இயல்புநிலை திரும்பும் வரை உதவிகள்: சத்குரு ஜக்கி வாசுதேவ்

-
மழை- வெள்ளத்தால் பாதிக்கப்பட்ட கிராமங்களில் இயல்புநிலை திரும்பும் வரையில் தேவையான உதவிகள் தன்னார்வ தொண்டர்களால் வழங்கப்படும் என ஈஷா யோக மைய நிறுவனர் சத்குரு ஜக்கி வாசுதேவ் தெரிவித்தார்.
-
அர்ப்பணிப்பு உணர்வுகளுடன் வெள்ள நிவாரணப் பணிகளில் ஈடுபட்ட 3 ஆயிரத்துக்கும் மேற்பட்ட தன்னார்வத் தொண்டர்களுடன் சத்குரு ஜக்கி வாசுதேவ் கலந்துரையாடும் நிகழ்ச்சி சென்னை வள்ளுவர் கோட்டத்தில் வியாழக்கிழமை நடைபெற்றது. அப்போது தொண்டர்களின் கேள்விகளுக்கு அவர் பதில் அளித்தார்.
இதைத் தொடர்ந்து, அவர் செய்தியாளர்களிடம் கூறியது:
-
பேரிடர் நேரிடும்போது மட்டும் மனித நேயம் மலரக் கூடாது. மனித நேயம் எப்போதும் இருக்க வேண்டும். குடியிருப்புகளில் மழை வெள்ளம் புகுந்து மக்கள் அதிக பாதிப்புகளுக்கு உள்ளாகினர். எனவே, அந்தப் பகுதிகளில் மக்களின் அத்தியாவசியத் தேவைகளைக் கண்டறிந்து பூர்த்தி செய்யப்படுகிறது.
-
நகரங்களில் இயல்புநிலை திரும்பி வருகிறது. ஆனால், வெள்ளம் பாதித்த கடலூர் மாவட்ட கிராமங்களில் வாழ்வாதாரம் முழுவதும் பாதிக்கப்பட்டுள்ளது. அதனால், தேவையான உதவிகள் தன்னார்வத் தொண்டர்களால் வழங்கப்படும். குறிப்பாக, மாணவர்களுக்கு தேவையான நோட்டு புத்தகங்கள் வழங்கப்படும்.-

தொற்றுநோய்கள் பரவாமல் தடுக்கும் வகையில் முன்னெச்சரிக்கை நடவடிக்கையாக நகரங்களில் 100 இடங்களில் மருத்துவ முகாம்கள் நடத்தப்பட்டு வருகின்றன என்று அவர் தெரிவித்தார்.
-
இதைத் தொடர்ந்து, தன்னார்வ அமைப்புகளான "சென்னை வாலண்டியர்ஸ்' அமைப்பின் ரிங்கு, சுந்தரம் மெடிக்கல் பவுண்டேஷன் அமைப்பின் டாக்டர் விஜயபாரதி, மண களிம்பு அமைப்பைச் சேர்ந்த நடிகர் பார்த்திபன், சென்னை மைக்ரோ அமைப்பைச் சேர்ந்த நடிகர் சித்தார்த், பாலாஜி, கண்ணன் ஆகியோருக்கு நினைவுப் பரிசுகள் வழங்கப்பட்டன.
-
நடிகை சுஹாசினி, இயக்குநர் எஸ்.ஏ.சந்திரசேகர், ஷோபா சந்திரசேகர், நடிகர் படவா கோபி உள்ளிட்டோர் கலந்து கொண்டனர்.
=
தினமணி