கோவாவில் ரஷ்யப்பெண்மணி மர்ம மரணம்

கோவாவுக்கு சுற்றுலா வந்த ரஷ்ய இளம் பெண் ஒருவர் ஒட்டல் அறையில் நேற்றிரவு பிணமாக கண்டுபிடிக்கப்பட்டார். உள்பக்கம் தாளிட்ட அறையில் அவர் இறந்திருந்தால் தற்கொலையாக இருக்கலாம் என சந்தேகிக்கப்படுகிறது. இருப்பினும் பிரேத பரிசோதனைக்குப் பின்னரே மரணத்துக்கான காரணம் தெரியவரும் என போலீசார் தெரிவித்தனர்.
ரஷ்யாவைச் சேர்ந்த எலினா வெலிச்சிக்(33) கோவாவில் சுற்றுப்பயணம் செய்வதற்காக கடந்த 12ம் தேதி சுற்றுலா விசாவில் இந்தியா வந்தார். வடக்கு கோவாவில் அரபோரா பகுதியில் உள்ள ஓட்டல் ஒன்றில் தங்கி கோவாவை சுற்றி பார்த்தார்.

நேற்று அவர் எங்கும் வெளியில் செல்லவில்லை. அவரது அறையிலிருந்து எவ்வித அழைப்பும் வராததை தொடர்ந்து ஒட்டல் பணியாளர்கள் அறைக்கதவை தட்டி பார்த்தனர். பதில் வராததை தொடர்ந்து மாஸ்டர் சாவியின் உதவியுடன் எலினாவின் அறை திறக்கப்பட்டது. படுக்கை அறையில் எலினா பிணமாக கிடந்தார். உடனடியாக போலீசுக்கு தகவல் கொடுக்கப்பட்டது.

இன்ஸ்பெக்டர் மஞ்சுநாத் தேசாய் தலைமையில் போலீஸ் படை விரைந்து வந்து எலினாவின் சடலத்தை மீட்டு பிரேத பரிசோதனைக்காக அனுப்பி வைத்தனர். அறையின் கதவு உள்பக்கம் பூட்டியிருந்ததால் அவர் தற்கொலை செய்திருக்கலாம் என்ற சந்தேகம் உள்ளது. இருப்பினும் அண்மைக்காலமாக ரஷ்ய பெண்கள் மீது தாக்குதல் அதிகரித்து வருவதால் பிரேத பரிசோதனை அறிக்கை கிடைப்பதற்கு முன் எதையும் உறுதியாக கூறமுடியாது என இன்ஸ்பெக்டர் மஞ்சுநாத் தெரிவித்தார். எலினா வரும் 24ம் தேதி ரஷ்யா திரும்ப திட்டமிட்டிருந்தது அவரது அறையில் கிடைத்த விமான டிக்கெட்டிலிருந்து தெரியவந்துள்ளது.

ஆண்டுதோறும் கோவாவுக்கு சுமார் 40 ஆயிரம் ரஷ்யர்கள் சுற்றுலா வருகின்றனர். இந்த எண்ணிக்கை தொடர்ந்து அதிகரித்து வருவதாக சுற்றுலாத்துறை அதிகாரிகள் தெரிவித்தனர்.