தேகம் நலம் பெற உதவும் தேங்காய்

**சிவா** · **சிவா** Sat May 23, 2009 12:21 pm

நாம் அன்றாடம் விதவிதமாக சாப்பிடும் அனைத்து உணவுப் பண்டத்திலும் தேங்காயை சேர்ப்பதை பழக்கமாகவே கொண்டிருக்கின்றோம். தேங்காயை நாம் சாப்பாட்டில் சேர்ப்பதின் நோக்கமே சுவைக்காகத்தான். ஆனால் நாம் அன்றாடம் உணவில் சேர்க்கும் தேங்காயில் எவ்வளவு சத்துக்களும், மருத்துவ பயன்களும் இருக்கின்றன என்பது தெரியுமா?

தேங்காய் கபாலச் சூடு, உடம்பு உஷ்ணம், வாயில் ஏற்படுகின்ற புண்கள், வயிற்றில் ஏற்படக்கூடிய புண்கள், வயிற்று வலி போன்றவைக்கு அருமருந்தாக உள்ளது. ஒரு சிலர் காய்ச்சல் அல்லது வேறு சில உடல் உபாதைகளின் காரணமாக பல நாட்கள் தலையில் தண்ணீர் ஊற்றி குளிக்காமலே இருப்பார்கள். அவர்களுக்கு எல்லாம் கபால உஷ்ணம் அதிகமாகவே இருக்கும். அவர்கள் தலைக்கு குளிக்க முடிவெடுக்கும்போது தேங்காய் பாலை எடுத்து தலையில் தேய்த்து அரை மணி நேரம் கழித்து வெந்நீரில் குளிக்க உடம்பு உஷ்ணம் முற்றிலுமாக நீங்கும் என்பது மருத்துவ உண்மையாகும். வயிறு சம்மந்தமாக குறைபாடுகள், வாய்ப்புண், வாயில் துர்நாற்றம் இருப்பவர்கள் தேங்காய் பாலை சாதத்தில் விட்டு கொஞ்சம் உப்பு சேர்த்து பிசைந்து சாப்பிடலாம். உடனே குணம் தெரிவதை இவர்கள் உணரலாம். தேங்காய் பாலில் சர்க்கரை சேர்த்து சாப்பிடுவதைவிட உப்பு போட்டு சாப்பிடுவது அல்லது அப்படியே எதுவுமே சேர்க்காமல் அருந்துவதே மருத்துவ ரீதியில் நல்லது.

வாயில் துர்நாற்றம் இருப்பவர்கள், வாயில் கரை படிந்துள்ளவர்கள் பச்சையாக தேங்காய் கீற்றை மென்று திண்ணலாம். நீங்கள் தேங்காயை சமைக்க தேர்ந்தெடுக்கும் போது மிகவும் முற்றியதாகவும் இல்லாமல், மிகவும் இளசாகவும் இல்லாமல் தேர்ந்தெடுப்பது நல்லது. ஏனெனில் மிகவும் முற்றிய நிலையில் இருக்கும் தேங்காயில் எண்ணெய் சத்து அதிக மிருப்பதால் கொலஸ்ட்ராலை உடம்பில் சேர்க்கலாம். மிகவும் இளசாக உள்ள தேங்காயினால் எந்தப் பயனும் இல்லை.

ஜலதோஷம், சளி மிகுந்திருக்கும் போது சாப்பாட்டில் தயிருக்குப் பதிலாக தேங்காய்பால் போட்டு உப்பு சேர்த்து சாப்பிடலாம். ஒரு சிலர் தேங்காயை துருவி பால் எடுத்து சர்க்கரை சேர்த்து அருந்துவார்கள். அப்படி சாப்பிடு வதைவிட தேங்காய் பாலுடன், கொஞ்சம் கொத்துமல்லி, அச்சு வெல்லம் இஞ்சித் துண்டு, துளசி ஆகியவைகளை சேர்த்து சாப்பிட்டால் அது மிகுந்த மருத்துவ நன்மைகளை கொண்டதாக இருக்கும்.