மகளை எரித்த இடத்தில் என் உடலை எரியுங்கள்: தற்கொலை செய்த கைதி.

by mohan-தாஸ் Sat 20 Feb 2010 - 2:52

புழல் சிறையில் கைதி ஒருவர் தற்கொலை செய்து கொண்டார். ‘தனது உடலை மனைவியிடம் ஒப்படைக்க வேண்டாம்’ என்று அவர் எழுதிய கடிதத்தை போலீசார் கைப்பற்றி விசாரித்து வருகின்றனர்.
கீழ்க்கட்டளை திருவள்ளுவர் தெருவை சேர்ந்தவர் சிவா (எ) சிவகுமார் (34). சைக்கிள் கடை நடத்தி வந்தார். இவரது மனைவி வாணி. ஜெயஸ்ரீ (8) என்ற மகள் இருந்தார். சிவா அடிக்கடி குடித்து விட்டு வந்து தகராறு செய்ததால் விரக்தி அடைந்த வாணி, மகளுடன் தாம்பரம் பீர்க்கன்கரணையில் உள்ள தாய் வீட்டுக்கு சென்றுள்ளார். கடந்த நவம்பரில் மகள் ஜெயஸ்ரீயை அழைத்து வந்தார் சிவா. ‘அம்மாவை பார்க்க வேண்டும்’ என்று ஜெயஸ்ரீ அழுததால் மகளை கழுத்தை நெரித்து கொலை செய்தார். இதையடுத்து, சிவாவை மடிப்பாக்கம் போலீசார் கைது செய்து புழல் சிறையில் அடைத்தனர். இந்நிலையில் நேற்று, புழல் சிறையில் உள்ள சமையலறையில் சிவா தூக்குப்போட்டு தற்கொலை செய்து கொண்டார். இதுகுறித்து புழல் போலீஸ் இன்ஸ்பெக்டர் விஜயராமுலு, எஸ்ஐ கமலக்கண்ணன் ஆகியோர் வழக்கு பதிந்து சிவாவின் சடலத்தை கைப்பற்றி பிரேத பரிசோதனைக்காக ராயப்பேட்டை அரசு மருத்துவமனைக்கு அனுப்பினர். மேலும் வழக்குப் பதிவு செய்து விசாரித்தனர். இந்நிலையில், சிவா எழுதி வைத்திருந்த ஒரு கடிதத்தை போலீசார் கைப்பற்றினர். அதில், ‘என் சாவுக்கு யாரும் காரணம் இல்லை. மகள் எரிக்கப்பட்ட இடமான கீழ்க்கட்டளை சுடுகாட்டில் உடலை எரித்து விடவும். எனது மனைவியிடம் உடலை ஒப்படைக்க வேண்டாம்’ என்று கூறப்பட்டிருந்தது