மாத்தி யோசி - தியேட்டர் பக்கமே போயிடாதீங்க..

பக்கத்தில இருக்கிற படத்த பார்த்தீங்களா. பரபரப்பான மாற்று சினிமாவாம். என் வாழ்வில் முதல் முறையாக, படத்தின் அக்கப்போர் தாங்காமல் எழுந்து வெளியே வர எழுந்துவிட்ட படம். என் நண்பன் என்னும் கொலைகாரப்பாவி, "மச்சி, நம்ம உடம்பு எவ்ளோ தாங்குதுன்னு நமக்கு ஒரு கணக்கு தெரியவேண்டாமா, அதனால் முழுசா அடிவாங்கிடுவோம்" என்று சொன்னதால், மீதிப்படத்தையும் பார்த்து தொலைத்தேன். கொய்யால, படமாடா எடுக்கறீங்க!! அநியாயமா முன்னூறு ரூபா போச்சே..
.
இந்த நந்தா, பிதாமகன், காதல், பருத்திவீரன், சுப்ரமணியபுரம், நாடோடிகள், ரேணிகுண்டா படங்களை பார்த்துவிட்ட நம்ம நந்தா பெரியசாமிக்கு (இந்த படத்தின் இயக்குனர், "ஒரு கல்லூரியின் கதை" திரைப்படம் இவரின் முதல் திரைப்படம்), ஒரு மாற்று திரைப்படத்தை எடுத்து, தமிழ் சினிமாவின் முக்கிய இயக்குனர் போல் ஆகிவிட துடித்து, அதே போல் ஒரு திரைப்படம் எடுக்க, எவ்வளவு தூரம் செயற்கையாய் ஒரு படம் எடுக்க முடியுமோ அப்படியொரு படத்தை எடுத்திருக்கிறார்.
.
நேட்டிவிட்டியோடு படம் பண்ணுவது எப்படி - Dummies Guide:
மதுரையில் கதை நடக்க வேண்டும், எல்லாரும் புதுமுகங்கள், மதுரை வட்டார மொழி பேச வேண்டும், பழைய நல்ல தமிழ் பாடல்களை பின்னணியில் ஆங்காங்கே உலவ விடுவது, யதார்த்தமான சண்டைக்காட்சிகள், கொலைகள், வன்முறை, துரத்தல்கள், கொஞ்சம் சாதி பிரச்சனை, ஒரு மெசேஜ், எல்லாரும் கடைசியில் செத்துவிடுவது, இப்படி கலவையாய் படம் எடுத்து, பெரிய இயக்குனர் ஆகிவிடலாம்.
.
(ரேணிகுண்டா படத்தை முடிந்தவரை உல்டா). இப்படத்தில் நான்கு புதுமுகங்கள், இருளர் சாதி பையன்கள். இயக்குனர் சசிக்குமார் குரலில் அறிமுகம் செயதுவைக்கிறார்கள். City of God படம் போன்று உணவு பொருள் லாரியை மடக்குவது, Ameros Perros படம் போன்று ஒரு நாய் சண்டை, ஒரு குத்துப்பாட்டு, ஒரு கொலை, ஒரு ஒருதலைக்காதல், பின்பு ஆதிக்க சாதி மக்களின் அடக்குமுறைக்கு பின்பு சென்னைக்கு வருவது (ஸ்ஸப்பா..ஏண்டா தமிழ்ப்படம் பார்த்தும் நீங்க எல்லாம் திருந்தலையா!!), இங்கு கடத்தப்படும் ஷம்முவை காப்பாற்றுவது, ஷம்முக்குகாக பணம் திருடுவது, துப்பாக்கியால் கொலைகள் செய்வது.. பின்பு எல்லோரும் சாவது. முடியலங்க.
.
படத்தில் பொன்வண்ணன் தவிர எல்லாருக்கும் டப்பிங் குரல். நாலைந்து குரல்களை வைத்தே மதுரை மொழி, சென்னை மொழி பேசி கொடும பண்றாங்க. படம் முழுக்க எல்லாரும் கத்தறாங்க. காது கிழிஞ்சி ரத்தம் வடியுது. படத்தில் எல்லாமே செயற்கை. கொஞ்சம் கூட யதார்த்தமும் இல்லை, சினிமா மொழியும் இல்லை. இப்படத்திற்கு இசையமைத்தவர்(குரு கல்யாண்), படமெடுத்தவர் (நந்தா பெரியசாமி) கையில் கிடைத்தால் இந்த படத்தை அவர்களை பத்து முறை தொடர்ச்சியாய் பார்க்கவைப்பேன். அதுவும் அந்த "மாத்தி யோசி, மச்சி மாத்தி யோசி" என்று தொடர்ச்சியாய் வரும் அந்த தீம் சாங், நமீதாவின் இந்திர விழா படத்தில் வரும் "ஏமாந்த கோழி" பாடல் போன்றது. ஸ்ஸப்பாஆஆஆ..
.
என்னால முடியலங்க. இந்த வருடம் ஆரம்பித்து, ஆயிரத்தில் ஒருவன், நாணயம், கோவா, தமிழ்ப்படம், விண்ணைத்தாண்டி வருவாயா, அவள் பெயர் தமிழரசி என்ற ஆறு திரைப்படங்களும் எனக்கு பெரிய அளவில் மொக்கை தராமல் இருந்த வேளையில் நானாக சென்று மொக்கை வாங்கிக்கொண்டேன். "நமீதாவின் அழகான பொண்ணுதான்" படத்திற்கே சென்றிருக்கலாம். ம்ம். விதி வலியது.
கைப்புள்ள, பீ கேர்புல் (நான் என்னைய சொன்னேன்).
.
மாத்தி யோசி - தியேட்டர் பக்கமே போயிடாதீங்க ப்ளீஸ்.



http://msk-cinema.blogspot.com/2010/03/blog-post.html

ஒரு பாடல் கேட்பதற்கு இனியமையாய் இருந்ததே