தமிழகத்தில் 65 சதவீத வாக்குப்பதிவு

தமிழகத்தில் 39 மக்களவைத் தொகுதிகளில் இன்று நடைபெற்ற தேர்தலில் சுமார் 60 முத‌ல் 65 ‌விழு‌க்காடு வரை வாக்குகள் பதிவானதாக தகவல்கள் தெரிவிக்கின்றன.

தமிழகம், புதுவை உட்பட 86 தொகுதிகளுக்கு இன்று 5ஆவது மற்றும் இறுதிக்கட்டமாக வாக்குப்பதிவு நடைபெற்றது.

தமிழகத்தைப் பொருத்தவரை ஒருசில சம்பவங்களைத் தவிர பெரிய அளவில் வன்முறை ஏதும் நிகழவில்லை.

காலையில் வாக்குப்பதிவு தொடங்கியதும் சென்னை உட்பட ஒருசில இடங்களில் மின்னணு வாக்குப்பதிவு எந்திரங்கள் சரிவர இயங்காததால், வாக்குப்பதிவு தொடங்குவதில் சிறிது தாமதம் ஏற்பட்டது.

மாலை 5 மணி வரை நடைபெற்ற வாக்குப்பதிவில் சுமார் 4 கோடியே 16 லட்சம் பேர் தங்களது வாக்குகளைப் பதிவு செய்திருப்பதாக அரசு வட்டாரங்களை மேற்கோள்காட்டி யுஎன்ஐ செய்தி தெரிவிக்கிறது.

39 தொகுதிகளிலும் சுமார் 824 வேட்பாளர்கள் களத்தில் போட்டியிடுகிறார்கள்.

மத்திய அமைச்சர்கள் ப. சிதம்பரம், ஈ.வி.கே.எஸ். இளங்கோவன், டி.ஆர். பாலு, ஆ. ராசா, மணிசங்கர் ஐயர், பழனி மாணிக்கம், ஆர். வேலு ஆகியோரின் தேர்தல் எதிர்காலம் இன்றைய தேர்தல் மூலம் நிர்ணயிக்கப்படும்.

சென்னையில் ஐஸ் அவுஸ் பகுதியில் இருதரப்பினர் இடையே ஏற்பட்ட மோதலில், சிலருக்கு காயம் ஏற்பட்டது. கார்கள் சேதம் அடைந்தன. கடலூரிலும் வன்முறை ஏற்பட்டது.

திண்டுக்கல் மாவட்டத்தில் ஒருவர் கொல்லப்பட்டார். என்றாலும், அந்தக் கொலை தேர்தலுடன் தொடர்புடையதல்ல என்று காவல்துறையினர் தெரிவித்துள்ளனர்.

புதுவையில் 79 சதவீத வாக்குப்பதிவு

புதுவையில் ஒரே தொகுதிக்கு இன்று நடைபெற்ற தேர்தலில் 79 சதவீத வாக்குகள் பதிவானதாகத் தகவல்கள் தெரிவிக்கின்றன.

புதுவையில் 7 லட்சத்து 62 ஆயிரம் பேர் வாக்களித்தனர்.

புதுவையைப் பொருத்தவரையிலும், பாமக - காங்கிரஸ் தொண்டர்களுக்கு இடையே காட்டேரிக்குப்பம் என்ற இடத்தில் மோதல் ஏற்பட்டது. என்றாலும் சிறிது நேரத்தில் காவல்துறையினர் கட்டுப்படுத்தினர். மற்றபடி பெரிதும் அமைதியாகவே தேர்தல் நடைபெற்றது.