நகைச்சுவை 2010

சென்னை : ''புதிய மின் திட்டங்கள் முடிந்தால், இந்தியாவுக்கே மின்சாரம் தரும் நிலை தமிழகத்துக்கு ஏற்படும்,'' என்று அமைச்சர் ஆற்காடு வீராசாமி கூறினார்.

தமிழ்நாடு மின்சார வாரியம், தனது வாடிக்கையாளர்களுக்கான சேவைகளை மேற்கொள்ள ஆங்கிலத்தில் இணையதளம் துவக்கி இருந்தது. இதில், மின்சார வாரியத்தின் செயல்பாடு, கட்டண விகிதம், மின் கட்டணம் செலுத்தும் முறைகள் மற்றும் இதர சேவைகள் இடம்பெற்றிருந்தன. இதே இணையதளத்தை தமிழிலும் துவக்க முடிவு செய்யப்பட்டது. இந்த தமிழ் இணையதளத்தை, மின் துறை அமைச்சர் ஆற்காடு வீராசாமி நேற்று துவக்கி வைத்தார்.

இதன்பின் நிருபர்களிடம் அவர் கூறியதாவது: தமிழகத்தில் மின்வெட்டு கிடையாது. மின் தட்டுப்பாடு தான் ஆங்காங்கு உள்ளது. மே மாதம் 31ம் தேதி வரை தான், கிராமப்பகுதிகளில் இரண்டு மணி நேரம் மின்வெட்டு இருக்கும். தற்போது விவசாயத்துக்கு தினமும் 10 மணி நேரமும், மற்றவர்களுக்கு 22 மணி நேரமும் மின்சாரம் வழங்கப்படுகிறது. சென்னையில் மின்வெட்டு என்று சொல்லப்படுவது வதந்தி. தமிழகத்தின் தினசரி மின் தேவை 10 ஆயிரத்து 500 மெகாவாட். இதில் தற்போதுள்ள உற்பத்தி போக, மீதத்தை வெளி மாநிலங்களில் இருந்து, நியாயமான விலையில் வாங்க முடிவு செய்யப் பட்டுள்ளது.

கோடை காலத்துக்கு கூடுதலாக 200 முதல் 300 மெகாவாட் மின்சாரம் தேவைப்படும். 600 மெகாவாட் மின்சாரத்தை வாங்க, இன்னும் இரண்டு நாட்களில் மின்சார வாரியம் டெண்டர் விட உள்ளது. தற்போது 8,000 மெகாவாட் மின்சாரம் உற்பத்திக்கான திட்டங்கள் துவக்கப்பட்டுள்ளன. இப்பணிகள் முடிந்ததும், இந்தியாவின் பிற பகுதிகளுக்கு மின்சாரம் தரும் நிலை ஏற்படும். கூடங்குளத்தில் முதல்கட்ட மின் உற்பத்தி ஜூன் மாதமும், இரண்டாம் கட்டம் டிசம்பர் மாதமும் துவக்கப்படும்.