நடிகை மீனா திருமணம்

by **சிவா** Sun May 03, 2009 1:26 pm

சிவாஜிகணேசன் நடித்த `நெஞ்சங்கள்' படத்தில் குழந்தை நட்சத்திரமாக அறிமுகமானவர், மீனா. `ஒரு புதிய கதை' என்ற படத்தின் மூலம் கதாநாயகி ஆனார். தொடர்ந்து, `என் ராசாவின் மனசிலே' படத்தில் ராஜ்கிரண் ஜோடியாக நடித்தார்.

ரஜினிகாந்த் ஜோடியாக `எஜமான்' படத்தில் நடித்த பின், மீனா பிரபலமானார். தமிழ் பட உலகின் முன்னணி கதாநாயகி என்ற அந்தஸ்தை அடைந்தார்.

தொடர்ந்து கமலஹாசன் ஜோடியாக `அவ்வை சண்முகி,' கே.பாக்யராஜ் ஜோடியாக `ஒரு ஊர்ல ஒரு ராஜகுமாரி,' பிரபு ஜோடியாக `ராஜகுமாரன்,' முரளி ஜோடியாக `பொற்காலம்,' சரத்குமார் ஜோடியாக `நாட்டாமை,' அர்ஜூன் ஜோடியாக ரிதம்' உள்பட ஏராளமான தமிழ் படங்களிலும், தெலுங்கு, மலையாளம், கன்னடம் ஆகிய மொழி படங்களிலும் நடித்து இருக்கிறார்.

பின்னர், `சின்னதிரை'க்குள் நுழைந்தார். `லட்சுமி' என்ற தொடரில் முதன்முதலாக நடித்தார். இப்போது, `கல்யாணம்' என்ற தொடரில் நடித்து வருகிறார்.

மீனாவுக்கு திருமணம் நிச்சயிக்கப்பட்டு இருக்கிறது. மணமகன் பெயர், வித்யாசாகர். பெங்களூரில் உள்ள ஒரு `சாப்ட்வேர்' நிறுவனத்தில், என்ஜினீயராக பணிபுரிகிறார். இது, பெற்றோர்கள் ஏற்பாடு செய்த திருமணம்.

நிச்சயதார்த்த நிகழ்ச்சி, சென்னை சைதாப்பேட்டையில் உள்ள மீனா வீட்டில் நடந்தது. நெருங்கிய உறவினர்களும், நடிகைகள் சங்கவி, ஸ்ரீதேவி ஆகியோரும் கலந்துகொண்டார்கள்.

மீனா-வித்யாசாகர் திருமணம் வருகிற ஜுலை மாதம் 12-ந் தேதி, திருப்பதியில் நடக்கிறது. திருமண வரவேற்பு நிகழ்ச்சி, ஜுலை 14-ந் தேதி சென்னையில் நடைபெற இருக்கிறது.