வாழ்க்கை ஒரு புதையல்

ஒரு விவசாயி இருந்தார். அவருக்கு மிகப் பெரிய தோட்டம் இருந்தது. அந்தத் தோட்டமோ தண்ணீர் இல்லாமல் காய்ந்து கிடந்தது. அங்கங்கே புற்களும், முள் செடிகளும் முளைத்து இருந்தன. விவசாயத்திற்குத் தேவையான தண்ணீர் இல்லாததால் உழுது பயிர் செய்யப்படாமல் இருந்தது.

அவருக்கு நான்கு மகன்கள் இருந்தனர். அவர்கள் நால்வரும் தந்தை சம்பாதித்து வைத்த பொருட்களைக் கொண்டே வாழ்ந்து வந்தனர். யாரும் உழைத்துப் பொருள் சம்பாதித்து வாழ விரும்பவில்லை.

ஒருவருக்கொருவர் எப்போதும் சண்டையிட்டுக் கொண்டே இருந்தனர். தந்தை அவர்களுக்கு எவ்வளவோ அறிவுரைகள் கூறியும் அவர்கள் கேட்கவில்லை.

தந்தை இறக்கும் தருவாயில் நான்கு மகன்களையும் கூப்பிட்டு, “நமது தோட்டத்தில் உள்ள முள் மரத்திற்கு அருகில் மிக ஆழத்தில் ஒரு புதையல் இருக்கிறது. அந்தப் புதையலை நால்வரும் பங்கிட்டுக் கொள்ளுங்கள்” என்று சொன்னார். சில நாட்களில் விவசாயி இறந்துவிட்டார்.

நால்வரும் தந்தை சொன்னது போல அப்புதையலை எடுத்துக் கொள்ள விரும்பினர். முள் மரத்திற்கு அருகில் நிலத்தைத் தோண்டினர். மண் வந்தது. கற்கள் வந்தன. பாறைகள் வந்தன. பாறைகளை உடைத்து எடுத்தார்கள். ஆனால், புதையல் எதுவும் கிடைக்கவில்லை. பக்கத்தில் உள்ள நிலத்திலும், பல இடங்களிலும் இன்னும் சற்றுத் தோண்டிப் பார்க்கலாம் என்று மேலும் மேலும் ஆழமாகத் தோண்டினார்கள். தண்ணீர்தான் வந்தது. புதையல் கிடைக்கவில்லை.

சோர்ந்து போன நால்வரும் வீட்டிற்கு வந்து தாயிடம் முறையிட்டனர். “அப்பா முள் மரத்திற்கு அருகில் புதையல் இருக்கிறது என்று சொன்னார். நாங்கள் மிக ஆழமாகத் தோண்டிப் பார்த்துவிட்டோம். தண்ணீர்தான் வந்ததே தவிர, புதையல் கிடைக்கவில்லை” என்று கூறி வருந்தினார்கள்.

உடனே தாய், “உங்களுக்குப் புதையல்தான் கிடைத்துள்ளது” என்றார். நான்கு மகன்களும், “தாய் என்ன சொல்கிறார்?” என்று புரியாது விழித்தனர். “ஆம், மகன்களே! நீங்கள் நான்கு பேரும் ஒற்றுமையுடன் சேர்ந்து மிகக் கடினமாக உழைத்தீர்கள். ஆழமாகத் தோண்டியதால் தண்ணீர் வந்தது. அந்தத் தண்ணீரைக் கொண்டு விவசாயம் செய்யுங்கள். காய்ந்து கிடக்கும் அந்த நிலத்தை நீங்கள் உழுது பயிர் செய்தால், உங்களுக்குக் காலமெல்லாம் நிறையப் பணம் கிடைக்கும்” என்றார்.

மகன்கள் நால்வரும் தந்தை சொன்ன புதையல் எது? என்பதைத் தெரிந்து கொண்டனர். கூடி வாழ்ந்தால், உழைத்து வாழ்ந்தால் பொருளுக்குப் பஞ்சமில்லை. ஒற்றுமையாக உழைத்து வாழ்ந்தால் வாழ்க்கையே ஒரு புதையல்தான் என்பதைத் தெரிந்து கொண்டனர்.