காயகல்பம்

by seethamani Fri Jun 12, 2009 12:23 am

First topic message reminder :

உடல் மற்றும் மனநலனுக்கு முக்கிய பொருளான விந்து நாதங்களின் பெருமையையும் - கற்பு நெறியின் மேன்மையினையும் மனித குலம் உணர வேண்டும். விந்து நாதத்தை இன்பத்துக்குரியதோர் சாதனமாக மட்டும் இன்றைய மனிதர்கள் கருதுகிறார்கள். நோயற்ற உடலுக்கும் தெளிந்த அறிவு மேன்மைக்கும் விந்து நாதந்தான் ஆதாரம். மேலும் குடும்ப வாழ்வில் ஆண், பெண் உறவில் ஒரு இனிமையையும் ஆழமான நட்பையும் அமைதியையும் மகிழ்வையும் கொடுப்பதுமாகும். எனவே அவற்றைப் புனித பொருட்களாகக் கருதி, அவற்றின் தூய்மையைப் பராமரித்து அவற்றுக்கு மேன்மையளிக்க வேண்டும். அதற்கு உதவுவதுதான் காயகல்பக்கலை.

உடல் நலமும் மனவளமும்தான் வாழ்வில் வெற்றியையும் அமைதியையும் நிறைவையும் அளிக்குமென்றால் அதற்கு முக்கியமான ஆதாரம் உயிர் ஆற்றலே அதை நாம் காயகல்பத்தால் பெறலாம். மேலும் இளவயதிலேயே ஆண், பெண் இருவரும் காயகல்பப் பயிற்சி எடுத்துக் கொண்டு வந்தால் விந்து நாதத்தில் உள்ள குறைகள் அகன்று விந்து நாதம் சுத்தப்படும். அவர்கள் திருமணம் செய்து கொண்டால் அவர்களுக்குப் பிறக்கும் குழந்தை உடல் நலம் மனவளம் மிக்கதாகவும் அறிவுக்கூர்மையுடையதாகவும், ஆன்மீக எண்ணம் கொண்டதாகவும் இருக்கும். இதைத்தான் கருவிலே திருவுடைய குழந்தை ஆதல் என்பார்கள்.

ஆயகலை கள்மொத்தம் கணக்கெ டுத்தோர்
அறுபத்தி நாலு என்றார் அனைத்தும் கற்றும்
காயகற்ப மெனும் கலையைக் கற்கா விட்டால்
கற்றதெல்லாம் மண்புக்கும் உடல் விழுந்தால்
மாயமெனும் காந்தம உயிர் வித்து மூன்றில்
மறைந்துள்ள இரகசியங்கள் விளங்கி வாழ்ந்தால்
தீயவினைகள் கழிய உலகுக்கென்றும்
தெளிவான அருள் ஒளியாய் நிலைக்கும் ஆன்மா.

– வேதாத்திரி மகரிஷி அவர்கள்

நீங்கள் இந்த அற்புதமான கலையை முறையாகப் பயின்றால் வல்லுடலும், நல்லறிவும், பொருள் வளமும், நற்புகழும் ஓங்கிச் சிறப்பாகவும், அமைதியாகவும் வாழ முடியும்.

by seethamani Tue Jun 23, 2009 3:32 am

‘காயகல்பம் தேடி நெஞ்சு புண்ணாவதல்லால்’ என்று தாயுமானவர் பாடியிருக்கிறார். மருந்து, இலேகியம் இதை எல்லாம் சாப்பிட்டு காயகல்பம் அடைய முயற்சித்தார்கள். அது ஓரளவுக்கு உடலைச் சுத்தம் செய்வதால் அதற்குக் காயகல்பம் என்று பெயரைக் கொடுத்தார்களே தவிர வெறொன்றுமில்லை.

“காயம்” என்றால் உடல். “கல்பம்” என்றால் உறுதியாக வைத்துக் கொள்வது. காயகல்பம் என்பது தனிக்கலை. நரம்புகளை முறுக்கேற்றி, நீர்த்துப் போன விந்துவைக் கெட்டிப்படுத்தி, தூய்மை செய்து, அதை உடலில் சுவர விட்டு, உடலில் உள்ள எல்லா செல்களிலும் சீவகாந்தத் திணிவை அதிகரிக்கச் செய்து, நோயின்றி உடலைப் பாதுகாத்து, முதுமையைத் தள்ளிப் போட்டு, இளமை நீடிக்கச் செய்து, ஆயுளை விருத்தி செய்து நீண்ட காலம் வாழ வைக்கக்கூடியதும், அறிவு வளம், உடல்நலம், மனவளம் ஆகியவற்றை அளிக்கக்கூடியதுமான கலையே காயகல்பக் கலையாகும்.

உட்கார்ந்து செய்வது, நின்று செய்வது, உடலை வளைத்துச் செய்வது என்ற வேறுபட்ட நிலைகளில் முறையாகச் செய்ய வேண்டிய பயிற்சி இது. இந்தப் பயிற்சியை ஆங்கிலத்தில் Anti-aging Process என்று கூறலாம். பெண்கள் பூப்பெய்தி ஆறுமாதம் கழிந்த பின், இப்பயிற்சியைக் கற்றுக் கொண்டு செய்து வரலாம். ஆண்கள் பதினான்கு வயதிற்கு மேல் இப்பயிற்சியைக் கற்றுக் கொள்ளலாம்.