பிரம்படி தண்டனை பெற்ற பெண்கள்- மலேசியா

பிரம்படி தண்டனை பெற்ற
பெண்கள் வருந்தவில்லை : மலேசியா மாறி வருகிறது





முறையாக மூன்று
பெண்களுக்கு, திருமணத்திற்கு முன் பாலியல் உறவு வைத்துக் கொண்டதற்காக, அந்நாட்டு
இஸ்லாமிய சட்டப்படி பிரம்படி கொடுக்கப்பட்டது. பிரம்படி தண்டனை பெற்ற பெண்கள்
தங்களுக்கு நடந்தது நன்மையான செயல் தான் என்று நியாயப்படுத்தி உள்ளனர். ஆனால், இந்த
தண்டனை சட்டவிரோதமானது என, மனித உரிமை ஆர்வலர்கள் எதிர்ப்பு
தெரிவித்துள்ளனர்.
இதில் சம்பந்தப்பட்ட மூன்று பெண்களின் உண்மையான பெயர் மற்றும்
படங்கள் இன்றி, பத்திரிகை ஒன்றில் வெளியிடப்பட்ட செய்தி: தான் பள்ளி செல்லும்
பருவத்தில் கர்ப்பமடைந்ததாகவும், தன் செயலுக்கு வருந்துவதாக, 17 வயது பெண் ஒருவர்
தெரிவித்துள்ளார். அதே போன்று மற்றொரு பெண், தன் தந்தை குடும்பத்தை விட்டு சென்ற
பின், குடும்ப பொறுப்புகளை ஏற்ற நிலையில், திருமணமாகாமலே, தனக்கு மூன்று வயது பெண்
குழந்தை உள்ளதாக தெரிவித்துள்ளார்.
இந்த இரண்டு பெண்கள் உட்பட மூன்று பேருக்கு
பிரம்படி தண்டனை நிறைவேற்றப்பட்டதாக உள்துறை அமைச்சர் ஹிஷாமுதீன் உசேன்
அறிவித்தார். இந்த பெண்கள் முழுமையாக உடை அணிந்த நிலையில், முகத்திற்கு பர்தா
போன்றதை அணிந்து உட்கார்ந்திருக்கும் போது, அவர்களுக்கு தலா ஆறு பிரம்படி
தரப்பட்டு தண்டனை நிறைவேற்றப்பட்டது. இவ்வாறு அந்த செய்தியில்
கூறப்பட்டுள்ளது.
இதுகுறித்து, உள்துறை அமைச்சர் ஹிஷாமுதீன் உசேன் கூறுகையில்,
"பிரம்படியால் பெண்களின் உடலில் காயம் ஏற்படவில்லை என்றாலும், அது அவர்களின்
உள்ளத்தில் வலியை ஏற்படுத்தியதாக தெரிவித்தனர்' என்றார். எனினும், இந்த
தண்டனைக்கு, தென்கிழக்கு ஆசிய நாடுகளை சேர்ந்த பெரும்பாலான முஸ்லிம்கள் ஆதரவு
தெரிவித்துள்ளனர். மலேசியா தற்போது இஸ்லாமிய சட்டங்களை சிறிது சிறிதாக
அமல்படுத்தி வருவதாக பலரும் கருத்து தெரிவித்திருக்கின்றனர். முன்பு சில
ஆண்டுகளுக்கு முன் பீர் குடித்த பெண் ஒருவருக்கு கசையடி தண்டனைக்கு
உத்தரவிடப்பட்டது. ஆனால், அன்னிய முதலீடுகள் குறைந்து போகும் என்ற அமெரிக்க
எச்சரிக்கை வந்ததும் அந்த தண்டனை நிறைவேற்றப்படவில்லை என்பது
குறிப்பிடத்தக்கது.