காதல் தகராறில் சாமியாரின் ரம்மில் விசம் கலப்பு

பேய் ஓட்டும் பூஜையில் வைத்திருந்த மதுவை குடித்த 2 பேர் பலியானது மந்திரவாதியின் காதல் விவகாரத்தில் மந்திரவாதிக்கு வைத்த விசம் என்பது தெரியவந்துள்ளது.
தூத்துக்குடி லூர்தம்மாள்புரத்தை சேர்ந்த கூலித் தொழிலாளி முனியசாமி மனைவி லதா (30), சில மாதங்களாக உடல் நலமின்றி இருந்தார். அவருக்கு பேய் பிடித்திருப்பதாக அக்கம்பக்கத்தினர் கூறியதால், அதை விரட்ட மந்திரவாதி பிச்சையா என்பவரை முனியசாமி ஏற்பாடு செய்தார். பூஜை முடிந்ததும் படையலில் வைத்திருந்த ரம்மை குடித்த முனியம்மாள் (75), கந்தசாமி இருவரும் பரிதாபமாக இறந்தனர். துரை என்பவர் தூத்துக்குடி அரசு மருத்துவக் கல்லூரி மருத்துவமனையில் ஆபத்தான நிலையில் சேர்க்கப்பட்டுள்ளார். அவர்கள் குடித்த மதுவில் விஷம் கலந்திருந்தது தெரியவந்தது.

இது குறித்து வழக்கு பதிவு செய்த போலீசார், தலைமறைவாக இருந்த மந்திரவாதி பிச்சையா, பூஜைக்கு மது வாங்கிக் கொடுத்த லதாவின் தந்தை தாவாளை இருவரையும் பிடித்து விசாரித்தனர். ‘பேயை ஓட்டுவதற்காகவே பூஜை செய்தேன். மற்றபடி யாரையும் கொல்லும் நோக்கம் எனக்கு கிடையாது’ என்று மந்திரவாதி கூறிவிட்டார். தாவாளை மீது சந்தேகம் வலுத்ததால் அவரை தீவிரமாக விசாரித்தனர்.

போலீசாரிடம் அவர் அளித்த வாக்குமூலத்தில் கூறியதாவது:

எனக்கும் வேம்பாரை சேர்ந்த முத்துக்காளி (50) என்ற பெண்ணுக்கும் தொடர்பு இருந்தது. அந்தப் பெண்ணுடன் பிச்சையாவுக்கும் பழக்கம் இருந்ததால், என்னை தொந்தரவு செய்துவந்தார். இதனால் மந்திரவாதியை கொல்ல திட்டமிட்டேன். அப்போதுதான் என் மகள் லதாவுக்கு பேய் பிடித்திருப்பதாக கூறி, பிச்சையாவை பூஜைக்கு முனியசாமி ஏற்பாடு செய்தார். இந்த சந்தர்ப்பத்தை பயன்படுத்தி, பூஜைக்காக வாங்கப்பட்ட ரம்மில் ‘ஆர்கெனாபாஸ்பரஸ்’ என்ற பூச்சிக்கொல்லி மருந்தை கலந்து வைத்து விட்டேன்.

பூஜை முடிந்ததும் அந்த மதுவை பிச்சையாவிடம் கொடுத்து குடிக்கச் சொன்னேன். ‘படையலில் வைத்த பொருளை சாப்பிட மாட்டேன்’ என்று அவர் மறுத்து விட்டார். இது எனக்கு ஏமாற்றமாக இருந்தது. பூஜையில் வைத்த மதுவை யார் குடிக்கப்போகிறார்கள் என நினைத்து அதை எடுக்காமல் அப்படியே வைத்துவிட்டேன். ஆனால், அந்த மதுவை குடித்த முனியம்மாள், கந்தசாமி இறந்துவிட்டனர். மந்திரவாதிக்கு வைத்த விஷம் அவர்கள் உயிரை பறித்து விட்டது.

இவ்வாறு தாவாளை கூறினார். அவரை போலீசார் கைது செய்து தொடர்ந்து விசாரித்து வருகின்றனர்.