திங்கில் கலவர பீதி தொடர்கிறது

48 மணி நேரத்துக்குப் பின்னரும் கமுந்திங்கில் பீதி தொடர்கிறது

கடந்த திங்களன்று, பேரா கமுந்திங்கில், குண்டர் கும்பல் மோதலொன்று, இன பதற்றமாக வெடித்ததில், 16பேர் மருத்துவமனையில் சேர்க்கப்பட்டனர்; அவர்களில் இருவர் தீவிர கவனிப்பு சிகிச்சை பிரிவில் சேர்க்கப்பட்டுள்ளனர்.நிலைமை இயல்பு நிலைக்குத் திரும்பியுள்ளதாக லாருட் மாத்தாங் மாவட்டப் போலீஸ் தலைவர் ராஜா மூசா ராஜா ரசாக் கூறும் வேளையில், மலேசியாகினியும் தமிழ்ப் பத்திரிகையைச் சேர்ந்த இரு நிருபர்களும் நடத்திய ஆய்வில், நிலைமை அவ்வாறாக இல்லை என்று தெரிய வந்துள்ளது.

உள்ளூர் மக்கள் பீதியில் உள்ளனர். அதோடு வெளியாரை சந்தேகத்துடனும் பார்க்கின்றனர்.

மோதல் நிகழ்ந்த இடமான சைபர் கேபேக்கான பாதையை காட்டும்படி உள்ளூர்வாசிகளை கேட்டுக் கொள்வதில் அந்த மூன்று பத்திரிகையாளர்களுக்கும் பெரும்பாடாகி விட்டது.

ஒரு வழியாக அந்த இடத்தை சென்றடைந்த போது, அப்பகுதி (சைபர்கேபே) பூட்டப்பட்டிருந்ததாக அவர்கள் கூறினர். அதே வேளை நடைபாதையில் காய்ந்த இரத்தக் கறைகளை கண்டதாகவும் தெரிவித்தனர்.

கடந்த திங்கள் இரவு, மோட்டார் சைக்கிள் பாகங்கள் திருடு போனது தொடர்பான சர்ச்சையில், கேப்பேயின் முன்புறம் அந்த கும்பல்கள் மோதிக் கொண்டன. பின்னர் நிகழ்ந்த பழிவாங்கும் செயலில், ஏதுமறியா மக்களும் தாக்கப்பட்டனர்.

இதனிடையே, தாக்குதலில் பாதிக்கப்பட்ட எழுவர், கடுமையான போலீஸ் பாதுகாப்புடன் தைப்பிங் மருத்துவமையில் இன்னும் சிகிச்சை பெற்று வருகின்றனர்.

தீவிர கவனிப்பு சிகிச்சை பிரிவு உட்பட், நான்கு வார்டுகள் ஒவ்வொன்றுக்கும் தலா இரு போலீசார் நிறுத்தி வைக்கப்பட்டுள்ளனர்.

வார்ட் 14கின் நுழைவாயிலுக்கு வெளியே மின்னற்படை ஜீப்பொன்று நிறுத்தி வைக்கப்பட்டுள்ளது.

கமுந்திங்கில் போலீஸ் சாலைத் தடுப்புகள் இப்போதைக்கு நீடிக்கும் என்றும் ராஜா மூசா கூறினார்.

அப்பகுதியில், பொது மக்களின் பாதுகாப்பை போலீசார் உறுதி செய்வர் என்றாரவர்.

மருத்துவமனையில் சேர்க்கப்பட்ட 16 பேர் கட்டம் கட்டமாக வீடு திரும்பியுள்ளனர்.

தற்போது எழுவர் மட்டும் உள்ளனர். இருவர் தீவிர கவனிப்பு சிகிச்சை பிரிவிலும், ஒருவர் வார்ட் D1 னிலும், எஞ்சியோர் வார்ட் 14 கிலும் உள்ளனர்.

தவறான இடம், தவறான நேரம்

மருத்துவமனைக்கு மேற்கொள்ளப்பட்ட வருகையின்போது, ஏதுமறியா இரண்டு இளைஞர்கள், தவறான இடத்தில், தவறான நேரத்தில் மாட்டிக் கொண்டதாக தெரிய வந்தது.

வார்ட் 14ல், தமது மகன் ஷாரொல் ரிட்சுவான் ரசாக், வயது 20 எவ்வாறு தாக்கப்பட்டார் என்பதை சாம்சியா மாட் நோர் விவரித்தார்.

பஸ் நிறுவனமொன்றில் பணியாற்றும் ஷாரொலுக்கு வலது கரம் முறிந்து போய் உள்ளது. தொண்டை வலியால் அவரால் பேசவும் முடியவில்லை.

கடந்த திங்களன்று இரவு மணி எட்டரை அளவில், தனது மகன், அந்த சைபர் கேபே சென்றதாக, எட்டு குழந்தைகளுக்குத் தாயான அவர் தெரிவித்தார்.

“அந்த கேபேயின் முன்புறம் தமது மோட்டார் சைக்கிளை நிறுத்தி வைத்து விட்டு, அதனுள் நுழைய முற்பட்டபோது ஆயுதமேந்திய கும்பலால் தாக்கப்பட்டார். தனது கழுத்துப் பகுதியில் தாக்கப்படுவதை தவிர்ப்பதற்கு வலது கையால் மறைத்தபோது, அவருக்கு கையில் முறிவு ஏற்பட்டது.”

” எனது மகன், அந்த கேபெக்குள் ஓட முற்பட்டபோது, அந்த கும்பலால் விரட்டி அடிக்கப்பட்டு, மீண்டும் தாக்கப்பட்டார். அதனால் அவர் வெளியே ஓட வேண்டியிருந்தது. பின்னர் போலீசார் அவரை மருத்துவமனைக்குக் கொண்டு சென்றனர்.”

இவ்வேளையில் வார்ட் டி 1ல் உள்ள, எஸ்எம் தாமான் தாசெக்கைச் சேர்ந்த நான்காம் படிவக் மாணவன் மொகமட் ஃபாடில், வயது 16, அந்த சைபர்கேபேயில், இரவு 8 அளவில் வீடியோ விளையாட்டுகளை விளையாடிக் கொண்டிருந்தபோது, ஐவரடங்கிய ஆயுதமேந்திய கும்பல் திடீரென அங்கு நுழைந்து எல்லாரையும் தாக்கியது.

ஐசியுவில் உள்ள இருவரில் ஒருவர், தலையிலும் உடலிலும் தாக்கப்பட்ட 16 வயது பள்ளி மாணவன் ஒருவன்.

ஐசியுவில் உள்ள மற்றொருவர், நிர்வாக அதிகாரி ஸ்டிவன் ரோய், வயது 33.

அவர்கள் இருவரின் நிலைமை கடுமையாக உள்ளதென கூறப்படுகிறது.

மலேசியாஇன்று

என்ன நடக்குது மாலேசியாவில்!!!!!!!!!!!!!
தமிழருக்குன்னு ஒரு நாடு இருந்தா இது எல்லாம் நடக்குமா?

அடப்பாவீங்களா , மலேசியாவிலேயும் ஆரம்பிச்சுடாங்களா ??

ஆஹா மிகவும் அ௫மையான தகவல்

மு௫கனடிமை wrote:ஆஹா மிகவும் அ௫மையான தகவல்

இதுல கைகொட்டி சிரிக்குற அளவுக்கு என்ன அருமையான தகவல் இருக்கு முருகனடிமை ?????????????????