இளம் பெண்ணை நிர்வாணமாக படம் பிடித்து மிரட்டல் : தமிழர் விடுதலை படையுடன் தொடர்புடையவர் கைது

கடலூர் : மயக்க மருந்து கொடுத்து இளம் பெண்ணை நிர்வாணமாக படம் எடுத்து இன்டர்நெட்டில் வெளியிடுவேன் என மிரட்டிய, தமிழர் விடுதலைப் படையுடன் தொடர்புடைய வாலிபரை போலீசார் கைது செய்தனர்.

கடலூர் மாவட்டம் விருத்தாசலம் அரசகுழியைச் சேர்ந்தவர் ரட்சகர்; மா.கம்யூ., பிரமுகர்; இவரது மகன் கிளமென்ட் எஸ்லின் ராஜ்(25). விருத்தாசலம் வெங்கடேசன் மகள் அருணா(22). (பெயர்கள் மாற்றப்பட்டுள்ளன) இருவரும் சிதம்பரம் அண்ணாமலை பல்கலைக்கழக தொலைதூர கல்வியில் பி.சி.ஏ., பட்டப்படிப்பு படித்து வந்தனர். பல்கலைக் கழகத்திற்கு இருவரும் பஸ்சில் செல்லும் போது பழக்கம் ஏற்பட்டது. கிளமென்ட் எஸ்லின் ராஜ், தன் காதலை அருணாவிடம் கூறியுள்ளார். அருணா மறுத்தார். ஆத்திரமடைந்த கிளமென்ட் எஸ்லின் ராஜ், தன்னிடம் இருந்த துப்பாக்கி குண்டுகளை காண்பித்து தனக்கு ரவுடிகளுடன் தொடர்பு உண்டு என மிரட்டி, 'பிரெய்ன் வாஷ்' செய்து தன்னை காதலிக்க வைத்துள்ளார். இருவரும் சகஜமாக பழகினர். கிளமென்ட் எஸ்லின் ராஜ் பழக்க வழக்கங்கள் பிடிக்காததால், அருணா அவரை வெறுக்கத் துவங்கினார். இவர்களின் காதல் விவகாரம் அருணா வீட்டிற்கு தெரிந்ததால், அவரை கண்டித்ததோடு, வெளியூரில் உள்ள உறவினர் வீட்டிற்கு அனுப்பி வைத்து விட்டனர். ஆத்திரமடைந்த கிளமென்ட் எஸ்லின் ராஜ், அருணா வீடு சென்று, அவரது பெற்றோரிடம், 'மொபைல்போனில் உங்கள் பெண்ணை ஆபாச படம் எடுத்து, எனது மெயில் ஐ.டி.,யில் வைத்துள்ளேன். அத்தனை படங்களையும், 'இன்டர்நெட்டில்' வெளியிடுவேன்' என, மிரட்டியுள்ளார்.

அருணாவின் தந்தை கொடுத்த புகாரின் பேரில், போலீசார் ரகசிய விசாரணை நடத்தினர். இதற்கிடையே நேற்று முன்தினம், விருத்தாசலம் பஸ் நிலையத்தில் நின்றிருந்த கிளமென்ட் எஸ்லின் ராஜை, போலீசார் மடக்கி பிடித்து, அவரிடம் இருந்த மொபைல் போனை பறிமுதல் செய்து சோதனை செய்ததில், அவரது மெயில் ஐ.டி.,யில், அருணா மயங்கிய நிலையில், நிர்வாண படங்கள் இருந்தன. விசாரணையில் கிளமென்ட் எஸ்லின் ராஜ், தமிழர் விடுதலைப் படையுடன் தொடர்புடையவர் என்றும், அருணாவை காதலித்த போது பிச்சாவரம் அழைத்துச் சென்று அங்கு மயக்க மருந்து கொடுத்து, நிர்வாணமாக படம் எடுத்ததும் தெரிந்தது. அருணாவை அவரது பெற்றோர் வெளியூருக்கு அனுப்பியதும், அவர் எங்கு இருக்கிறார் என்பதை கண்டறிய, அவர்களுக்கு தெரியாமலேயே, அருணாவின் வீட்டில், 'வாய்ஸ் டிரான்ஸ்மிட்டர்' பொருத்தி அதன் மூலம் அவர்கள் என்னென்ன பேசிக் கொள்கின்றனர் என்பதை கேட்ட விவரமும் தெரிந்தது. அவர் கொடுத்த தகவலின் பேரில், சுவரில் ஒட்டியிருந்த சிறிய, 'வாய்ஸ் டிரான்ஸ்மிட்டரை' கைப்பற்றினர். மாவட்ட குற்றப்பிரிவு சப்-இன்ஸ்பெக்டர் மகேஸ்வரி வழக்கு பதிந்து, கிளமென்ட் எஸ்லின் ராஜை கைது செய்து, கடலூர் மாஜிஸ்திரேட் சுதா முன் ஆஜர்படுத்தினார். அவரை 15 காவலில் வைக்க மாஜிஸ்திரேட் உத்தரவிட்டார்.