3 நகரங்களை தகர்க்க தீவிரவாதிகள் சதி

புதுடெல்லி : புனே குண்டு வெடிப்பைத் தொடர்ந்து டெல்லி உட்பட 3 நகரங்களை தகர்க்க தீவிரவாதிகள் சதித் திட்டம் தீட்டியுள்ளதாக உளவுத் துறை எச்சரித்துள்ளது. இதைத் தொடர்ந்து, அந்த நகரங்களில் பாதுகாப்பு பலப்படுத்தப்பட்டுள்ளது. பாதுகாப்பு குறித்து உள்துறை அமைச்சர் சிதம்பரத்துடன் பிரதமர் மன்மோகன் சிங் நேற்று அவசர ஆலோசனை நடத்தினார். மகாராஷ்டிர மாநிலம் புனேயில் ஒரு பேக்கரியில் நேற்று முன்தினம் தீவிரவாதிகள் வைத்த சக்தி வாய்ந்த குண்டு வெடித்தது. இதில் 9 பேர் பலியாயினர். 57 பேர் காயமடைந்தனர். மும்பையில் கடந்த 2008ம் ஆண்டு நவம்பர் 26ம் தேதி தீவிரவாதிகள் நடத்திய தாக்குதலுக்குப் பிறகு இதுதான் மிகப் பெரிய தாக்குதல். அரசு எடுத்துவரும் முன்னெச்சரிக்கை நடவடிக்கைகளால் தீவிரவாத தாக்குதல்கள் குறைந்து விட்டதாக கருதப்பட்ட நிலையில், புனே குண்டு வெடிப்பு நாடு முழுவதும் அதிர்ச்சியை ஏற்படுத்தியுள்ளது. இந்நிலையில், டெல்லி, உத்தரப் பிரதேச மாநிலம் கான்பூர், மத்தியப் பிரதேச மாநிலம் இந்தூர் ஆகிய 3 நகரங்களை தகர்க்க தீவிரவாதிகள் திட்டமிட்டுள்ளதாக திடுக்கிடும் தகவல் வெளியாகியுள்ளது. இந்த நகரங்களில் தீவிரவாதிகள் தாக்குதல் நடத்தலாம் என்று உளவுத் துறை எச்சரித்துள்ளது. புனேயில் குண்டு வெடிப்பு நடந்த இடத்தை மத்திய உள்துறை அமைச்சர் சிதம்பரம் பார்வையிட்டார். முதல்வர் அசோக் சவான் மற்றும் அதிகாரிகளுடன் ஆலோசனை நடத்தினார். பின்னர், மும்பையில் இருந்து டெல்லி சென்ற அவர் நாட்டின் பாதுகாப்பு குறித்து ஆராய உயர் நிலைக் குழுக் கூட்டத்தை அவசரமாகக் கூட்டினார். இதில், மத்திய உள்துறை செயலாளர் ஜி.கே.பிள்ளை, உளவுத் துறை மற்றும் ரா அமைப்பின் தலைவர்கள், உயர் அதிகாரிகள் கலந்து கொண்டனர். டெல்லி, கான்பூர், இந்தூர் ஆகிய நகரங்களுக்கு தீவிரவாத அச்சுறுத்தல் குறித்து கூட்டத்தில் விவாதிக்கப்பட்டது. உள்நாட்டு பாதுகாப்பு பற்றியும் தீவிரவாத தாக்குதல்களை முறியடிக்க எடுக்க வேண்டிய நடவடிக்கைகள் பற்றியும் விரிவாக ஆலோசிக்கப்பட்டது. டெல்லி உட்பட 3 நகரங்களை உஷார்படுத்தவும் நாடு முழுவதும் கண்காணிப்பை தீவிரப்படுத்தவும் முடிவு செய்யப்பட்டது. பிரதமர் ஆலோசனை: பின்னர், பிரதமர் மன்மோகன் சிங்கை சிதம்பரம் சந்தித்தார். புனே குண்டு வெடிப்பு சம்பவம் பற்றி பிரதமரிடம் சிதம்பரம் விளக்கினார். தீவிரவாதிகளின் மிரட்டல் குறித்தும் நாட்டின் பாதுகாப்பு குறித்தும் பிரதமர் ஆலோசனை நடத்தினார். இதைத் தொடர்ந்து, புனே குண்டு வெடிப்பு சம்பவத்தில் குற்றவாளிகளை விரைவில் கண்டுபிடிக்க மத்திய அரசும் மாநிலம் அரசும் இணைந்து விசாரணை நடத்த பிரதமர் உத்தரவிட்டார். இறந்தவர் குடும்பங்களுக்கு தலா ரூ.2 லட்சமும் காயமடைந்தவர்களுக்கு ரூ.1 லட்சமும் பிரதமர் நிவாரண நிதியில் இருந்து வழங்கப்படும் என்றும் அவர் அறிவித்துள்ளார்.

Do u think this is a truth.