இரட்டை சதம் உலக சாதனை

kalaimoon70 · kalaimoon70 Thu 25 Feb 2010, 00:51

பதிவு செய்த நாள்
2/25/2010 12:12:56 AM

இரட்டை சதம் உலக சாதனை Hl418

குவாலியர் : குவாலியர், பிப். 25: தென்
ஆப்ரிக்க அணியுடனான 2வது ஒருநாள் போட்டியில், இந்திய வீரர் சச்சின் இரட்டை
சதம் விளாசி உலக சாதனை படைத்தார். இப்போட்டியில் 153 ரன் வித்தியாசத்தில்
வென்ற இந்தியா, தொடரை கைப்பற்றியது.
இந்தியா & தென் ஆப்ரிக்க
அணிகளிடையே 3 போட்டிகள் கொண்ட ஒருநாள் தொடர் நடக்கிறது. ஜெய்ப்பூரில்
நடந்த முதல் போட்டியில் இந்தியா 1 ரன் வித்தியாசத்தில் வென்று முன்னிலை
பெற்றது. அடுத்து 2வது போட்டி குவாலியர், கேப்டன் ரூப் சிங் ஸ்டேடியத்தில்
நேற்று நடந்தது. இந்திய அணியில் மாற்றம் ஏதும் செய்யப்படவில்லை.
தென் ஆப்ரிக்க அணியில் அல்பி மார்கெல், பாஸ்மேன், போத்தா நீக்கப்பட்டு அம்லா, டுமினி, வாண்டெர் மெர்வ் சேர்க்கப்பட்டனர்.
டாசில்
வென்ற இந்தியா முதலில் பேட் செய்தது. தொடக்க வீரர்களாக சேவக், சச்சின்
களமிறங்கினர். சேவக் 9 ரன் எடுத்து பார்னெல் பந்துவீச்சில் ஸ்டெயின் வசம்
பிடிபட்டார். அடுத்து சச்சினுடன் தினேஷ் கார்த்திக் ஜோடி சேர்ந்தார்.
இருவரும் அதிரடியாக விளையாட ஸ்கோர் வேகமாக உயர்ந்தது. சச்சின் ஒருநாள்
போட்டிகளில் தனது 46வது சதத்தை பூர்த்தி செய்ய (90 பந்து, 13 பவுண்டரி),
மறுமுனையில் கார்த்திக் அரைசதம் கடந்தார்.
சச்சின் & கார்த்திக்
ஜோடி 2வது விக்கெட்டுக்கு 194 ரன் சேர்த்து அசத்தியது. கார்த்திக் 79 ரன்
(85 பந்து, 4 பவுண்டரி, 3 சிக்சர்) எடுத்து பெவிலியன் திரும்ப, யூசுப்
பதான் உள்ளே வந்தார். சச்சின், யூசுப் இருவரும் பவுண்டரியும் சிக்சருமாக
விளாசித் தள்ளினர். பந்துவீச்சு சுத்தமாக எடுபடாததால் தென் ஆப்ரிக்க
வீரர்கள் விரக்தியில் வேடிக்கை பார்த்தனர்.
சச்சினுக்கு 15 வயது
குறைந்துவிட்டது போல இருந்தது. அவரது நேர்த்தியான ஆட்டம் ரசிகர்களுக்கு
விருந்தாகவும், இளம் வீரர்களுக்கு பாடமாகவும் அமைந்தது. பதான் 36 ரன் (23
பந்து, 4 பவுண்டரி, 2 சிக்சர்) எடுத்து ஆட்டமிழந்தார். இந்தியா 3 விக்கெட்
இழப்புக்கு 300 ரன்னை எட்டியது. கேப்டன் டோனியும் தன் பங்குக்கு விளாசித்
தள்ள தென் ஆப்ரிக்க பந்துவீச்சு தவிடு பொடியானது. சச்சின் 150 ரன்களைக்
கடந்து வேகமாக முன்னேற, உலக சாதனை படைப்பாரா? என்ற எதிர்பார்ப்பில்
ரசிகர்கள் நகம் கடிக்க ஆரம்பித்தனர். டோனி 29 பந்தில் அரைசதத்தை
எட்டினார்.
கிர்ஸ்டன் (188), ஜெயசூரியா (189), ரிச்சர்ட்ஸ் (189*)
என்று ஓவர்டேக் செய்து முன்னேறிய சச்சின்... பாகிஸ்தானின் சயீத் அன்வர்
(194), ஜிம்பாப்வேயின் கவன்ட்ரி (194*) சாதனையை முறியடித்து உலக சாதனை
படைத்தபோது குவாலியர் ஸ்டேடியம் குலுங்கியது.
லாங்கவெல்ட் வீசிய 50வது
ஓவரின் 3வது பந்தை எதிர்கொண்ட சச்சின் ஒரு ரன் எடுத்து இரட்டை சதத்தை
பூர்த்தி செய்து புதிய வரலாறு படைத்தார். ஒட்டுமொத்த ரசிகர்களும்,
வீரர்களும் எழுந்து நின்று கைதட்டி தங்கள் வாழ்த்துக்களை தெரிவித்தனர்.
இந்தியா 50 ஓவர் முடிவில் 3 விக்கெட் இழப்புக்கு 401 ரன் குவித்தது.
சச்சின் 200 ரன் (147 பந்து, 25 பவுண்டரி, 3 சிக்சர்), டோனி 68 ரன்னுடன்
(35 பந்து, 7 பவுண்டரி, 4 சிக்சர்) ஆட்டமிழக்காமல் இருந்தனர்.அடுத்து
களமிறங்கிய தென் ஆப்ரிக்கா 42.5 ஓவரில் 248 ரன்னுக்கு ஆல் அவுட் ஆனது.
டிவில்லியர்ஸ் அதிகபட்சமாக 114* ரன் எடுத்தார்.

இரட்டை சதம் உலக சாதனை 677196