நான் என் நண்பருடன் பதிமூன்று .....

நான் என் நண்பருடன் பதிமூன்று வருடம் பழகிவருகிறேன் என் நண்பர் இந்து மதத்தை
சார்ந்தவர். பெருநாள் வந்தால் நானும் அவரும் ஒரே மாதிரி டிரஸ் எடுத்து கொள்வோம்.
நானே அதற்கு பணம் கொடுப்பேன் அதே மாதிரி அவருக்கு தீபாவளி வந்தால் எனக்கு டிரஸ் எடுத்து தருவார் நான் அந்த டிரஸ்சை அணிந்து கொள்ளலாமா இதில் தவறு எதும் உண்டா என்பதை விளக்கவும். ஷரீப் - ஹாட் மெயில் வழியாக.
எவருடன் வேண்டுமானாலும் நட்புறவு வதை;துக் கொள்ளலாம் தடையில்லை. ஆனால் அந்த நட்பு உங்களையோ, உங்கள் கொள்கையையோ, உங்கள் குடும்பத்தையோ, உங்கள் சமூகத்தையோ பாதிக்காமல் இருக்க வேண்டும்.
மார்க்க விஷயத்தில் உங்களுடன் (எந்த வகையிலும்) போரிடாமலும், உங்கள் இல்லாங்களிலிருந்து உங்களை வெளியேற்றாமலும் இருந்தார்களே (இருக்கிறார்களே) அவர்களுக்கு நீங்கள் நன்மை செய்வதையும், நீதி செலுத்துவதையும் அல்லாஹ் உங்களுக்கு விலக்கவில்லை. (அல் குர்ஆன் 60:8)
இந்த வசனத்தில் நாம் பிற மதத்தில் உள்ள யாருடன் நட்புக் கொள்ளலாம் என்பதற்குறிய இலக்கணத்தை இறைவன் சொல்லுகிறான். இந்த வசன அடிப்படையிலேயே நபி(ஸல்) அவர்களின் பிறமத நட்பு அமைந்திருந்தது.
முஸ்லிம் அல்லாத அனைவரையும் நபி(ஸல்) வெறுத்து ஒதுக்கி விடவில்லை. அன்றிருந்த சிற்றரசர்கள் பலருடன் நபி(ஸல்) நட்புக் கொண்டுள்ளார்கள். அவர்களிடமிருந்து வரும் அன்பளிப்பைப் பெற்று பிரதிபலனாக மாற்று அன்பளிப்பு அனுப்பி வைத்துள்ளார்கள். இதற்கு ஏராளமான ஆதாரங்கள் உண்டு.
இந்த அடிப்படையில் நீங்கள் உங்கள் ஹிந்து நண்பருடன் பழகுவதிலோ, அவருக்கு அன்பளிப்பு வழங்குவதிலோ எந்த குற்றமும் இல்லை. ஆனால் அவர் உங்களுக்கு அன்பளிப்பு வழங்கும் போது அதை நீங்கள் பரிசிலிக்க வேண்டும்.
எவ்வித விஷேஷமான நாட்களும் இல்லாமல் நட்பின் அடையாளமாக அவர் உங்களுக்கு டிரஸ் எடுத்துக் கொடுத்தால் அதை பெற்றுக் கொள்வதிலோ - உடுத்துவதிலோ எந்த ஆட்சேபனையும் இல்லை.
பண்டிகை காலங்களில் அவர் அவ்வாறு செய்து அதை நீங்கள் பெற்றால் அவரது பண்டிகையை நீங்கள் அங்கிகரிக்கிறீர்கள் (அதாவது நீங்களும் தீபாவளி கொண்டாடுகிறீர்கள்) என்று பொருள். ஒரு முஸ்லிம் தீபாவளி - பொங்கல் கொண்டாடலாமா என்பதை நீங்களே சிந்தித்துப் பாருங்கள். இந்த அன்பளிப்பு நமது கொள்கையை கேள்விக்குறியாக ஆக்குவதால் - கொள்கைத்தான் முக்கியம் என்பதை உணர்ந்து - அன்பளிப்பை பெறாமல் இருப்பதுதான் நல்லது.
உங்கள் நண்பர் தவறாக எடுத்துக் கொள்ள மாட்டாரா என்ற சந்தேகம் உங்களுக்கு வந்தால் உங்கள் நண்பரிடம் முன் கூட்டியே இதை நீங்கள் விளக்கி விடலாம். (இன்றைக்கு பல முஸ்லிம்கள் '' நண்பர்கள் தப்பாக எடுத்துக் கொள்வார்களோ"" என்ற பயத்தில் அடிப்படை கொள்கையைக் கூட இழந்து நிற்பதை பரவலாக காண முடிகிறது. இது மகா துரதிஷ்டமான செயலாகும்)
'உன் நட்பை இழக்க நான் விரும்பவில்லை. அதே சமயம் நான் ஒரு முஸ்லிம் என்பதால் என் கொள்கைக்கு மாறு செய்யவும் எனக்கு விருப்பமில்லை. உன் கொள்கையை நானும் என் கொள்கையை நீயும் மதிப்பதுதான் நம் நட்பிற்குறிய சிறந்த வழியாகும். எனவே பண்டிகை அல்லாத காலங்களில் நீ எனக்கு அன்பளிப்பு செய்தால் அதை மன மகிழ்வுடன் பெற்றுக் கொள்வேன்" என்பதை நேரடியாகவோ, மறைமுகமாகவோ நண்பர்களுக்கு விளக்கி விட வேண்டும்.
இதன் பிறகு பெருநாள் தினத்தில் நீங்கள் எடுத்துக் கொடுக்கும் உடையை அவர் உடுத்தாவிட்டால் (உடுத்தாமலிருப்பது அவர் உரிமை) அது பற்றி அலட்டிக் கொள்ளத் தேவையில்லை.