அழகாகப் பாடும் குயில் ஏன் கருப்பாகயிருக்கிறது ?

**சிவா** · **சிவா** Tue Mar 09, 2010 1:34 pm

முன்னொரு காலத்தில் உலகில் உள்ள பறவையினங்கள், விலங்குகள் எதற்கும் நிறம் என்று கிடையாது. எல்லாப் பறவைகளும் ஒன்று போலவே இருந்தன. அதனதன் குரலை வைத்தே அது என்ன இனத்தைச் சேர்ந்தது என அடையாளம் காண வேண்டியிருந்தது. சில பறவைகளின் குரல்கள் ஒன்று போல இருந்ததால் கடவுளுக்கு குழப்பமானது.

இதனால் ஒரு நாள் கடவுள் பறவைகளுக்கும், விலங்குகளுக்கும், தனித்தனியான நிறங்கள் வழங்கிடத் தன்னை வந்து பார்க்கும்படி சேதி சொல்லி அனுப்பினார். பறவைகள் தங்களுக்கென தனியாக ஒரு நிறம் கிடைக்கப் போகும் சந்தோஷத்தில் வேகமாகப் பறந்து போயின. பறவைகள் கடவுளைப் பார்க்கப் போகும்போது பாடிக் கொண்டிருந்த குயிலைக் கண்டு தங்களுடன் வரும்படி கூப்பிட்டன. குயிலோ தனக்கு அவசரமில்லை என பாடிக் கொண்டேயிருந்தது.

கடவுளிடம் முதலில் மயில் போனது. அதற்கு நீல நிறமும், குருவிக்கு சாம்பல் நிறமும், சிட்டுக்குத் தேன் நிறமும் தந்தார். இப்படியே தன்னிடம் வந்த பறவைகள் விலங்குகள் அனைத்துக்கும் கடவுள் நிறம் கொடுத்துக் கொண்டேயிருந்தார். சூரியன் மறையும் வேளை வந்தது. பறவைகள் தங்களுக்குக் கொடுக்கப்பட்ட நிறங்களை வாங்கி கொண்டு திரும்பியிருந்தன.

அப்போதுதான் குயில் புறப்பட்டுக் கடவுளைப் பார்க்கக் கடைசி ஆளாகப் போனது. அவரிடம் இருந்த வர்ணங்களெல்லாம் தீர்ந்து போய்விடவே, அவர் குயிலைக் கோபித்துக் கொண்டார். அப்போது இருட்டத் துவங்கியது. எங்கும் இருள் பரவியது. கடவுள் கொஞ்சம் இருளின் கருப்பைக் கைகளில் எடுத்து, எடுத்துக் குயில் மேல் தடவி, "இனிமேல் உன் நிறம் இதுதான் போ" என அனுப்பினார்.மற்ற பறவைகளைப் போல தனக்கு அழகான வர்ணம் கிடைக்காத குயில் அன்று முதல் கவலையாகத் தனிமையில் பாடிக் கொண்டேயிருக்கிறது.

- கரிசல் வட்டாரக் கதை