பகல் கனவு காணாதே

சம்சுதீன் · சம்சுதீன் Tue Feb 09, 2010 3:33 pm

பகல் கனவு காணாதே

கடைத் தெருவில் பால் விற்பதற்க்காகத் தலையில் பால் பானையைச் சுமந்த படி சென்று கொண்டிருந்தாள் ஒருத்தி.

தன் எதிர்காலம் எப்படி இருக்கும் என்று கனாக் கண்டபடி நடந்து கொண்டிருந்தாள் அவள். பானையில் உள்ள பாலை எல்லாம் நல்ல விலைக்கு விற்பேன். அந்தப் பணத்தைக் கொண்டு முட்டைகள் வாங்குவேன். அந்த முட்டைகளில் இருந்து குஞ்சுகள் வெளியே வரும். அவை சில நாட்களில் பெரிய கோழிகள் ஆகும்.

நான் அந்த கோழிகளை எல்லாம் நிறையப் பணத்திற்கு விற்பேன். அந்தப் பணத்தைக் கொண்டு விலை உயர்ந்த பட்டாடைகள் வாங்குவேன்.

அந்த உடைகளை நான் அணிந்து கொள்வேன். பேரழகியான என்னைத் திருமணம் செய்து கொள்ளப் பல இளைஞர்கள் போட்டி போடுவார்கள். நான் யாரையுமே ஏறெடுத்துப் பார்க்க மாட்டேன்.

அவர்கள் யாரையும் எனக்குப் பிடிக்க வில்லை என்பதைக் காட்டத் தலையை இப்படி வேகமாக அசைப்பேன் என்று தலையை அசைத்தாள்.

அவள் தலையிலிருந்து பால் பானை கீழே விழுந்து நொறுங்கியது. அதில் இருந்த பால் வீதியில் வழிந்து ஓடியது.

தன் கனவுகள் அனைத்தும் நாசமாகி விட்டதை அறிந்து அழுது புலம்பிய படி வீடு திரும்பினாள் அவள்