இதயத்தை பாதுகாக்கும் இயற்கை உணவு!

by **சிவா** Mon Mar 01, 2010 10:46 pm

இன்றைய அவசர உலகில் நமது உடலின் ஆரோக்கியம் நாளுக்குநாள் சீர்கெட்டு வருகிறது என்கிறார்கள் இயற்கை உணவு ஆய்வாளர்கள். இதற்கு ஒரு நல்ல தீர்வையும் அவர்கள் கூறுகிறார்கள்.

மத்திய தரைக்கடல் நாடுகளின் உணவுத் திட்டத்தைப் பின்பற்றினால் இதய சம்பந்தமான அனைத்து நோய்களும் குணமாகும். இதனால் நீண்ட நாள் வாழ முடியும் என்பது அவர்களின் கருத்து.

மேலும், இந்த உணவுத்திட்டம் புற்றுநோய் கோளாறுகளையும் குணமாக்குகிறது என்பதையும் சமீபத்தில் கண்டுபிடித்துள்ளனர்.

1994 -ல் மாரடைப்பு வந்து மீண்ட 605 ஆண்-பெண்களைத் தேர்வு செய்து, பாதிப்பேர்களை அமெரிக்க இதயக் கழக சிபாரிசு செய்த உணவுத் திட்டப்படி இறைச்சி, ஐஸ்கிரீம், வெண்ணெய் முதலியன சேர்த்துக் கொள்ளச் சொன்னார்கள். இது முழுநலம் தரும் உணவுத் திட்டம்தான். மீதிப்பேர்களை இயற்கை உணவைச் சாப்பிடச் சொன்னார்கள்.

அதாவது இறைச்சி, ஐஸ்கிரீம், வெண்ணை முதலியவற்றைக் குறைத்துக் கொள்ளச் சொன்னார்கள். அதற்குப் பதிலாக பழங்கள், காய்கறிகள், தானியங்கள், பீன்ஸ், மீன், ஆலிவ் எண்ணை, கடுகு எண்ணை சேர்த்துக் கொள்ளச் சொன்னார்கள். ஆடு, மாடு, கோழி முதலிய இறைச்சி வகைகள் இவர்களுக்குக் கொடுக்கப்படவில்லை.

நான்கு ஆண்டுகள் கழித்து (1998இல்) இவர்களைப் பரிசோதனை செய்தபோது, இயற்கை உணவுத் திட்டக்காரர்களிடம் 7 பேர் மட்டுமே புற்றுநோய் அறிகுறியுடன் இருந்தார்கள். ஆனால், அமெரிக்க இதயக்கழக உணவுத் திட்டக்காரர்களில் 12 பேர் புற்றுநோய் அறிகுறியுடன் இருந்தார்கள்.

இரண்டு ஆண்டுகள் கழித்து இவர்களுக்கு இயற்கை உணவை நன்கு சாப்பிட வைத்ததில் புற்றுநோய் குறைந்தது.

இதய நோயைத் தடுக்கும் இயற்கை உணவில் புற்று நோயைத் தடுக்கும் அம்சம் எது என்பதையும் தீவிரமாக ஆராய்ந்தார்கள். மத்திய தரைக்கடல் நாடுகளில் குறிப்பிட்ட வகைப் புற்றுநோய்களே இல்லை என்பதும் தெரிய வந்தது.

இதற்குக் காரணம் இயற்கை உணவில் உள்ள நார்ச்சத்து, நச்சுமுறிவு மருந்து, மரபணுக்கள் உடைவது (டி.என்.ஏ. உடைவது), முதுமைத் தோற்றம் உண்டாவது போன்ற பிரச்னைகளை தடுக்கும் `சி' வைட்டமின் காரணம் என்று கண்டுபிடித்துள்ளனர்.

இதயநோய், புற்றுநோய் உட்பட எந்த நோயும் இன்றி வாழ, இயற்கை உணவுத் திட்டத்தையே பின்பற்றுவது நலம் என்கிறார்கள் உணவு ஆராய்ச்சியாளர்கள்!

தக்காளியில் உள்ள வைகேப்பன், பழத்தோல்களில் உள்ள ப்ளேவினாய்ட்ஸ், எலுமிச்சையில் உள்ள வைட்டமின் சி, ஆரஞ்சுப் பழத்தில் உள்ள மெதியேனின் என்ற அமிலம், மீனில் உள்ள டைரேசின் அமிலம் மற்றும் துத்தநாக உப்பு முதலியவையே இத்தகைய உணவில் அதிகம் இருப்பதால் நோயின்றி நீண்ட நாள் ஆயுளைத் தருகிறது.