போராட்டங்களில் ஏற்படும் சேதம்:வசூலிக்க

போராட்டங்கள், "பந்த்' ஆகியவற்றின் போது, பொதுச்
சொத்துகளுக்கு சேதம் ஏற்பட்டால், போராட்டம் நடத்திய அரசியல் கட்சி அல்லது
அமைப்புகளிடம் இருந்து, அதற்கான நஷ்ட ஈடு தொகையை வசூலிக்க வகை செய்யும் சட்ட மசோதா,
ஆந்திர சட்டசபையில் நேற்று அறிமுகப்படுத்தப்பட்டது.ஆந்திராவில் தெலுங்கானா
விவகாரத்தை முன்னிறுத்தி, கடந்த சில மாதங்களாக பெரும் போராட்டங்கள்
நடத்தப்படுகின்றன. இந்த போராட்டங்களில் வன்முறை வெடித்து,கலவரமும் ஏற்பட்டது.
அரசுக்கு சொந்தமான வாகனங்கள், அலுவலகங்கள் மற்றும் தனியார் உடமைகள்
சேதப்படுத்தப்பட்டன. இதுபோன்ற சம்பவங்கள் தொடர்வதை அடுத்து, இதுகுறித்து, ஆந்திர
ஐகோர்ட்டில் மனு தாக்கல் செய்யப்பட்டது.


இதை விசாரித்த ஐகோர்ட்,"சேதமடைந்த பொருட்களுக்கு நஷ்ட
ஈடு வசூலிப்பதற்கு தேவையான நடவடிக்கைகள் எடுக்க வேண்டும்'என, மாநில அரசுக்கு
உத்தரவிட்டது. இதையடுத்து, இந்த விஷயத்தில் மாநில அரசு களம்
இறங்கியுள்ளது.போராட்டங்கள், "பந்த்' ஆகியவற்றின் போது, பொதுச் சொத்துகளுக்கு சேதம்
ஏற்பட்டால், போராட்டம் நடத்திய அரசியல் கட்சி அல்லது அமைப்புகளிடம் இருந்து,
அதற்கான நஷ்ட ஈடு தொகையை வசூலிக்க வகை செய்யும் சட்ட மசோதா, ஆந்திர சட்டசபையில்
நேற்று அறிமுகப்படுத்தப்பட்டது.மசோதாவை தாக்கல் செய்து பேசிய மாநில போக்குவரத்து
துறை அமைச்சர் விஜயராமராஜு,"பொது மற்றும் தனியார் சொத்துக்களுக்கு ஏற்படும்
சேதங்களுக்கு நஷ்ட ஈடு வசூலிப்பதற்கு, தற்போதுள்ள சட்டங்கள் போதுமானதாக இல்லை.
எனவே, இந்த புதிய சட்டம் கொண்டுவரப்பட உள்ளது'என்றார்.


இதுகுறித்து, மாநில அரசு வட்டாரங்கள்
கூறியதாவது:போராட்டங்களின் போது நடக்கும் தாக்குதல்கள், அதனால் ஏற்பட்ட சேதங்கள்
குறித்து விசாரிப்பதற்காக சிறப்பு தீர்ப்பாயம் அமைக்கப்பட உள்ளது. விசாரணையின்
முடிவில், சொத்துக்களுக்கு ஏற்பட்ட சேதங்களுக்கு, போராட்டம் நடத்திய அமைப்பே காரணம்
என தெரியவந்தால், அந்த அமைப்பிடம் இருந்து, அதற்கான நஷ்ட ஈடு வசூலிக்கப்படும்.
சம்பந்தபட்ட அமைப்பு, ஒரு மாதத்துக்குள் நஷ்ட ஈடு தொகையை செலுத்த வேண்டும்.இவ்வாறு
அரசு வட்டாரங்கள் தெரிவித்தன.- நமது சிறப்பு நிருபர் -